قالا كۇنى مەن قازاقستان رەسپۋبليكاسى تاۋەلسىزدىگىنىڭ 30 جىلدىعىن مەرەكەلەۋ اياسىندا الماتى قالاسىنىڭ كاسىپكەرلىك جانە ينۆەستيسيالار باسقارماسى مەگاپوليستىڭ جەتەكشى جوعارى وقۋ ورىندارىمەن بىرلەسىپ، بولاشاعى زور جاستارعا ارنالعان «Business Day Almaty» پراكتيكالىق سەمينارىن وتكىزدى.
ەكى كۇن بويى كەڭ اۋديتوريا الدىندا ءسوز سويلەۋدە باي تاجىريبەسى بار بيزنەس-ترەنەرلەر، كوۋچتەر جانە كاسىپكەرلەر ستۋدەنتتەرگە بيزنەس-ۇلگىلەردى قۇرۋداعى ەڭ سوڭعى ۇردىستەر تۋرالى ايتىپ بەردى. سمم-ستراتەگيانى قۇرۋدا جانە ماقساتتى اۋديتوريانى ايقىنداۋدا جۇمىس ىستەيتىن قۇرالدارمەن ءبولىستى. «Amazon، Ebay جانە Etsy» الەمدىك الاڭدارىندا ساتۋدىڭ نەگىزگى قاعيداتتارىن اتاپ ءوتتى، ءىسىن جاڭا باستاعان كاسىپكەرلەردىڭ نەگىزگى قاتەلىكتەرىن تالدادى، تىڭداۋشىلاردىڭ وزەكتى سۇراقتارىنا جاۋاپ بەردى.
«بۇگىندە قازاقستاندىق ءبىلىم مەن عىلىمنىڭ الدىندا اۋقىمدى مىندەتتەر تۇر. مەملەكەت باسشىسى جاقىندا قازاقستان حالقىنا ارناعان جولداۋىندا اتاپ وتكەندەي، قازىرگى جاستاردىڭ «جاڭا اعىمداردى ۇستانىپ قانا قويماي، ءبىر قادام الدا بولۋى، ترەندتەر قالىپتاستىرۋى ماڭىزدى». بۇل تۇرعىدا سىزدەردە، الدىڭعى بۋىندارعا قاراعاندا، الدەقايدا ۇلكەن ارتىقشىلىقتار بار. مىسالى، ءقازىردىڭ وزىندە ءسىز «بجك-2025» مەملەكەتتىك باعدارلاماسى اياسىندا بايقاۋعا قاتىسىپ، 2 ملن. تەڭگەدەن 5 ملن. تەڭگەگە دەيىن گرانت ۇتىپ الا الاسىز. قاتەلىكتەردەن قورىقپاڭىز! ءوسۋ ءۇشىن جاڭا مۇمكىندىكتەردى ىزدەڭىز، بايقاپ كورىڭىز جانە جاساڭىز، سوندا ءسىز مىندەتتى تۇردە تابىستى ۇرپاققا اينالاسىز»، – دەدى الماتى قالاسى كاسىپكەرلىك جانە ينۆەستيسيالار باسقارماسىنىڭ باسشىسى ەركەبۇلان ورازالين ءوزىنىڭ قۇتتىقتاۋ سوزىندە.
ونىڭ ايتۋىنشا، بيىل الماتىدا «بيزنەستىڭ جول كارتاسى – 2025» باعدارلاماسى بويىنشا 512،9 ملن. تەڭگەگە 162 جوبا، ونىڭ ىشىندە 186،4 ملن. تەڭگەگە يننوۆاسيالىق 56 جوبا گرانت العان.
الماتى قالاسى كاسىپكەرلىك جانە ينۆەستيسيالار باسقارماسى باسشىسىنىڭ ورىنباسارى قانات ساعىندىقوۆتىڭ ايتۋىنشا، «ALMATY Business-2025» كاسىپكەرلىكتى دامىتۋ وڭىرلىك باعدارلاماسىن جۇزەگە اسىرۋ اياسىندا «Qoldaý» كاسىپكەرلىك ورتالىعى كاسىپكەرلەر مەن بيزنەس باستاماسى بار تۇلعالار ءۇشىن ونلاين جانە وفلاين فورماتتاردا تەگىن وقىتۋ جۇرگىزەتىنىن اتاپ ءوتتى. ول ءۇشىن edu.qoldaý.kz ينتەراكتيۆتى وقىتۋ پلاتفورماسى قۇرىلدى. وندا تىركەۋدەن ءوتۋ كەزىندە كۋرستارعا («Qoldaý Start»، «Qoldaý Sۋstem» سالالىق كۋرستارىنا جانە «Qoldaý Profi» تەرەڭدەتىلگەن كۋرستارىنا)، سونداي-اق وقىتۋ بەينەروليكتەرىنە، ءتۇرلى بيزنەس-پروسەستەر بويىنشا داعدىلاردى پىسىقتاۋعا ارنالعان سيمۋلياسيالارعا، كوپتەگەن وقۋ ماتەريالدارىنا رۇقسات بەرىلەدى.
«بۇگىنگى تاڭدا «Qoldaý» كاسىپكەرلىك ورتالىعىندا 11 مىڭنان استام تىڭداۋشى ءبىلىم الدى. جاقىن ارادا ورتالىق «جاستار كاسىپكەرلىگى» اتتى جاڭا باعىتتى ىسكە قوسادى. ول وقىتۋدىڭ پراكتيكاعا باعىتتالعان سيپاتىنا يە. ونىڭ قورىتىندىسى بويىنشا، ستۋدەنتتەردە تولىققاندى بيزنەس-مودەل جانە بولاشاق ءونىمنىڭ ءپروتوتيپىن ءتۇسىنۋ قالىپتاسادى دەگەن سەنىم بار. سىزدەر كاسىپكەرلىكتى قولداۋدىڭ مەملەكەتتىك شارالارى، حالىقتى جۇمىسپەن قامتۋ ورتالىعىنىڭ باعدارلامالارى جانە بيزنەس-يدەيالارىڭىزدى ىسكە اسىرۋ مۇمكىندىكتەرى تۋرالى بىلە الاسىزدار»، – دەدى ق.ساعىندىقوۆ.