ەگەمەندىگىمىزدىڭ ماڭگىلىك ءۇشتاعانى – التايدان اتىراۋعا، الاتاۋدان ارقاعا دەيىن كەڭ كوسىلگەن بايتاق جەرىمىز، انانىڭ اق سۇتىمەن بويىمىزعا دارىعان قاستەرلى ءتىلىمىز جانە بارلىق قيىندىقتاردان حالقىمىزدى سۇرىندىرمەي الىپ كەلە جاتقان بەرەكە-بىرلىگىمىز. ءبىز وسى ءۇش قۇندىلىقتى كوزدىڭ قاراشىعىنداي ساقتايمىز.
قاسىم-جومارت توقايەۆ.
قازاقستان رەسپۋبليكاسىنىڭ 50 حالىقارالىق باستامالارىنان
2011 جىلعى باستامالار:
- مامىر: «G-GLOBAL» جوباسى – جاھاندىق اقپاراتتىق-كوممۋنيكاسيالىق الاڭ؛
- شىلدە: قر-نىڭ ماگاتە-گە قازاقستان اۋماعىندا حالىقارالىق از بايىتىلعان ۋران بانكىن ورنالاستىرۋعا رەسمي تاپسىرىسى بەرىلدى؛
- قىركۇيەك: جالپىعا ورتاق يادرولىق قارۋسىز الەم دەكلاراسياسىن ازىرلەۋ تۋرالى ۇسىنىس. – ەلباسى ن.ءا. نازاربايەۆتىڭ بۇۇ باس اسسامبلەياسىنىڭ 66-شى سەسسياسىندا سويلەگەن ءسوزى؛
- قازان: «جاسىل كوپىر» سەرىكتەستىك باعدارلاماسى – بۇۇ باس اسسامبلەياسىنىڭ 66-شى سەسسياسىنداعى ق ر باستاماسى.
2011 جىل – ەل تاۋەلسىزدىگىنىڭ 20 جىلدىعىمەن سيپاتتالادى. جىل «بەيبىتشىلىك مەن جاسامپازدىقتىڭ 20 جىلى» ۇرانى اياسىندا ءوتتى. 2010 جىلدىڭ جەلتوقسان ايىنداعى شىعىس قازاقستان وڭىرىندەگى باستاماشىل توپتىڭ مەملەكەت باسشىسىنىڭ وكىلەتتىگىن ۇزارتۋ جونىندە رەفەرەندۋم وتكىزۋ تۋرالى باستاماسى 2011 جىلى قىزۋ جالعاسىن تاپتى. قازاقستاندىقتار جەر-جەردە بۇل يدەياعا جاپپاي قولداۋ ءبىلدىرىپ جاتتى، بار-جوعى ءبىر اي مەرزىمدە ەلىمىزدەگى سايلاۋشىلاردىڭ جالپى سانىنىڭ جارتىسىنان استامى – بەس ميلليوننان اسا ادام بۇل ۇسىنىستى جاقتاپ داۋىس بەردى. پارلامەنت دەپۋتاتتارى دا ءوز سايلاۋشىلارىنىڭ اماناتىن قۇپ الدى، ازاماتتاردىڭ تالاپ-تىلەگىن زاڭنامالىق تۇرعىدا راسىمدەدى. مەملەكەت باسشىسى بۇل ۇسىنىستان باس تارتاتىنىن مالىمدەدى. الايدا، 14 قاڭتار كۇنى پارلامەنت، نۇرسۇلتان نازاربايەۆتىڭ كەلىسىمىنسىز، كونستيتۋسياعا رەفەرەندۋم ارقىلى پرەزيدەنت وكىلەتتىگىن 2020 جىلعا دەيىن ۇزارتۋدى كوزدەيتىن تۇزەتۋلەر ەنگىزۋ شەشىمىن ءبىراۋىزدان قابىلداپ جىبەردى. مەملەكەت باسشىسى بۇل تۇزەتۋلەرگە قول قويماعانىن ايتقان ءجون. ناتيجەسىندە تۇپكىلىكتى مامىلەگە كەلۋ ءۇشىن شەشىم قازاقستان رەسپۋبليكاسى كونستيتۋسيالىق كەڭەسىنىڭ قاراۋىنا جىبەرىلدى. وسى تاعدىرشەشتى ءسات تۋرالى نۇرسۇلتان نازاربايەۆ جىلدار وتە كەلە بىلايشا ەسكە الادى: « ...