الماتىدا قىسقى مارافون ءوتتى. مەرەيتويلىق جارىسقا 2500-نان استام ادام قاتىستى
الماتىدا قالا اكىمدىگىنىڭ قولداۋىمەن جىل سايىنعى Winter Run 2024 جارىسى ءوتتى. شاراعا سالاۋاتتى ءومىر سالتىن ۇستاناتىن 10 مەن 80 جاس ارالىعىنداعى 2 500-دەن استام ادام قاتىستى.
ءداستۇرلى تۇردە جىل سايىن وتەتىن مارافونعا قاتىسۋعا نيەت بىلدىرگەندەر كۇن رايىنىڭ سالقىندىعىنا قاراماستان كوپ جينالدى. جەكسەنبىنىڭ تاڭىن جۇگىرۋدەن باستاعان الماتىلىقتاردىڭ اراسىندا ءتۇرلى سالادا قىزمەت ەتەتىن مامانداردان باستاپ، كاسىبي سپورتشىلارعا دەيىن بار.
سورە سىزىعى ءال-فارابي داڭعىلىنداعى «نۇرلى تاۋ» بو-دان باستالىپ، ءدال وسى جەردە اياقتالاتىن جارىسقا قاتىسۋشىلار 3 قاشىقتىق بويىنشا ب ا ق سىناستى. بالالار 3 شاقىرىمعا جۇگىرسە، ەرەسەكتەر 10 شاقىرىمعا، ال سكانديناۆيالىق جۇرىسپەن اينالىساتىندار 7 شاقىرىم قاشىقتىقتا باسەكەگە ءتۇستى.
ۇيىمداستىرۋشىلار مارافونعا قاتىسۋشىلار جىل وتكەن سايىن ارتىپ كەلە جاتقانىن ايتا كەلىپ، ءىس-شارانىڭ جوعارى دەڭگەيدە وتۋىنە اتسالىسقان بارلىق سالا قىزمەتكەرلەرىنە العىس ءبىلدىردى.
– الماتىدا جۇگىرۋدەن وتەتىن جارىستاردىڭ بارلىعىن «ءبىرىنشى بولۋ – باتىلدىق» كورپوراتيۆتىك قورى ۇيىمداستىرادى. بۇگىنگى Winter Run 2024 مارافونى بيىل ونىنشى رەت وتكىزىلىپ وتىر. وتكەن جىلى الماتى مارافونىندا سكانديناۆيالىق جۇرىستەگى جارىس بويىنشا قازاقستاننىڭ رەكوردىن ورناتقان بولاتىنبىز. سپورتشىلاردىڭ قاتارى جىل ساناپ ارتىپ كەلەدى. سوندىقتان مۇنداي ءىس-شارالار ەلىمىزدەگى بۇقارالىق سپورتتى دامىتۋعا ۇلكەن سەپتىگىن تيگىزەدى دەپ ويلايمىن. سونىمەن قاتار، ءبىز وسى ءىس-شارانى جوعارى دەڭگەيدە وتۋىنە اتسالىسقان الماتى قالاسىنىڭ پوليسيا دەپارتامەنتىنە، دارىگەرلەر مەن ەرىكتىلەرگە ەرەكشە العىس بىلدىرەمىز، – دەيدى الماتى مارافونىنىڭ race-ديرەكتورى سالتانات قازىبايەۆا.
جارىس الاڭىنان جاستى دا، جاسامىستى دا، قولدارىنا ارنايى سۇيەنەتىن تاياقتاردى پايدالانۋ ارقىلى جاياۋ سەرۋەندەۋگە كەلگەن زەينەتكەرلەردى، ءتىپتى شەتەلدىك تۋريستەردى دە كەزدەستىرۋگە بولادى.
– زەينەتكەرمىن، جاسىم 72-دە. بەلسەندى ءومىر ءسۇرۋ ورتالىعىنىڭ مۇشەسىمىن. ءبىز سياقتى ۇلكەن كىسىلەر ءۇشىن ورتالىعىمىزدا ءتۇرلى شارالار ءوتىپ تۇرادى. مىنە، بۇگىنگى جارىس سولاردىڭ ءبىرى. قىسقى مارافونعا وسىمەن ەكىنشى رەت قاتىسىپ وتىرمىن. سپورتپەن شۇعىلدانعان ادام ۇنەمى كوڭىلدى جۇرەدى، ومىرگە دەگەن قۇشتارلىعىڭدى ارتتىرادى. دەنساۋلىققا پايداسى زور. زامانداستارىمنىڭ بارلىعىن سپورتپەن جۇيەلى تۇردە اينالىسۋعا شاقىرامىن، - دەيدى فاتيما باتىربەكوۆا.
