مەملەكەت باسشىسىنىڭ جولداۋىنداعى الەۋمەتتىك-ەكونوميكالىق باسىمدىقتاردى تالقىلادى
سەنات سپيكەرى ماۋلەن اشىمبايەۆتىڭ توراعالىعىمەن پالاتا جانىنداعى جاس ساراپشىلار كلۋبىنىڭ كەزەكتى وتىرىسى ءوتتى. جيىندا مەملەكەت باسشىسى قاسىم–جومارت توقايەۆتىڭ جولداۋىنىڭ الەۋمەتتىك-ەكونوميكالىق باسىمدىقتارى تالقىلاندى.
وتىرىستى اشقان سەنات ءتوراعاسى جەكە كاسىپكەرلىك باستامالاردى ىنتالاندىرۋ، باسەكەلەستىكتى دامىتۋ، ۇلتتىق تابىستى ءادىل ءبولۋ جانە باسقا دا ستراتەگيالىق باستامالار جاڭا ەكونوميكالىق ساياساتتىڭ باسىمدىقتارى ەكەنىن ايتتى. «باعا بەلگىلەۋ ىسىنە مەملەكەتتىڭ ارالاسۋىنان بىرتىندەپ باس تارتۋ جانە ەكونوميكانى ودان ءارى مونوپولياسىزداندىرۋ جولداۋدا بەلگىلەنگەن ءبىرىنشى كەزەكتەگى مىندەتتەر ەكەنى انىق. سونداي-اق تۇراقتى ەكونوميكالىق ءوسۋدى قامتاماسىز ەتۋ ءۇشىن تۇسىنىكتى جانە بولجامدى ەكونوميكالىق ساياسات كەرەك. پرەزيدەنتىمىز قارجى سەكتورىن جانداندىرۋ ءۇشىن جاڭا سالىق كودەكسىن ازىرلەۋدى تاپسىردى. بۇگىندە بۇل باعىتتا ءتيىستى جۇمىستار باستالىپ تا كەتتى. سونىمەن قاتار مەملەكەت باسشىسى كەدەندىك اكىمشىلەندىرۋ جانە بيۋدجەتتىك ساياسات سالالارىن جاقسارتۋ بويىنشا ايتارلىقتاي رەفورما جۇرگىزۋ جانە ناقتى شارالار قابىلداۋ قاجەت ەكەنىن ايتتى»، – دەدى ماۋلەن اشىمبايەۆ.
جاس ساراپشىلار مەملەكەت باسشىسىنىڭ جولداۋىنداعى الەۋمەتتىك-ەكونوميكالىق باسىمدىقتاردى تالقىلاپ، ولاردى ىسكە اسىرۋعا ارنالعان ۇسىنىستارىن ورتاعا سالدى.
سەنات ءتوراعاسى جولداۋدا مەملەكەتتىك-جەكەمەنشىك سەرىكتەستىكتىڭ جاڭا مودەلىن ەنگىزۋ جانە نەسيە رەسۋرستارىنىڭ تاپشىلىعىن شەشۋ ارقىلى كاسىپكەرلىكتى جۇيەلى تۇردە قولداۋعا ەرەكشە نازار اۋدارىلعانىن دا اتاپ ءوتتى.
«بىزگە ءقازىر الداعى جىلداردا قازاقستاندا كاسىپكەرلەرگە جۇمىس ىستەۋگە، ءوز كاسىبى مەن بيزنەسىن جۇرگىزۋگە مۇمكىندىك بەرەتىن ناقتى ەرەجەلەر قاجەت. بۇل – ءادىل، اشىق، دەموكراتيالىق قازاقستاننىڭ جاڭا پاراديگماسىن قالىپتاستىرۋدىڭ العاشقى قادامى. جولداۋدان تۋىندايتىن ەكىنشى مىندەت – ۇلتتىق كومپانيالار مەن كۆازيمەملەكەتتىك سەكتوردى جانە وزگە دە تەتىكتەردى رەفورمالاۋ ارقىلى مەملەكەتتىڭ ەكونوميكاداعى ۇلەسىن ازايتۋ. تاعى ءبىر باسىمدىق، ءبىز ەكونوميكانى بەلسەندى تۇردە نەسيەلەۋ بويىنشا ماقساتتى قادامدار جاساۋىمىز قاجەت. پرەزيدەنتىمىز باستى ەرەجەلەردى اتاپ ءوتتى. ەندى ءبىز ءوز ۇسىنىستارىمىزدى بەرىپ، ولاردى نەگىزگى قاتىسۋشى تاراپتارعا جەتكىزۋىمىز كەرەك. سونداي-اق ءارى قاراي سول ەرەجەلەردى ۇستانۋعا ءتيىسپىز»، – دەدى سەنات سپيكەرى.
ءىس-شارا بارىسىندا جاس ساراپشىلار كلۋبىنىڭ مۇشەلەرى سالىق مولشەرلەمەلەرى مەن باسقا دا الەۋمەتتىك اۋدارىمداردىڭ حالىقارالىق تاجىريبەسىنە، قازىرگى سانكسيالىق تەكەتىرەس جاعدايىندا وتاندىق بيزنەستىڭ ستراتەگياسىنا جانە ەكونوميكالىق دامۋدىڭ باسقا دا ماڭىزدى ماسەلەلەرىنە قاتىستى ءوز ۇسىنىستارى مەن ۇسىنىمدارىن ايتتى.