Telegram مەسسەندجەرىندە ادام باسىنىڭ سيليكون مۋلياجىنا ميكروچيپ ەنگىزۋ بارىسى كورسەتىلگەن بەينەروليك تاراۋدا. قۇرىلعىنى ينەنىڭ كومەگىمەن قۇلاقتىڭ ارتىنا مۇلدەم كورىنبەيتىندەي ەتىپ ورنالاستىرادى. ۆيدەو استىندا ءبارىن وسىلاي چيپتەيدى دەپ جازىلعان. بۇل فەيك اقپارات دەپ حابارلايدى، almaty-akshamy.kz Stopfake.kz سىلتەمە جاساپ.
شىن مانىندە، روليكتە كورسەتىلگەن مانيپۋلياسيانى جانۋارلارعا ارنالعان شپريس-اپپليكاتورمەن جاسايدى. مۇنداي قۇرىلعىلاردى ءىرى ماركەپلەيستەردە جانە ۆەتەرينارلىق ءدارىحانالاردا ساتىپ الۋعا بولادى. شپريسكە ديامەترى ادەتتەگىدەن الدەقايدا كەڭ قۋىس ينە سالىنعان. ول ارقىلى كولەمى كۇرىش دانىندەي عانا چيپ وتەدى. قۇرىلعىنىڭ فۋنكسيونالدىعى وتە شەكتەۋلى – وندا جانۋاردىڭ جاسى، شىعۋ تەگى جانە يەسى تۋرالى اقپارات، سونداي-اق جوعالعان جاعدايدا ءۇي جانۋارىن تابۋعا بولاتىن سايكەستەندىرۋ ءنومىرى بولادى. بۇل دەرەكتەردى ارنايى سكانەردىڭ كومەگىمەن عانا وقيدى. ادامداردى بۇلاي چيپتەۋ ماعىناسىز، ونىڭ بىرنەشە سەبەبى بار. بىرىنشىدەن، چيپتە ۇسىنىلعان اقپارات (مىسالى، يەسى مەن تۇقىمى تۋرالى مالىمەتتەر) ادامدارعا قولدانىلمايدى.
ونىڭ ۇستىنە، ديامەترى ۇلكەن ينەنى قۇلاقتىڭ ارتىنا ەنگىزۋ جانە مۇنداي پروسەدۋرانى ۆاكسينالاۋمەن شاتاستىرۋ مۇمكىن ەمەس. يممۋنداۋعا ارنالعان پرەپاراتتار، ادەتتە، "دەلتا" ءتارىزدى بۇلشىق ەتكە، ياعني يىققا ەگىلەدى.
بۇگىنگى تاڭدا ادامدار چيپتەردى ءوز قالاۋى بويىنشا ەنگىزە الادى. قۇرىلعىلار اقپاراتتى وقۋ قيىن بولاتىن قۇلاقتىڭ ارتىنا ەمەس، الاقاننىڭ سىرت جاعىنا تەرى استىنا سالىنادى. مۇنداي چيپتەردىڭ فۋنكسيونالدىعى دا وتە قاراپايىم جانە ولاردىڭ كومەگىمەن ادامدى باقىلاۋ مۇمكىن ەمەس. بۇل تۋرالى ءبىز بۇعان دەيىن جازعان بولاتىنبىز.
قورىتا ايتقاندا، ۆيدەودا جانۋارلارعا جاسالاتىن مانيپۋلياسيا كورسەتىلگەن. كادرلاردا – ۆەتەرينارلىق شپريس-اپپليكاتور. ول ۆاكسينالار مەن باسقا دا دارى-دارمەك ەگىلەتىن قاراپايىم ينەكسيالىق شپريستەن ايتارلىقتاي ەرەكشەلەنەدى. پلانەتا حالقىن چيپتەۋ كونسپيرولوگيالىق تەوريا بولىپ تابىلادى جانە ەشقانداي دالەلى جوق. بۇعان دەيىن ءبىز قازاقستاندىقتاردى ۆاكسينالاۋعا ارنالعان شپريستەردەن چيپتەر تابىلعانى تۋرالى فەيكتى جوققا شىعارعان بولاتىنبىز. ول روليكتە دە ۆەتەرينارلىق اپپليكاتورلار كورسەتىلگەن ەدى.