الماتىدا كونستيتۋسيا كۇنىنە وراي ۇلتتىق ۇلاننىڭ ب.مومىش ۇلى اتىنداعى 5571 اسكەري ءبولىمىنىڭ ساربازدارى «كونستيتۋسيا – ماڭگىلىك ەلدىڭ تۇعىرى» تاقىرىبىندا وتكەن «دوڭگەلەك ۇستەل» باسىندا ايتارى بار اعا بۋىنمەن جۇزدەستى.
ا.چەحوۆ اتىنداعى ورتالىق قالالىق كىتاپحانانىڭ بەلدى كىتاپحاناشىسى اينۇر بالاۋبايەۆا ۇيىمداستىرعان ساليقالى كەشكە الماتى قالالىق سوتىنىڭ وتستاۆكاداعى سۋدياسى سوۆەتحان ساكەن ۇلى، قازاقستان قارۋلى كۇشتەرىنىڭ ارداگەرى، پولكوۆنيك مۇحامەدجان ابدىبەك جانە اقىن، «قازاقستاننىڭ 100 جاڭا ەسىمى» جوباسىنىڭ جەڭىمپازى ەرجان جۇمابەك كەلدى.
مەيماندار جاستارعا اتا زاڭ تۋرالى، ونداعى ءار ادامنىڭ قۇقىعىنا كەپىل بولا الاتىن باپتارى تۋرالى اڭگىمەلەپ بەردى.
– قۇرمەتتى جاستار، وزدەرىڭىز بىلەسىزدەر، ماسەلەن، ءۇي تۇرعىزاتىن بولساق، ونىڭ الدىمەن ىرگەتاسىن قالاپ الامىز. ىرگەسى مىقتى قالانعان ءۇي ەشقاشان قۇلامايدى، مىزعىمايدى. سول سەكىلدى، وسى وتىرعان كەز-كەلگەنىمىزگە، جەرىمىزگە، ەلىمىزگە قورعان بولۋعا ءتيىس كونستيتۋسيامىز دا مىعىم بولۋى كەرەك. مىناۋ امەريكا، گەرمانيادا كونستيتۋسيالارىنا ءجيى وزگەرىس ەنگىزە بەرمەيدى. ولار وعان وتە مۇقيات، اسقان جاۋاپكەرشىلىكپەن قارايدى. ال بىزدە، جاسىراتىنى جوق، بىرنەشە مارتە وزگەرتىلدى. وعان سەبەپ تە جوق ەمەس. العاشقى اتا زاڭدارىمىز ەسكى اكىمشىل-امىرشىل ەرەجەلەرگە سۇيەنگەندىكتەن، قوعامنىڭ تالاپ-تىلەگىنە جاۋاپ بەرە المادى. ال سوڭعى قابىلدانعان كونستيتۋسيامىز رەسپۋبليكالىق رەفەرەندۋم جانە ەركىن سايلاۋ ارقىلى تىكەلەي حالىقتىڭ قاتىسۋىمەن قابىلداندى. مىنە، بيلىك حالىقپەن ساناسقاندا عانا باقۋاتتى ەل بولامىز. ال قازاقستاندى الەم كوگىنە كوتەرەتىن ءبىلىمدى ۇرپاق. اينالايىندار، كوپ وقىڭدار، توقىڭدار، ىلىم-بىلىممەن سۋسىنداڭدار، ءبىز سەندەرگە سەنەمىز، – دەدى الماتى قالالىق سوتىنىڭ وتستاۆكاداعى سۋدياسى سوۆەتحان ساكەن ۇلى.
كەشتە ءسوز العان قازاقستان قارۋلى كۇشتەرىنىڭ ارداگەرى، پولكوۆنيك مۇحامەدجان ابدىبەك تە جاستاردى اتا زاڭدى قۇرمەتتەۋگە شاقىردى.
– «تارتىپكە باعىنعان قۇل بولمايدى». لاۋازىمدى قىزمەتكەر بولسىن، قاراپايىم ەڭبەك ادامى بولسىن، ءبارىمىز زاڭ الدىندا تەڭ بولۋىمىز كەرەك. ال اتا زاڭىمىزدا كوزدەلگەن باپتاردىڭ ءبارى قوعامنىڭ، ادامزاتتىڭ، مەملەكەتتىڭ پايداسىنا قىزمەت ەتۋگە ءتيىس. زاڭدىق تۇرعىدا مىعىم، ادىلەتتى، قۇقىقتىق مەملەكەت قۇرۋ – ءوز قولىمىزدا»، – دەدى م.ابدىبەك.