مامىلە – سايلاۋ وتكىزۋ. رەفەرەندۋم وتكىزۋگە بايلانىستى قول جيناۋعا قاتىسقانداردىڭ بارىنە العىسىم مەن قۇرمەتىمدى بىلدىرە وتىرىپ، مەن سوندا دا بولسا سايلاۋعا قاتىسۋدى قۇپ كورەتىنىمدى، ءبىراق تۇپكىلىكتى شەشىمدى كونستيتۋسيالىق كەڭەستىڭ تۇجىرىمىنان كەيىن قابىلدايتىنىمدى ايتتىم. ەڭ باستىسى، مەن سول ساتتە حالىقتىڭ تىلەگىن ۇقتىم، «قىزمەتتى تاستاپ كەتپەيمىن، جۇمىستى ءارى قاراي جالعاستىرامىن» دەپ شەشتىم. ءسويتىپ، حالىقتىڭ مۇنداي ءبىراۋىزدىلىعى ساقتالعان جاعدايدا، ەل ءۇشىن قانشا قاجەت بولسا، سونشا ۋاقىت جان اياماي ەڭبەك ەتۋگە بەل بايلادىم. 31 قاڭتاردا كونستيتۋسيالىق كەڭەس تۇزەتۋلەردى كونستيتۋسياعا قايشى كەلەدى دەپ تاپتى. كونستيتۋسيالىق كەڭەستىڭ تۇجىرىمىنا جانە ناقتى ساياسي احۋالعا سۇيەنە وتىرىپ، مەن حالىققا ارناعان سوزىمدە مەرزىمىنەن بۇرىن پرەزيدەنتتىك سايلاۋ وتكىزۋدى ۇسىندىم. كەزەكتەن تىس سايلاۋدى 2011 جىلدىڭ 3 ساۋىرىنە بەلگىلەگەن جارلىققا 4 اقپان كۇنى قول قويدىم. سايلاۋ بارىسىندا مەنىڭ باسەكەلەستەرىم – قازاقستان پاتريوتتارى پارتياسىنىڭ ءتوراعاسى ع. قاسىموۆ، قازاقستاننىڭ كوممۋنيستىك حالىقتىق پارتياسى وك حاتشىسى ج. احمەتبەكوۆ جانە «تابيعات» ەكولوگيالىق ۇيىمىنىڭ كوشباسشىسى م.ەلەۋسىزوۆ بولدى. 2011 جىلدىڭ 3 ساۋىرىندە وتكەن پرەزيدەنت سايلاۋىندا سايلاۋشىلاردىڭ 95،55 پروسەنتى مەنىڭ كانديداتۋرامدى قولداپ داۋىس بەردى. ورتالىق سايلاۋ كوميسسياسىنىڭ مالىمەتى بويىنشا، داۋىس بەرۋگە سايلاۋشىلاردىڭ 89،98 پروسەنتى قاتىسقان. تاۋەلسىزدىك ءداۋىرىنىڭ تاريحىندا تۇڭعىش رەت قول جەتكىزىلگەن وسىنداي ايقىن باسىمدىقتى مەن وتانداستارىمنىڭ وزىمە جۇك- تەگەن قوسىمشا جاۋاپكەرشىلىگى دەپ قابىلدادىم».
تاۋەلسىزدىگىمىزدىڭ جيىرماسىنشى جىلىندا، 30 قاڭتار مەن 6 اقپان ارالىعىندا قازاقستاندا وتكەن VII قىسقى ازيا ويىندارى تاريحقا ايشىقتى وقيعا رەتىندە ەندى. وعان 27 ەلدەن كەلگەن 1 مىڭنان استام سپورتشى قاتىستى. قۇرلىقتىق جارىستا قازاقستان 32 التىن، 21 كۇمىس، 17 قولا مەدالدى ولجالاپ، كوماندالىق ەسەپتە ءبىرىنشى ورىندى ەنشىلەدى.
بۇل جىلدىڭ ەستە قالعان وقيعالارىن تىزبەلەسەك، اقپان ايىندا پرەزيدەنت جۇڭگو حالىق رەسپۋبليكاسىنا رەسمي ساپارمەن باردى، ەلىمىزدە قابىلدانعان «عىلىم تۋرالى» زاڭ وزىق عىلىمي جەتىستىكتەر ءۇشىن جاڭا مۇمكىندىكتەر اشتى. مامىر ايىندا ءدىن ىستەرى جونىندەگى اگەنتتىكتىڭ قۇرىلۋى مۋلتيكونفەسسيالىق قازاق ەلى ءۇشىن ماڭىزدى قادام بولدى.ال، قازان ايىندا «ءدىني قىزمەت جانە ءدىني بىرلەستىكتەر تۋرالى» زاڭ قابىلداندى. ماۋسىم ايىنداعى قحر ءتوراعاسى حۋ سزينتاونىڭ قازاقستانعا رەسمي ساپارى ناتيجەسىندە ەكى ەل اراسىنداعى جان-جاقتى ستراتەگيالىق ارىپتەستىك تۋرالى بىرلەسكەن دەكلاراسياعا قول قويىلدى.
