«باس رەداكتورلار كلۋبى» مەن SDU University قۇقىق جانە الەۋمەتتىك عىلىمدار فاكۋلتەتىنىڭ «جۋرناليستيكا» مەكتەبىنىڭ بىرلەسە ۇيىمداستىرۋىمەن «جاساندى ينتەللەكت جانە قازاق مەدياسىنىڭ ترانسفورماسياسى» اتتى دوڭگەلەك ۇستەل ءوتتى. جيىندا جاساندى ينتەللەكتىنىڭ قازاق مەديا كەڭىستىگىنە ىقپالى، جۋرناليستيكانىڭ جاڭا فورماتتارى مەن اقپاراتتىق قاۋىپسىزدىك ماسەلەلەرى تالقىلاندى.
ق ر پارلامەنتى سەناتىنىڭ دەپۋتاتى، «باس رەداكتورلار كلۋبى» قب پرەزيدەنتى بيبىگۇل جەكسەنباي جاساندى ينتەللەكتتىڭ قازاق جۋرناليستيكاسىنا اكەلەتىن مۇمكىندىكتەرى مەن قاۋىپتەرىنە توقتالدى.
“تەحنولوگيالىق ريەۆوليۋسيانىڭ وڭ دا، تەرىس تە اسەرى بار ەكەنىن ەستە ۇستاپ، وعان دايىن بولۋ كەرەك. جاساندى ينتەللەكت ۋاقىت ۇنەمدەپ، جۇمىستى جەڭىلدەتكەنىمەن قاتار، اۆتورلىق حۇقىق، جالعان اقپارات، اقپاراتتىق قاۋىپسىزدىك جاعىنان دا قاتەرلەر تۋعىزۋى مۇمكىن. سوندىقتان زاڭنامالىق رەتتەۋ دە بولۋى كەرەك. بيىل جىلى پارلامەنتتە جاساندى ينتەللەكت جونىندەگى ارنايى زاڭ جوباسىن قاراۋ جوسپاردا بار”،-دەدى ول. سەناتوردىڭ ايتۋىنشا، جي وڭىرلىك جۋرناليستيكا، باسىلىمداردى جاڭا دەڭگەيگە كوتەرۋ مۇمكىندىگى زور.
ءوز كەزەگىندە دوڭگەلەك ۇستەلگە قاتىسقان ۋنيۆەرسيتەت رەكتورى ءالىمجان يگەنبايەۆ تا جاڭا تەحنولوگيانىڭ مۇمكىندىگىن اتاپ ءوتتى. سونداي-اق "پرەزيدەنت جانە حالىق" گازەتىنىڭ باس رەداكتورى مارات توقاشبايەۆ، «باس رەداكتورلار كلۋبى» قب ۆيسە-پرەزيدەنتى نۇربول تولەبايەۆ، مەدايساراپشى ءارى وقىتۋشى ەسەنگۇل كاپ قىزى، Qaz365 سايتىنىڭ باس رەداكتورى باۋىرجان كاريپوۆ جاساندى ينتەللەكتتىڭ دامۋ بارىسى مەن اسىرە تۋرالى ءسوز قوزعادى.
«جاساندى ينتەللەكت – بۇگىنگى جۋرناليستيكانىڭ اجىراماس بولىگىنە اينالۋدا. بۇل تەحنولوگيانىڭ مۇمكىندىكتەرىن دۇرىس پايدالانا ءبىلۋ كاسىبي جۋرناليستيكانىڭ دامۋىنا جاڭا سەرپىن بەرەدى»، – دەدى «Alatau Aqparat» مەدياحولدينگىنىڭ باس ديرەكتورى ەرجان قالىمباي ۇلى ەكى جىلدان بەرى كونتەنت ءوندىرۋ ۇدەرىسىندە جاساندى ينتەللەكتى پايدالانۋ تاجىريبەسىن ءبولىستى.
فورۋمدا جاساندى ينتەللەكتتىڭ قازاق مەديا كەڭىستىگىنە ىقپالى، ونىڭ جۋرناليستيكاداعى جاڭا مۇمكىندىكتەرى جان-جاقتى تالقىلاندى. سيفرلىق مەدياداعى ترەندتەر مەن اقپاراتتىق قاۋىپسىزدىك ماسەلەلەرى دە نازاردان تىس قالمادى. سپيكەرلەر جاساندى ينتەللەكتتىڭ جۋرناليستيكاعا اكەلگەن وزگەرىستەرىن، كونتەنت وندىرىسىندەگى اۆتوماتتاندىرۋ مەن مەديانىڭ بولاشاق فورماتتارىن ءسوز ەتتى.
ءوز كەزەگىندە جۋرناليستيكا ماماندىعىندا ءبىلىم الىپ جاتقان ستۋدەنتتەر جاساندى ينتەللەكت كومەگىمەن ازىرلەنگەن جوبالارىن كورسەتتى. الداعى ۋاقىتتا جاساندى ينتەللەكت «جۋرناليستيكا» مەكبەتىندە ارنايى ءپان رەتىندە وقۋ جۇيەسىنە ەنگىزىلمەك.
سونىمەن قاتار، ستۋدەنتتەر مەن مەديا ماماندارى اراسىندا اشىق پىكىرتالاس ءوتىپ، جاس جۋرناليستەر وزدەرىن قىزىقتىرعان سۇراقتارىن قويدى. اقپاراتتىق مانيپۋلياسيا، فاكچەكينگ، ەتيكا جانە جاساندى ينتەللەكتتىڭ مەدياداعى ورنى سياقتى تاقىرىپتار تالقىلانىپ، ساراپشىلار ءوز تاجىريبەلەرىمەن ءبولىستى.
فورۋم قورىتىندىسى بويىنشا قاتىسۋشىلار جاساندى ينتەللەكتتىڭ قازاق مەدياسىنىڭ دامۋىنا ىقپالى ۇلكەن ەكەنىن، ءبىراق ونى ءتيىمدى ءارى جاۋاپكەرشىلىكپەن پايدالانۋ قاجەت ەكەنىن اتاپ ءوتتى. بۇل جيىن مەديا سالاسىنداعى ماماندار مەن جاس جۋرناليستەر اراسىنداعى ديالوگتىڭ ماڭىزدى ەكەنىن جانە وسىنداي كەزدەسۋلەردىڭ سالا دامۋىنا ىقپال ەتەتىنىن كورسەتتى.
ءىس-شارا ستۋدەنتتەرگە تاجىريبەلى جۋرناليستەردەن ۇيرەنۋگە، مەديا سالاسىنداعى جاڭا تەحنولوگيالاردى زەرتتەۋگە جانە بولاشاقتاعى كاسىبي باعىتتارىن انىقتاۋعا مۇمكىندىك بەردى.