مالايزيانىڭ كۋچينگ قالاسىندا تەننيستەن الەم چەمپيوناتى ءوتىپ جاتىر.
مالايزيانىڭ كۋچينگ قالاسىندا 14 جاسقا دەيىنگىلەر اراسىندا تەننيستەن كوماندالىق الەم چەمپيوناتى ازيا – تىنىق مۇحيت ايماعى بويىنشا ىرىكتەۋ كەزەڭىنىڭ جارتىلاي فيناليستەرى انىقتالدى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
قازاقستان تەننيس فەدەراسياسىنان ءمالىم ەتكەنىندەي، ءمادينا راحىمنىڭ شاكىرتتەرى شيرەك فينالدا ىرىكتەۋ ءتۋرنيرىنىڭ ەكىنشى راكەتكاسى – ءۇندىستان كومانداسىن ۇتتى.
الدىمەن ەۆا كورىشيەۆا قارسىلاسىن 6:1، 6:1 ەسەبىمەن ويسىراتا جەڭدى. سودان كەيىن ەركەجان جاڭاتايەۆا دا قالىسپادى – 6:4، 6:7، 6:2.
قازاقستان جاسوسپىرىمدەر قۇراماسى 24 ناۋرىز كۇنى جارتىلاي فينالدا جاپونيامەن وينايدى. جاپونيالىقتار شيرەك فينالدا تايلاند كومانداسىنان باسىم ءتۇستى.
بيىل ازيا – تىنىق مۇحيت ايماعىنان كوماندالىق الەم چەمپيوناتىنىڭ فينالدىق ساتىسىنا ءۇش جولداما بەرىلەدى. فينالدىق كەزەڭ جازدا چەحيانىڭ پروستەيەۆ قالاسىندا وتەدى.