2011 جىلدىڭ تاعى ءبىر جاڭالىعى –قازاقستان، رەسەي جانە بەلورۋسسيا ەلدەرىنىڭ اراسىندا كەدەندىك وداق پايدا بولدى. تاراپتار كەلەر جىلى ەۋرازيالىق ەكونوميكالىق كەڭىستىكتى قۇرۋ جايلى كەلىسىمگە كەلدى. الماتى قالاسىندا 1 جەلتوقسان كۇنى مەتروپوليتەن پايدالانۋعا بەرىلدى. ال، 14 جەلتوقسان كۇنى پارلامەنت سەناتىنىڭ سالتاناتتى جاعدايدا وتكەن جيىنىندا پرەزيدەنتكە قازاقستان رەسپۋبليكاسى تاۋەلسىزدىگىنىڭ 20 جىلدىعىنا ارنالعان توسبەلگى تابىس ەتىلدى. ەلىمىزدە تاعى ءبىر مەرەكە پايدا بولدى. الداعى جىلدان باستاپ 1 جەلتوقسان –تۇڭعىش پرەزيدەنت كۇنى دەپ بەلگىلەندى.
2011 جىلدىڭ باستى وقيعالارى
- نۇرسۇلتان نازاربايەۆتىڭ قازاقستان حالقىنا جولداۋى
- ق ر پرەزيدەنتىنىڭ وكىلەتتىگىن ۇزارتۋ جونىندەگى رەسپۋبليكالىق رەفەرەندۋم.
- ق ر پرەزيدەنتىنىڭ سايلاۋى.نۇرسۇلتان نازاربايەۆتىڭ جەڭىسى.
- ق ر تاۋەلسىزدىگىنە – 20 جىل!
- دۇنيەجۇزى قازاقتارىنىڭ ءىV قۇرىلتايى.
جىل ۇرانى: «بەيبىتشىلىك مەن جاسامپازدىقتىڭ 20 جىلى»
18 قاڭتار
نۇرسۇلتان نازاربايەۆ DVB –S2 ستاندارتىنداعى وتاندىق سپۋتنيكتىك تەلەراديو حابارلارىن تاراتۋ جەلىسىنىڭ سالتاناتتى اشىلۋىنا قاتىسىپ، وتاندىق تەلەارنالاردىڭ كورسەتىلىمىن ىسكە قوستى.
27 قاڭتار
2011 جىلدى قازاقستان رەسپۋبليكاسى تاۋەلسىزدىگىنىڭ 20 جىلدىعى جىلى دەپ جاريالاۋ تۋرالى پرەزيدەنت جارلىعى (№ 1144) جاريالاندى. جارلىققا سايكەس، 2011 جىل – قازاقستان رەسپۋبليكاسى تاۋەلسىزدىگىنىڭ 20 جىلدىعى جىلى دەپ جاريالاندى. جىل ۇرانى – «بەيبىتشىلىك مەن جاسامپازدىقتىڭ 20 جىلى» بولىپ بەلگىلەندى. مەرەيتويدى مەرەكەلەۋدىڭ تۇجىرىمداماسى بەكىتىلدى.
28 قاڭتار
مەملەكەت باسشىسى قازاقستان رەسپۋبليكاسى پارلامەنتى پالاتالارىنىڭ بىرلەسكەن وتىرىسىندا ءوزىنىڭ « بولاشاقتى بىرگە قالايمىز!» اتتى قازاقستان حالقىنا ءداستۇرلى جولداۋىن جاريا ەتتى.
30 قاڭتار
2010 جىلدىڭ 31 جەلتوقسانى – 2011 جىلدىڭ 7 قاڭتارى ارالىعىندا نۇر-سۇلتان مەن الماتى قالالارىندا VII قىسقى ازيا ويىندارى ءوتتى. ازيادادا قازاقستاندىقتار 70 مەدال، ونىڭ ىشىندە 32-التىن، 21-كۇمىس، 17-قولا مەدالداردى يەلەنىپ، قىسقى ازيادا ويىندارىنىڭ تاريحىندا جاڭا رەكورد ورناتتى.
