قۇقىقتىق ءتارتىپ اسكەرى ساقشىلارىمەن ەكسترەميزمنىڭ الدىن الۋ بويىنشا كەزدەسۋ ءوتتى
كەيىنگى جىلدارى حالىقارالىق تەرروريزم اۋقىمى، كەلتىرىلگەن زالالدارى مەن جيىلىگى ادامزاتتىڭ ەڭ وزەكتى ماسەلەسىنە اينالىپ وتىر. ونىڭ ىشىندە ءدىني ەكسترەميزمنىڭ ورنى بولەك. ءدىني ەكسترەميزم كوپ جاعدايدا ساياساتپەن بىرىگىپ، قوعامدى تۇراقسىزداندىرۋعا باعىتتالعان جانە ۇلتتىق قاۋىپسىزدىككە قاتەر توندىرەتىن قۇرال.
وسى ورايدا سىر ەلىندەگى ۇلتتىق ۇلاننىڭ 5547 اسكەري بولىمىندە جەكە قۇرامنىڭ وزگە ءدىني اعىمدارعا ەرىپ كەتپەۋى، تەرروريزم مەن ەكسترەميزمنىڭ قۇربانى بولۋدىڭ الدىن الۋ ماقساتىندا كەزدەسۋ ءوتتى. جيىنعا قىزىلوردا وبلىسىنىڭ ءدىن ىستەرى باسقارماسىنىڭ «ءدىن ماسەلەلەرىن زەرتتەۋ ورتالىعى» كمم-نىڭ اعا مامانى-تەولوگ باقتيار وسپان، قىزىلوردا وبلىستىق پوليسيا دەپارتامەنتى ەكسترەميزمگە قارسى ءىس-قيمىل باسقارماسىنىڭ اعا جەدەل ۋاكىلى پوليسيا مايورى امانگەلدى قۇلاحمەتوۆ جانە 5547 اسكەري ءبولىمىنىڭ اسكەري پوليسيا بولىمشەسىنىڭ باستىعى پودپولكوۆنيك قايتار يمانقۇلوۆ قاتىستى.
تەولوگ باقتيار ەسەنگەلدى ۇلى زايىرلى مەملەكەت، ءدىني ەكسترەميزم مەن تەرروريزم ۇعىمدارى، دەسترۋكتيۆتى ءدىني اعىمداردىڭ جانە عالامتور جەلىسى ارقىلى ءدىني ءبىلىم الۋدىڭ قاۋىپتىلىگى، سونداي-اق قازاقستان رەسپۋبليكاسىنىڭ اۋماعىندا سوت شەشىمى بويىنشا تىيىم سالىنعان ەكسترەميستىك، تەرروريستىك ۇيىمدار تۋرالى كەڭىنەن اقپارات بەردى. سونىمەن قاتار جات اعىمداردىڭ جەتەگىندە جۇرگەن ازاماتتاردىڭ قوعامعا ءقاۋىپ تۋدىراتىن تۇستارىنا توقتالىپ ءوتتى.
پوليسيا مايور امانگەلدى يزاتۋللا ۇلى مەن پودپولكوۆنيك قايتار يمانقۇلوۆ جەكە قۇراممەن اڭگىمەلەسۋ بارىسىندا ءدىني ەكسترەميزم مەن تەرروريزمگە قارسى ءىس-قيمىل نىساندارىن، الەۋمەتتىك جەلىلەردە ءدىني ەكسترەميزمنىڭ الدىن الۋ ادىستەرىن تىلگە تيەك ەتىپ، قۇقىقتىق ساۋاتتىلىققا ەرەكشە نازار اۋداردى. سونداي-اق جەكە قۇرامعا ەكسترەميستىك باعىتتاعى قۇقىق بۇزۋشىلىق جاساعانى ءۇشىن جاۋاپكەرشىلىك بارى ءتۇسىندىرىلدى.
كەزدەسۋ سوڭىندا جات اعىمنىڭ جەتەگىنە ەرىپ، ونىڭ قۇربانىنا اينالعان جاندار تۋرالى بەينەروليكتەر كورسەتىلدى.