قازاقستان جازۋشىلار وداعى باسقارماسىنىڭ حاتشىلىعى سىرقاتتانىپ جۇرگەن اقىن جازۋشىلارعا كومەك كورسەتۋ تۋرالى ماسەلەنى قاراستىردى، دەپ حابارلايدى Almaty-akshamy.kz.
قازاقستان جازۋشىلار وداعى باسقارماسىنىڭ ءتوراعاسى مەرەكە قۇلكەنوۆ بۇل باستاما وداق جانىنان قۇرىلعان «قازاق ادەبيەتىنىڭ مەسەناتى» قوعامدىق قورى ارقىلى جۇزەگە اساتىندىعىن ايتىپ ءوتتى.
«جازۋشىلار وداعى تەك قوعامدىق بىرلەستىك قانا ەمەس، ۇلكەن وتباسى ەكەندىگىمىزدى ۇمىتپاۋىمىز كەرەك. وسىنى ەسكەرە وتىرىپ، قازىرگى تاڭدا اۋىر سىرقاتتانىپ جاتقان اقىن-جازۋشىلارىمىزعا كومەك كورسەتۋ تۋرالى شەشىم قابىلدادىق»، - دەدى م.قۇلكەنوۆ جينالىس بارىسىندا.
اعىمداعى جىلدىڭ سوڭىنا دەيىن 50 مىڭ تەڭگە كولەمىندە اي سايىنعى ماتەريالدىق كومەك نەسىپبەك ايتوۆ، زاريا جۇمانوۆا، ءجۇرسىن ەرمان، ايسۇلۋ قادىربايەۆا، سارا لاتييەۆا، تۇرلىبەك مامەسەيىت، نينا سكالكوۆسكاياعا بەرىلەتىن بولادى.
مەرەكە قۇلكەنوۆ مۇمكىندىگىنشە قالامگەرلەرگە الەۋمەتتىك قولداۋ ءبىلدىرىپ، شىعارماشىلىقپەن اينالىسۋعا جاعداي جاساۋ وداقتىڭ نەگىزگى مىندەتتەرىنىڭ ءبىرى ەكەندىگىن جەتكىزدى.