ەسكى كولىكتەردى قايتا وڭدەۋگە قابىلداۋ جەلتوقساننىڭ ورتاسىندا باستالادى، دەپ حابارلايدى aqshamnews.kz ەكولوگيا مينيسترلىگىنە سىلتەمە جاساپ.
وتىنىمدەر «جاسىل دامۋ» اق پورتالى ارقىلى قابىلدانادى. كولىك يەلەرى كولىكتەرىن تاسىمالداۋشىعا ساتۋ نەمەسە قابىلداۋ پۋنكتىنە ءوز بەتىمەن تاپسىرا الادى. ۋتيليزاسيا ءۇشىن جەڭىلدىك سەرتيفيكاتى نەمەسە اقشالاي سىياقى بەرىلەدى.
سەرتيفيكات سوماسى جەڭىل كولىكتەر ءۇشىن 315 000 تەڭگەدەن باستالادى. تولىق ەرەجە جاقىن ارادا جاريالانادى.
ەكولوگيا مينيسترلىگىنىڭ قالدىقتاردى باسقارۋ دەپارتامەنتىنىڭ مالىمەتىنشە، ەسكى ءاۆتوموبيلدى تاپسىرعانى ءۇشىن كولىك يەلەرىنە وتاندىق كولىك ساتىپ الۋ ءۇشىن جەڭىلدىك سەرتيفيكاتى نەمەسە اقشالاي تەڭ سوما بەرىلەدى.
تولەم مولشەرى مىناداي:
جەڭىل كولىك — 315 000 تەڭگە؛
ميكرواۆتوبۋس — 550 000 تەڭگە؛
اۆتوبۋس — 750 000 تەڭگە؛
12 تونناعا دەيىنگى جۇك كولىگى — 550 000 تەڭگە؛
اۋىر جۇك كولىكتەرى — 750 000 تەڭگە؛
تراكتور — 560 000 تەڭگەدەن 1 ملن تەڭگەگە دەيىن؛
كومباين — 1.5–2 ملن تەڭگە.