4 اقپان
«قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن تاعايىنداۋ تۋرالى» پرەزيدەنت جارلىعى جاريالاندى. 11 اقپاندا نۇرسۇلتان نازاربايەۆ قازاقستان رەسپۋبليكاسى پرەزيدەنتتىگىنە ۇمىتكەر بولىپ ۇسىنىلدى.
21-22 اقپان
مەملەكەت باسشىسى جۇڭگو حالىق رەسپۋبليكاسىنا مەملەكەتتىك ساپارمەن باردى. نۇرسۇلتان نازاربايەۆ پەن قحر ءتوراعاسى حۋ سزينتاونىڭ كەزدەسۋىندە ءبىرقاتار ماڭىزدى قۇجاتتارعا قول قويىلدى.
5 ناۋرىز
نۇر-سۇلتانداعى تاۋەلسىزدىك سارايىندا قازاقستان رەسپۋبليكاسى تاۋەلسىزدىگىنىڭ 20 جىلدىعى اياسىندا قازاقستان ايەلدەرىنىڭ سەزى ءوتتى. وعان ەلباسى قاتىسىپ، ءسوز سويلەدى.
17 ناۋرىز
قازاقستان پرەزيدەنتى جۇمىس ساپارىمەن رەسەي فەدەراسياسىنا باردى. ساپار بارىسىندا ەلباسى رەسەي پرەزيدەنتى دميتريي مەدۆەديەۆپەن كەلىسسوز جۇرگىزدى.
1 ءساۋىر
نۇرسۇلتان نازاربايەۆ ەقىۇ پارلامەنتتىك اسسامبلەياسىنىڭ باس حاتشىسى روبەرت سپەنسەر وليۆەر مەن پارلامەنتتىك اسسامبلەيا دەلەگاسياسىنىڭ باسشىسى، ەقىۇ-نىڭ قىسقا مەرزىمدى بايقاۋشىلارىنىڭ ارنايى ۇيلەستىرۋشىسى تونينو پيسۋلانى قابىلدادى.
3 ءساۋىر
قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى ءوتىپ، ونىڭ قورىتىندىسى بويىنشا داۋىس بەرۋگە قاتىسقان سايلاۋشىلاردىڭ 95،55 پايىز داۋىسىن يەلەنگەن نۇرسۇلتان نازاربايەۆ جەڭىسكە جەتتى. 4-ساۋىردە «قازاقستان» سپورت كەشەنىندە 5000 ادام قاتىسقان «كوشباسشىمەن بىرگە العا!» اتتى جەڭىمپازدار فورۋمى ءوتتى. 8-ساۋىردە استاناداعى تاۋەلسىزدىك سارايىندا پرەزيدەنتتىڭ ءوز قىزمەتىنە رەسمي كىرىسۋىنە ارنالعان ۇلىقتاۋ ءراسىمى بولدى. سالتاناتتى راسىمدە نۇرسۇلتان نازاربايەۆ اتا زاڭىمىزدىڭ 42-بابىنا سايكەس: «قازاقستان حالقىنا ادال قىزمەت ەتۋگە، قازاقستان رەسپۋبليكاسىنىڭ كونستيتۋسياسى مەن زاڭدارىن قاتال ساقتاۋعا، ازاماتتاردىڭ قۇقىقتارى مەن بوستاندىقتارىنا كەپىلدىك بەرۋگە، قازاقستان رەسپۋبليكاسى پرەزيدەنتىنىڭ وزىمە جۇكتەلگەن مارتەبەلى مىندەتىن ادال اتقارۋعا سالتاناتتى تۇردە انت ەتەمىن!» دەپ قازاقستان حالقىنا انت بەردى.
18 ءساۋىر
19 ءساۋىر
كييەۆتە چەرنوبىل اەس-ىندەگى اپاتقا 25 جىل تولۋىنا بايلانىستى اتوم قۋاتىن ءقاۋىپسىز جانە يننوۆاسيالىق ماقساتتا پايدالانۋ ماسەلەلەرىنە ارنالعان سامميت ءوتتى. ونىڭ جۇمىسىنا قاتىسقان نۇرسۇلتان نازاربايەۆ سامميت اياسىندا بۇۇ باس حاتشىسى پان گي مۋنمەن، ەۋروپا كوميسسياسىنىڭ پرەزيدەنتى جوزە بارروزۋمەن،ۋكراينا پرەزيدەنتى ۆيكتور يانۋكوۆيچپەن كەزدەستى.
