قازاق ۇلتتىق اگرارلىق ۋنيۆەرسيتەتىندە ءداستۇرلى حالىقارالىق جازعى مەكتەپتىڭ اشىلۋ سالتاناتى ءوتتى. ونلاين، وفلاين فورماتتاعى ءىس-شارادا امەريكا، ەۋروپا، تىنىق مۇحيت، ورتالىق ازيا مەملەكەتتەرى مەن تمد-دان كەلگەن 33 ەلدىڭ وكىلدەرى قاتىستى.
«بيىلعى حالىقارالىق جازعى مەكتەپ وفلاين رەجيمدە وتۋدە. وندا قاتىسۋشىلار ءبىلىم كوكجيەگىن كەڭەيتىپ، اگروونەركاسىپتىك كەشەندى دامىتۋ سالاسىنداعى يننوۆاسيالىق تەحنولوگيالارمەن تانىسا الادى»، – دەپ اتاپ ءوتتى قازۇازۋ باسقارما توراعاسى-رەكتورى، ۇلتتىق اكادەميانىڭ ۆيسە-پرەزيدەنتى، اكادەميك تىلەكتەس ەسپولوۆ.
حالىقارالىق جازعى مەكتەپ بىرنەشە عىلىمي باعىتتى قامتىپ، «تابيعي رەسۋرستاردى باعالاۋ جانە باسقارۋ ماسەلەلەرى»، «جاسىل ەكونوميكا»، «اۋىل شارۋاشىلىعىنداعى يننوۆاسيالىق تەحنولوگيالار مەن تەحنيكالىق قۇرالدار»، «جەر جانە ورمان رەسۋرستارىن باسقارۋ» سەكىلدى تاقىرىپتاردا وي قوزعايدى. بارلىق تىڭداۋشى ارنايى پاندەر بويىنشا 5 ECTS الاتىن بولادى. جازعى مەكتەپ اياسىندا جاس عالىمدار STARTUP جوبالاردىڭ ونلاين-بايقاۋىنا قاتىسا الادى. ۇزدىك جوبالار ماراپاتتالىپ، ارنايى سەرتيفيكاتتار بەرىلەدى.
«وسى ەكى اپتا ءبىز ءۇشىن وتە مازمۇندى جانە قىزىقتى بولاتىنىنا سەنىمدىمىن. حالىقارالىق جازعى مەكتەپتىڭ قاتىسۋشىلارى يننوۆاسيالىق ورتالىقتاردا، ۋنيۆەرسيتەتتىڭ جانە عىلىمي ۇيىمداردىڭ زەرتتەۋ زەرتحانالارىندا، وزىق شارۋاشىلىقتار مەن كاسىپورىنداردا ءبىلىم الىپ قانا قويماي، قالامەن تانىسىپ، تەاترلارعا، مۇراجايلارعا، كورمەلەرگە جانە باسقا دا كورىكتى جەرلەرگە بارا الادى»، – دەيدى ت.ەسپولوۆ.
جازعى مەكتەپ اياسىندا ازىق-تۇلىك قاۋىپسىزدىگى جونىندەگى يسلام ۇيىمىنىڭ حالىقارالىق فورۋمى ءوتتى. وتىرىس 75 جىلدىق مەرەيتويىن جاقىندا عانا اتاپ وتكەن ق ر ۇلتتىق عىلىم اكادەمياسىنىڭ «عىلىم ورداسىندا» ۇيىمداستىرىلدى. ءىس-شارانىڭ مودەراتورى ازىق-تۇلىك قاۋىپسىزدىگى جونىندەگى يسلام ۇيىمىنىڭ بايلانىس اعا وفيسەرى مانافي ابدۋللا مۋتۋالو بولدى.
15 ماۋسىم كۇنى «زەرتتەۋ ۋنيۆەرسيتەتىنىڭ قازاقستاندىق مودەلى – دامۋدىڭ 20 جىلدىق تاجىريبەسى» فورۋمى جانە تمد-نىڭ جەتەكشى اگرارلىق جوو رەكتورلارى كەڭەسىنىڭ كەڭەيتىلگەن وتىرىسى وتەدى. ۇلىبريتانيادا جارىق كورگەن «زەرتتەۋ ۋنيۆەرسيتەتىنىڭ قازاقستاندىق مودەلى»، «قازۇازۋ – دۇرىس تاماقتانۋ جانە قورشاعان ورتا سالاسىنداعى الەمدىك دەڭگەيدەگى جەتەكشى ۋنيۆەرسيتەت» اتتى جاڭا كىتاپتاردىڭ تانىستىرىلىمى ءۇش تىلدە وتەدى.
وسى فورۋم اياسىندا وتەتىن تاعى ءبىر اۋقىمدى ءىس-شارا – 2023 جىلعى QS باس رەيتينگىسىندە جوعارى ورىندارعا يە بولعان 14 قازاقستاندىق جوو-عا ەستەلىك بەلگىلەرىن تابىستاۋ ءراسىمى. سىيلىقتى QS ورتالىق ازيا جانە شىعىس ەۋروپا بويىنشا ايماقتىق ديرەكتورى حريستوليۋبوۆ سەرگەي ۆلاديميروۆيچ ءوزى تابىستاماق.