ۋاقىتشا ماۋسىمدىق جۇمىسقا ورنالاستىرۋ جوباسى جۇزەگە اسادى.
2023 جىلدىڭ 27 مامىرىندا، الماتى قالاسى جاستار ساياساتى باسقارماسىنىڭ مەملەكەتتىك الەۋمەتتىك تاپسىرىسى اياسىندا جانە «Pro bono» قوعامدىق قورىنىڭ ۇيىمداستىرۋىمەن «JASYL EL» جاستار جوباسىنىڭ جازعى ماۋسىمىنىڭ سالتاناتتى اشىلۋى ءوتتى، دەپ حابارلايدى اlmaty-akshamy.kz.
«JASYL EL» ۋاقىتشا ماۋسىمدىق جۇمىسقا ورنالاسۋ جوباسىنىڭ ماقساتى - ستۋدەنتتەر مەن جۇمىسسىز جاستار اراسىنداعى جۇمىسسىزدىقتى ازايتۋ، سونداي-اق ەكولوگيالىق جانە پاتريوتتىق تاربيەنى ناسيحاتتاۋ جانە دوستىق قارىم-قاتىناستى نىعايتۋ بولدى.
ءىس-شارا بارلىق قاتىسۋشىلارعا ۇمىتىلماس اسەر قالدىرعان كەرەمەت كونسەرتتىك باعدارلامامەن باستالدى. 800-دەن استام «JASYL EL» ەڭبەك جاساعى، ەسترادا جۇلدىزدارى، سونىڭ ىشىندە Dake، Medet&Aqsultan، OCHOOOU، سونداي-اق قالا جاستارى مەن تانىمال بلوگەرلەر اشىلۋ سالتاناتىنا قاتىستى.
بيىل جوبا اياسىندا ماۋسىمدىق جۇمىسقا 14 پەن 35 جاس ارالىعىنداعى 2100 جاس ۋاقىتشا جۇمىسقا ورنالاستىرىلدى. بۇل ولارعا تاجىريبە مەن داعدىلاردى يگەرۋگە، سونداي-اق قوعامنىڭ دامۋىنا ۇلەس قوسۋعا مۇمكىندىك بەرەدى. سەنبىلىككە قاتىسۋشىلارعا قورشاعان ورتانى بىرلەسىپ تازا جانە جاقسى ۇستاۋ ءۇشىن قاپتار مەن قولعاپتار بەرىلدى.
«JASYL EL» جۇمىسقا ورنالاسۋعا مۇمكىندىك بەرىپ قانا قويماي، جاستاردى بەلسەندى بولۋعا، قورشاعان ورتاعا قامقورلىق جاساۋعا جانە قوعامدىق ومىرگە قاتىسۋعا شابىتتاندىردى.
وسى ماڭىزدى جوباعا قاتىسقانداردىڭ بارلىعىنا، اسىرەسە، ءوز مىندەتتەرىن ىنتامەن جانە جاۋاپكەرشىلىكپەن ورىنداعان قاتىسۋشىلارعا راحمەت. ءبىز بىرگە جاستارىمىز بەن قالامىز ءۇشىن جاقسى بولاشاق جاسايمىز.
«الەمدەگى جاھاندىق ەكولوگيالىق جاعداي كۇردەلەنە تۇسۋدە جانە قورشاعان ورتانى قورعاۋ ماسەلەسى وزەكتى بولىپ جاتىر. سوندىقتان جاستاردىڭ قورشاعان ورتاعا قامقورلىقپەن قاراۋى كوڭىل قۋانتادى»، - دەدى الماتى قالاسى جاستار ساياساتى باسقارماسىنىڭ جەتەكشىسى ق. مەڭدىعالييەۆ.
مەگاپوليس جاستارىنىڭ بەلسەندىلىگى مەن ەڭبەكقورلىعى جونىندە وي ايتىلدى. الماتى قالاسى جاستار ساياساتىن دامىتۋ مەملەكەتتىك قورىنىڭ ديرەكتورى جانار ارنايەۆا مالىمدەدى.
«بۇگىنگى تاڭدا قالا بويىنشا «JASYL EL» ماۋسىمدىق جۇمىسىنا نيەت ءبىلدىرۋشى جاستار قاتارى ارتىپ بارادى. ءداپ قازىرگى مالىمەت بويىنشا 2000 كولەمىندە جاستار بار. مۇنداي شارانىڭ ماقساتى شاھار تازالىعىنا بەي-جاي قاراماۋعا شاقىرۋ. الماتى اسەم قالا. سوندىقتان بۇنداي مەگاپوليستى جانداندىرۋ ءوز قولىمىزدا»، - دەدى ول.
ءىس-شارادا ءوز ەركىمەن قوسىلىپ، بەلسەندى جۇمىس اتقاراۋعا نيەتتىلەر كوپ بايقالدى. ولار ستۋدەنتتىك دەمالىس كەزىندە قالانىڭ گۇلدەنۋى ءۇشىن بەلسەندىلىك تانىتادى. مۇنى «JASYL EL» مۇشەسى ايتتى.
«ءبىز، جاستار، ءوز جاتاقحانامىزدا، وقۋ ورنىمىزدا، قالا بەردى، قالاعا سەنبىلىك جۇمىستارىن جاساپ تۇرامىز. بۇل ءىسىمىزدى تەك اكسيا رەتىندە قارامايمىز. قايتا قالا ءومىرىنىڭ تۇرعىندارعا قولايلى بولۋىنا ۇلەس دەپ تۇسىنەمىز. ءوزىم وتكەن جىلدان بەرى قاتىناسىپ كەلەمىن. كىشىگىرىم ۇلەس قوسقانىما ريزامىن»، - دەدى قازاق ۇلتتىق اگرارلىق ۋنيۆەرسيتەتىنىڭ 3 كۋرس ستۋدەنتى اسىلبەك گۇلنۇر.
