سەنات دەپۋتاتتارى كۇزەت قىزمەتى، تۇرعىن ءۇي قاتىناستارى جانە قۇقىق قورعاۋ قىزمەتى ماسەلەلەرى بويىنشا زاڭناماعا ەنگىزىلگەن تۇزەتۋلەردى ماقۇلدادى، دەپ حابارلايدى aqshamnews.kz
سەناتور جاننا اسانوۆانىڭ ايتۋىنشا، بۇل زاڭ كۇزەت قىزمەتى سالاسىنداعى مەملەكەتتىك باقىلاۋ ءتارتىبىن جەتىلدىرۋ، قارۋ يەلەرىنە جانە كۇزەت قىزمەتىن جۇزەگە اسىراتىن ۇيىمدارعا قويىلاتىن تالاپتاردى كۇشەيتۋ، سونداي-اق تۇرعىن ۇيمەن قامتاماسىز ەتۋ جانە تۇرعىن ءۇي تولەمدەرىن جۇزەگە اسىرۋ ءتارتىبىن جەتىلدىرۋ ماقساتىندا ازىرلەنگەن.
"2026 جىلعى 1 قاڭتارداعى جاعداي بويىنشا ىشكى ىستەر ورگاندارىندا 4 463 جەكەمەنشىك كۇزەت ۇيىمى تىركەلگەن. كۇزەتشىلەردىڭ جالپى سانى 97 مىڭ ادامنان اسادى. وزدەرىڭىزگە بەلگىلى، جەكەمەنشىك كۇزەت ۇيىمدارى پوليسيا قىزمەتكەرلەرىمەن قاتار كۇزەتىلەتىن نىسانداردىڭ قاۋىپسىزدىگىن قامتاماسىز ەتىپ، قوعامدىق ءتارتىپتى ساقتاۋعا ۇلەس قوسادى. وسىعان بايلانىستى زاڭمەن ۇسىنىلىپ وتىرعان تۇزەتۋلەر مۇنداي ۇيىمداردىڭ جاۋاپكەرشىلىگىن كۇشەيتەدى، ويتكەنى ولاردىڭ قىزمەتى جەكە جانە زاڭدى تۇلعالاردىڭ ءومىرى مەن دەنساۋلىعىن، سونداي-اق مۇلكىن قىلمىستىق جانە وزگە دە زاڭسىز ارەكەتتەردەن قورعاۋمەن تىكەلەي بايلانىستى"، – دەدى جاننا اسانوۆا.
زاڭ اياسىندا مىناداي شارالار ەنگىزىلەدى:
قارۋى بار زاڭدى تۇلعالار ءۇشىن قىزمەتى ۋاقىتشا توقتاتىلعان جاعدايدا قارۋ مەن وق-دارىلەردى ىشكى ىستەر ورگاندارىنا ساقتاۋعا تاپسىرۋ مىندەتى؛
جەكەمەنشىك كۇزەت ۇيىمدارىنىڭ قىزمەتىن توقتاتۋ، اياقتاۋ نەمەسە قايتا باستاۋ، سونداي-اق تىركەلگەن جەرىنەن تىس اۋماقتا كۇزەت قىزمەتىن كورسەتۋ جاعدايلارى تۋرالى پوليسيانىڭ اۋماقتىق بولىمشەلەرىن حاباردار ەتۋ مىندەتى.
سەناتوردىڭ ايتۋىنشا، بۇل ماڭىزدى تۇزەتۋلەر ۋاكىلەتتى ورگاندارعا جەكەمەنشىك كۇزەت ۇيىمدارىنا قاتىستى ءتۇرلى وقيعالارعا جەدەل ارەكەت ەتۋگە مۇمكىندىك بەرەدى، ويتكەنى كوپتەگەن جاعدايدا كۇزەت ۇيىمىنىڭ باسقا وڭىردە جۇرگەنى تەك بەلگىلى ءبىر وقيعا ورىن العاننان كەيىن عانا انىقتالادى.
"زاڭداعى جاڭا نورما – كۇزەت قىزمەتى سۋبەكتىلەرىنىڭ ۋاكىلەتتى ورگانعا ءوز قىزمەتى تۋرالى ەسەپ بەرۋ مىندەتىن ەنگىزۋ. بۇل مەملەكەتتىك باقىلاۋدى ءتيىمدى جۇزەگە اسىرۋعا ىقپال ەتەدى، سەبەبى قازىرگى تاڭدا ەسەپتىلىك ۇسىنۋ ءتارتىبى زاڭمەن ناقتى رەتتەلمەگەن. سونىمەن قاتار، قارۋ اينالىمى سالاسىنداعى مەملەكەتتىك باقىلاۋدى كۇشەيتۋ ماقساتىندا ازاماتتىق جانە قىزمەتتىك قارۋ يەلەرىنە قوسىمشا مىندەتتەر جۇكتەلەدى"، – دەپ تولىقتىردى جاننا اسانوۆا.