Zhas Project جوباسى اياسىندا ەل جاستارىنا 1 ميلليون تەڭگە كولەمىندە شاعىن گرانتتار بەرىلەدى. جوباعا قاتىسۋ ءۇشىن ءوتىنىم بەرۋ باستالدى.
Zhas Project جوباسىنا NEET ساناتىنداعى، ياعني، 18-34 جاس ارالىعىنداعى جۇمىسسىز جاستار قاتىسا الادى، دەپ حابارلايدى Almaty-akshamy.kz.
وتىنىشتەر 24 ءساۋىر ساعات 23:59-عا دەيىن قابىلدانادى. ءار ءوڭىر بويىنشا جوبانى باسقاراتىن جانە ءوتىنىش قابىلدايتىن ۇەۇ-مەن بايلانىس مالىمەتتەرى cisc.kz سايتىندا، Zhas Project بولىمشەسىندە كورسەتىلگەن. 25 ءساۋىر مەن 14 مامىر ارالىعىندا وتىنىمدەر ىرىكتەلىپ، 15 مامىردا كونكۋرس ناتيجەسى جاريالانادى.
جاستاردى قولداۋدى ماقسات ەتكەن جوبا ەلدىڭ 20 ءوڭىرىن قامتيدى.
گرانتتى يەلەنگەننەن كەيىنگى باستى تالاپ - جوبانى 4 ايدا جۇزەگە اسىرۋ. تاجىريبەسى تولىسپاعان جاستاردىڭ قاناتقاقتى جوبالارى جەمىستى بولۋ ءۇشىن ءار وڭىردە قولداۋ ورتالىعى جۇمىس ىستەيدى. ورتالىققا جۇگىنگەن جاس كاسىپكەر كوكەيىندەگى الەۋمەتتىك، ەكونوميكالىق، قۇقىقتىق ساۋالدارىنا كاسىبي مامانداردان جاۋاپ، كەڭەس الا الادى.
بيىل 280 جوبانى قولداۋ جوسپارلانىپ وتىر.