3 مامىر
ەلورداداعى تاۋەلسىزدىك سارايىندا «جاڭا ونجىلدىق: بولاشاقتار مەن تالاپتار» تاقىرىبىمەن IV استانا ەكونوميكالىق فورۋمى اشىلدى. وعان دۇنيە ءجۇزىنىڭ 80 ەلىنەن ءۇش مىڭنان استام دەلەگات،ولاردىڭ ىشىندە نوبەل سىيلىعىنىڭ التى لاۋرەاتى قاتىستى.
18 مامىر
نۇر-سۇلتاندا ەلباسىنىڭ توراعالىعىمەن «قازاقستاندىق كاسىپورىنداردى جاڭعىرتۋ جانە جاڭارتۋ» تاقىرىبىندا ق ر پرەزيدەنتى جانىنداعى شەتەل ينۆەستورلارى كەڭەسىنىڭ 24ء-شى پلەنارلىق باسقوسۋى ءوتتى.
25 مامىر
ەلورداداعى تاۋەلسىزدىك سارايىندا مەملەكەت باسشىسىنىڭ قاتىسۋىمەن دۇنيە ءجۇزى قازاقتارىنىڭ ءىV قۇرىلتايىنىڭ سالتاناتتى اشىلۋى بولدى. القالى جيىندا نۇرسۇلتان نازاربايەۆ «قازاقستان – دۇنيەدەگى ءار قازاقتىڭ قاستەرلى قۇبىلىسى» تاقىرىبىندا ءسوز سويلەدى.
8 ماۋسىم
ەلباسى نۇرسۇلتان نازاربايەۆتىڭ قاتىسۋىمەن نۇر-سۇلتاندا VII بۇكىلالەمدىك يسلام ەكونوميكالىق فورۋمىنىڭ سالتاناتتى اشىلۋ ءراسىمى بولدى. فورۋمعا يسلام الەمىنىڭ ەلۋگە جۋىق ەلىنەن دەلەگاتتار كەلدى، يسلام حالىقارالىق ۇيىمدارىنىڭ كورنەكتى وكىلدەرى، ساياسي جانە قوعام قايراتكەرلەرى، بەلگىلى عالىمدار مەن ساراپشىلار، ءىرى كاسىپكەرلەر قاتىستى.
13 ماۋسىم
مەملەكەت باسشىسى قازاقستانعا مەملەكەتتىك ساپارمەن كەلگەن جۇڭگو حالىق رەسپۋبليكاسىنىڭ ءتوراعاسى حۋ سزينتاونى قابىلدادى. قازاقستان مەن جۇڭگو مەملەكەتتەرى ىنتىماقتاستىعىنىڭ وزەكتى ماسەلەلەرى جونىندە پىكىر الماسىلدى. بۇل جۇڭگو باسشىسىنىڭ قازاقستانعا جاساعان 7ء-شى ساپارى بولسا، ەكىجاقتى 25ء-شى باسقوسۋ ەدى.
15 ماۋسىم
استاناداعى تاۋەلسىزدىك سارايىندا شانحاي ىنتىماقتاستىق ۇيىمىنا مۇشە مەملەكەت باسشىلارى كەڭەسىنىڭ باسقوسۋى ءوتتى.ۇيىمنىڭ ون جىلدىق مەرەيتويىنا ارنالعان سامميتتە وتكەن ون جىل ىشىندەگى شىۇ قىزمەتىنە تالداۋ جاسالدى جانە دامۋ پەرسپەكتيۆالارى ايقىندالدى. وسى كەزدەسۋدە نۇرسۇلتان نازاربايەۆ ءتوراعا رەتىندە، ارىپتەستەرىنە بەيبىتشىلىكتى دامىتۋدىڭ نەگىزگى باعىتتارىنا ساي ءارى ۇيىمنىڭ بىرنەشە قۇرىلىمىن اشۋدى قاراستىراتىن «شىۇ-نىڭ مەيىرىمدى بەس ءىسى» دەپ اتالاتىن بەس وڭتايلى ماقسات ۇسىندى. ولار – قاقتىعىستاردى رەتتەۋ كەڭەسى (وڭىردەگى قاۋىپسىزدىكتى قامتاماسىز ەتۋ ءۇشىن)، قۇرىلىمدىق ىقپالداستىق جونىندەگى كوميتەت (قۇبىرلار جۇيەسى مەن ەلەكتر جەلىلەرى بويىنشا)، سۋ جانە ازىق-تۇلىك كوميتەتى، توتەنشە جاعدايلار بويىنشا كەڭەس، شىۇ بولجام جاساۋ ورتالىعى. شىۇ قىزمەتىن كۇشەيتۋدەگى قازاقستاننىڭ ماڭىزدى باستامالارىن كەزدەسۋگە قاتىسۋشىلار زور ىقىلاسپەن جانە قىزىعۋشىلىقپەن قابىلدادى.