گريگ لي، اقش-تىڭ ۆينچەستەر قالاسىنان كەلگەن تۋريست:
- الماتىعا كەلگەنىمە 6 اي بولدى. بۇل قالادا مەنىڭ دوستارىم كوپ. الماتىنىڭ تابيعاتى دا، حالقى دا ەرەكشە! بۇگىن مەنىڭ دوستارىم جارىسقا قاتىسۋدا. دوستارىمدى قولداپ-قولپاشتاۋعا كەلدىم. كەرەمەت جارىس ءوتىپ جاتىر!
كوپشىلىك اراسىنان ۇلىنا قولداۋ بىلدىرۋگە كەلگەن تەاتر جانە كينو اكتەرى اسەت يمانعاليۇلىن كەزدەستىرىپ، سوزگە تارتتىق.
– ۇلىم زاڭعار يمانعاليۇلىنا قولداۋ بىلدىرۋگە كەلدىم. تالدىقورعانداعى قازاق تۇرىك-ليسەيىندە وقيدى. سول وقۋ ورنىنان ميراس اعايلارىمەن بىرگە كەلىپ، 9 بالا قاتىسىپ جاتىر. بالام جىلدا قاتىسادى. ءبىراق، مەن ۋاقىتىم بولماي كەلە المايتىنمىن. بۇگىنگى شارا قاتتى ۇناپ تۇر. مەن ءتىپتى بۇدان كەيىن جانۇياممەن قاتىسسام با دەگەن شەشىم قابىلدادىم. سپورت – دەنساۋلىقتىڭ كەپىلى، سالاۋاتتى ءومىر ءسۇرۋدىڭ نەگىزگى كىلتى. جۇمىس بابىمەن ءجۇرىپ، الماتىدا وتەتىن سپورتتىق شارالاردى، وسىنداي ادەمى ساتتەردى ءبىز جىبەرىپ الادى ەكەنبىز. حالىقتىڭ ورتاسىندا، كوپشىلىكپەن بىرگە جۇرگەننىڭ ءوزى ءبىر عانيبەت قوي! شىنىمدى ايتسام، وزىمە-وزىم ريزا بولىپ تۇرمىن. الماتى قالاسى اكىمدىگىنە جانە وسى شارانى ۇيىمداستىرىپ جاتقان ازاماتتارعا كوپ راحمەت ايتقىم كەلەدى، – دەيدى ونەر يەسى.
ءوز زامانداستارىنىڭ اراسىنان وزا شاۋىپ، مارە سىزىعىن ءبىرىنشى بولىپ كەسكەن دانا ءدىلشات ۇزدىكتەر قاتارىنان كورىندى.
سۋرەتتى تۇسىرگەن - ايگۋل كولۋمبەتوۆا
– ەرەكشە قۋانىپ تۇرمىن. مارەگە العاشقى بولىپ مەن كەلدىم. وتە كەرەمەت شارا ءوتتى. مارافونعا 3 جىلدان بەرى قاتىسامىن. سپورتپەن شۇعىلدانعاندى قاتتى جاقسى كورەمىن. ۇيىمداستىرۋشىلارعا العىسىم شەكسىز، – دەيدى نازاربايەۆ زياكەرلىك مەكتەبىنىڭ 7 سىنىپ وقۋشىسى.
ءىس-شارا بارىسىندا جانكۇيەرلەرگە ارناپ ىستىق شاي مەن دەمەۋشىلىك بىلدىرگەن كومپانيالار اتىنان تاعام ۇسىنىلدى. ال الماتى اسپانىن انگە بولەگەن اۋەن كوپشىلىكتىڭ سپورتقا دەگەن قىزىعۋشىلىعىن ارتتىرىپ، كوڭىلىن كوتەردى. الاڭنىڭ مەديسينالىق شاتىرلارمەن قامتىلىپ، ءتارتىپ ساقشىلارىنىڭ ءجىتى باقىلاۋىندا بولۋى دا مارافوننىڭ ءوز دەڭگەيىندە ۇيىمداستىرىلعانىن كورسەتتى.
ايتا كەتەيىك، بيىل الماتىدا Summer Run، City Run، Sora Almaty Run، Tau Jarys، Almaty Half Marathon جارتىلاي مارافونى، ۆەلوجارىس – Almaty city تۋرى جانە جىلدىڭ ەڭ ماڭىزدى وقيعاسى – Almaty Marathon سەكىلدى بىرنەشە ماۋسىمدىق جارىستار وتەدى. ءىس-شارالار كۇنتىزبەسىمەن الماتى مارافونىنىڭ سايتىنان تانىسۋعا بولادى.
جارىس سوڭىندا مارافون جەڭىمپازدارى اقشالاي سىيلىقتارمەن، ماقتاۋ قاعازدارىمەن جانە مەدالدارمەن ماراپاتتالدى.