28–30 ماۋسىم
نۇر-سۇلتاندا يسلام كونفەرەنسياسى ۇيىمى سىرتقى ىستەر مينيسترلەر كەڭەسىنىڭ 38-سەسسياسى ءوتتى. وعان مۇشە-مەملەكەتتەر «ىنتىماقتاستىق» ۇعىمى ۇيىمنىڭ الداعى ۋاقىتتاعى اتقاراتىن جۇمىستارىمەن كوبىرەك سايكەسەتىندىگى تۋرالى قازاقستاننىڭ پىكىرىنە قۇلاق استى. وسىلايشا، قازاق ەلىندە يسلام الەمىنىڭ باستى قۇرىلىمى ءوزىنىڭ قازىرگى – يسلام ىنتىماقتاستىعى ۇيىمى (يىۇ) اتاۋىن يەلەندى. قازاقستاننىڭ 2011–2012 جىلدارى يىۇ-عا ءتوراعالىعى – ۇيىم تاريحىنداعى جاھاندىق وركەنيەتتى جانە ءدىنارالىق ديالوگتا قازاقستان ءرولىنىڭ ماڭىزدىلىعىن تانىتقان كەزەڭ.
2 تامىز
مەملەكەت باسشىسى الماتىدا قۇرىلىسى ءجۇرىپ جاتقان مەترو نىسانىن ارالادى. ىسكە قوسۋ شاراسىنا قاتىسقان پرەزيدەنت «اباي» جانە «جىبەك جولى» ستانسالارى ارالىعىنداعى باعىتتى ءجۇرىپ ءوتتى، مەترو قىزمەتىنىڭ ساپاسى مەن ازاماتتاردىڭ قاۋىپسىزدىگى ماسەلەلەرىنە ايىرىقشا كوڭىل ءبولۋ قاجەتتىگىن تاپسىردى.
12 تامىز
ۇجىمدىق قاۋىپسىزدىك تۋرالى شارت ۇيىمىنا مۇشە مەملەكەتتەر باسشىلارى ەلوردادا بەيرەسمي جاعدايدا باس قوستى. القالى باسقوسۋعا قازاقستان پرەزيدەنتى نۇرسۇلتان نازاربايەۆ، رەسەي پرەزيدەنتى دميتريي مەدۆەديەۆ، بەلارۋس پرەزيدەنتى الەكساندر لۋكاشەنكو، قىرعىزستان پرەزيدەنتى روزا وتۋنبايەۆا، تاجىكستان پرەزيدەنتى ەمومالي راحمون، ارمەنيا پرەزيدەنتى سەرج سارگيسيان قاتىستى.
30 تامىز
قازاقستان رەسپۋبليكاسىنىڭ 20 جىلدىعى مەن كونستيتۋسيا كۇنىنە وراي استاناداعى «قازاق ەلى» مونۋمەنتى الدىندا ەلباسى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆتىڭ قاتىسۋىمەن اسكەري شەرۋ بولدى.
22 قىركۇيەك
بۇۇ باس اسسامبلەياسىنىڭ 66-سەسسياسى ءوتتى. وسى ساپارى بارىسىندا مەملەكەت باسشىسى جالپى پىكىرتالاسقا جانە يادرولىق قاۋىپسىزدىك جونىندەگى جوعارى دەڭگەيدەگى كەزدەسۋگە قاتىستى. سەسسيانىڭ كۇن تارتىبىندە قارالعان ماسەلەلەر: مەملەكەتارالىق قاتىناستاردىڭ قۇقىقتىق نەگىزدەرىن نىعايتۋ، ايماقتىق قاقتىعىستاردى رەتتەۋ، جاپپاي قىرىپ-جوياتىن قارۋدى تاراتپاۋ، جاڭا قاۋىپ-قاتەرلەرگە قارسى تۇرۋ، جاھاندىق باسقارۋ جۇيەسىن رەفورمالاۋ، تۇراقتى دامۋدى قامتاماسىز ەتۋ، ازىق-تۇلىك پەن ەنەرگەتيكالىق قاۋىپسىزدىكتى قامتاماسىز ەتۋ جانە كليماتتىڭ وزگەرۋىمەن كۇرەس. قازاقستان پرەزيدەنتى يادروسىز الەمنىڭ جالپىعا ورتاق دەكلاراسياسىن ازىرلەۋ يدەياسىن ۇسىندى. ونىڭ يادرولىق قارۋسىزدانۋ، جاھاندىق ەكونوميكالىق باسقارۋ، اقپاراتتىق قاۋىپسىزدىك سالالارىنداعى ءبىرقاتار باستامالارى الەم باسشىلارى تاراپىنان قولداۋ تاپتى. ەلباسى ءبىرقاتار ەلدىڭ باسشىلارىمەن جانە بۇۇ باس حاتشىسى پان گي مۋنمەن كەزدەستى. نۇرسۇلتان نازاربايەۆ يادرولىق قاۋىپسىزدىكتىڭ ءۇش ءتۇرلى ارتىقشىلىعىن اتاپ كورسەتتى. ءبىرىنشى - اسكەري-ساياسي اسپەكتىسى – ادامزاتتى يادرولىق قارۋدان قورعاۋ. ەكىنشى – كەز كەلگەن يادرولىق تەرروريزمگە قارسى تۇرۋ. ءۇشىنشى – اتوم ەنەرگەتيكاسىنىڭ قاۋىپسىزدىگى.
12 قازان
ەلورداداعى تاۋەلسىزدىك سارايىندا مەملەكەت باسشىسىنىڭ قاتىسۋىمەن «يادروسىز الەم ءۇشىن» اتتى حالىقارالىق فورۋم اشىلدى. وعان بۇۇ، ماگاتە، ەقىۇ، شىۇ، ۇقشۇ، ەۋرازەق، اوسشك، يۋنەسكو، ياسجتكۇ سەكىلدى بەدەلدى دە تانىمال حالىقارالىق ۇيىمداردىڭ باسشىلارى مەن وكىلدەرى، ساراپشىلار مەن عالىمدار - بارلىعى 400-دەن استام ادام قاتىستى. فورۋم اياسىندا يادرولىق قارۋسىز الەم دەكلاراسياسى قابىلداندى.
6 قاراشا
مەملەكەت باسشىسى «ءتورتىنشى شاقىرىلعان قازاقستان رەسپۋبليكاسى پارلامەنتىنىڭ ءماجىلىسىن تاراتۋ جانە قازاقستان رەسپۋبليكاسى پارلامەنتى ءماجىلىسى دەپۋتاتتارىنىڭ كەزەكتەن تىس سايلاۋىن تاعايىنداۋ تۋرالى» جارلىققا قول قويدى. ءماجىلىس دەپۋتاتتارىن سايلاۋ 2012 جىلدىڭ 15 قاڭتارىنا بەلگىلەندى.
18 قاراشا
رەسەي استاناسى – ماسكەۋ قالاسىندا نۇرسۇلتان نازاربايەۆتىڭ قاتىسۋىمەن جوعارى ەۋرازيالىق ەكونوميكالىق كەڭەستىڭ 1ء-شى وتىرىسى بولدى جانە كەدەن وداعىنا مۇشە مەملەكەتتەر باسشىلارىنىڭ كەزدەسۋى ءوتتى.
14 جەلتوقسان
نۇر-سۇلتاندا تاۋەلسىزدىگىمىزدىڭ 20 جىلدىعىنا ارنالعان سالتاناتتى جيىن ءوتتى. وسى جيىندا نۇرسۇلتان نازاربايەۆقا «ەلباسى» كەۋدە بەلگىسى تاپسىرىلدى.
ستاتيستيكا:
2011 جىلى پرەزيدەنت رەسپۋبليكا وڭىرلەرىنە 28 رەت، شەت ەلدەرگە 16 رەت رەسمي ساپارعا شىقتى. ءبىر جىل ىشىندە بارلىعى 148 زاڭ قابىلدانىپ، 254 جارلىققا قول قويىلدى.ەلباسى حالىقارالىق سيپاتتاعى 165 كەزدەسۋلەر مەن شارالارعا، 15 مەملەكەتارالىق سامميتتەر مەن حالىقارالىق فورۋمدارعا قاتىستى. 36 باسپا ءسوز كونفەرەنسيالارى مەن بريفينگتەر وتكىزدى ،باعدارلامالىق سيپاتتاعى ەكى ماقالا جاريالادى، شەتەلدىك، وتاندىق 14 بۇقارالىق اقپارات قۇرالدارى وكىلدەرىنە سۇحبات بەردى.
بۇل جىلى قازاق ەلى سپورتتىق ءىرى دودانىڭ وتانىنا اينالدى، ساياساتتا دا ءدۇبىرلى وقيعانىڭ ورتالىعى بولدى - بۇكىل الەمنىڭ نازارىن اۋدارعان قىسقى ازيا ويىندارىن، شانحاي ىنتىماقتاستىق ۇيىمىنىڭ مەرەيتويلىق ءسامميتىن ابىرويمەن وتكىزدى.
جالپى،2011 جىل ەلىمىزدە تاۋەلسىزدىكتىڭ 20 جىلدىعى اياسىندا ءوتتى.
ءتۇيىن:
26 جەلتوقساندا اقوردادا مەملەكەت باسشىسى نۇرسۇلتان نازاربايەۆتىڭ توراعالىعىمەن وتكەن كەڭەستە ەلىمىزدە 2011 جىلى اتقارىلعان جۇمىستار الدىن الا قورىتىندىلاندى. پرەزيدەنت ايتقانداي 2011 جىل وتە ماڭىزدى، ەرەكشە جانە تابىستى بولدى. قازاقستان ەل تاۋەلسىزدىگىنىڭ 20 جىلدىعىن جاقسى كورسەتىشتەرمەن اياقتادى. جالپى ىشكى ءونىمنىڭ ناقتى ءوسىمى جىلدىڭ قورىتىندىسى بويىنشا 7،3 پايىزدى قۇرادى. جىل اۋىل شارۋاشىلىعى ءۇشىن تابىستى بولدى - ءونىم ءوسىمىنىڭ كولەمى وتكەن جىلمەن سالىستىرعاندا 25،5 پايىزدى، ال قۇرىلىس سالاسىندا – 3 پايىزعا دەرلىك، ونەركاسىپتە – 4 پايىزعا جۋىق كورسەتكىشتى قۇرادى، ساۋدا مەن كولىك سالالارىندا دا ءوسىم بولدى. پرەزيدەنت يندۋستريالاندىرۋ كارتاسىنا 9،6 تريلليون تەڭگەنى قۇرايتىن 609 جوبا ەنگىزىلگەنىن اتاپ كورسەتتى. ەكى جىلدىڭ ىشىندە نىسانداردى ىسكە قوسۋدىڭ ەسەبىنەن 90 مىڭ جاڭا جۇمىس ورنى قۇرىلعان. مىڭداعان ادامدار تيىسىنشە تابىس پەن جوعارى بىلىكتى جۇمىسقا يە بولدى. بۇرىن قازاقستاندا ەشقاشان ءونىم شىعارىپ كورمەگەن 106 ءوندىرىس يگەرىلدى. مەملەكەت باسشىسىنىڭ تاپسىرماسى بويىنشا تۇرعىن ءۇي قۇرىلىسى باعدارلاماسى ىسكە اسىرىلا باستادى. 389 نىسان بويىنشا 53 مىڭ ۇلەسكەرلەردىڭ پروبلەماسى شەشىمىن تاپتى. بۇل زور ءمانى بار مەملەكەتتىك شەشىم بولدى.
ەلباسى سونداي-اق الەۋمەتتىك سالادا وڭ ناتيجەلەرگە قول جەتكىزىلگەنىن اتاپ ءوتتى. جۇمىسسىزدىق دەڭگەيى 5،3 پايىزعا دەيىن تومەندەدى. 2011-2015 جىلدارعا ارنالعان «سالاماتتى قازاقستان» دەنساۋلىق ساقتاۋدى دامىتۋ مەملەكەتتىك باعدارلاماسى جۇزەگە اسىرىلا باستادى. بۇل باعدارلامادا انا مەن بالا ءولىمىن، اۋرۋ دەڭگەيىن تومەندەتۋ جونىندە ناقتى ينديكاتورلار قامتىلعان. سونىمەن بىرگە مەرەيتويلىق جىل ەكونوميكانىڭ ودان ءارى جىلدام ءوسىمى مەن حالىقتىڭ ءومىر ءسۇرۋ دەڭگەيىنىڭ ارتۋ جىلى بولعانىن اتاپ ءوتتى پرەزيدەنت.