29-شى رەسپۋبليكالىق «جاس قانات–2023» جاس ورىنداۋشىلار بايقاۋىنىڭ ۇيىمداستىرۋشىلارى ايتۋلى ونەر بايقاۋىنا دايىندىقتىڭ قالاي ءجۇرىپ جاتقانىن حابارلايدى.
سونىمەن، بيىل بۇل بايقاۋ ەرەكشە فورماتتا وتكەلى وتىر. بۇرىن «جاس قانات» ءۇش كۇن بويى «مينۋس 1» فونوگرامماسىمەن ءوتىپ كەلسە، بيىل جاس تالانتتار ءار سايىستا ءارتۇرلى مۋزىكالىق سۇيەمەلدەۋمەن ونەر كورسەتەدى دەگەن شەشىم قابىلداندى. بايقاۋدىڭ ءبىرىنشى كۇنى ولار ءوز اندەرىن الەكساندر بەلياكوۆ جەتەكشىلىك ەتەتىن ەسترادالىق-سيمفونيالىق وركەستردىڭ سۇيەمەلدەۋىمەن شىرقايدى. ەكىنشى كۇنى «مينۋس 1» فونوگرامماسىمەن ونەر كورسەتەدى. ال ءۇشىنشى كۇنى ولاردى گيتاريست، مۋزىكالىق وڭدەۋشى، كومپوزيتور، مۋزىكالىق پروديۋسەر جانە ديريجەر يليا باشكاتوۆ باسقاراتىن، قۇرامىندا 6 ينسترۋمەنتالشى، 4 ۇرمەلى اسپاپشى جانە 3 بەك-ۆوكاليست بار بەند سۇيەمەلدەيتىن بولادى. بۇعان دەيىن وتكەن «جاس قاناتتا» نەبارى 3 جۇلدەلى ورىن بولسا، ەندى ولار «ازيا داۋىسى» فەستيۆالى مەن «جاس قانات» بايقاۋىنىڭ نەگىزىن سالۋشىلار – مۇرات ەرعالييەۆ پەن الەكساندر پونوماريەۆ اتىنداعى گران-پريمەن تولىعىپ وتىر.
سونداي-اق، بيىلعى «جاس قانات–2023» بايقاۋى اياسىندا «جاس قانات – بالالار» ءبىرىنشى رەسپۋبليكالىق بالالار شىعارماشىلىعى بايقاۋى وتەدى. جاس دارىندار ەكى اتالىم – ۆوكال جانە سۋرەت بايقاۋى بويىنشا ب ا ق سىناماقشى. بايقاۋ 1 ماۋسىم – حالىقارالىق بالالاردى قورعاۋ كۇنىنە وراي، ءدال سول كۇنى باستالادى. ۇيىمداستىرۋشىلاردىڭ مالىمەتىنشە، مەكتەپ وقۋشىلارى «سوڭعى قوڭىراۋدان» كەيىن رەسپۋبليكا سارايىنا كەلىپ، وسى بايقاۋدى تاماشالاۋىنا بولادى. بايقاۋدى ەرەسەكتەر مەن جاس ورىنداۋشىلار «جاس قانات» انۇرانىمەن اشادى.
بالالاردىڭ سۋرەت بايقاۋى تۋرالى بىرەر ءسوز ايتساق، ىرىكتەۋ كەزەڭىندە «ازيا داۋىسى» دەگەن ءسوز تىركەسى نەنى ەلەستەتەدى، سول تۋرالى سۋرەت سالۋ تاپسىرماسى بەرىلگەن ەدى. بالالاردىڭ جۇمىستارى ءبىز كۇتكەننەن دە اسىپ ءتۇستى. ونداعى ىرىكتەۋدىڭ قالاي ءوتىپ جاتقانىن @azia.dauysy instagram پاراقشاسىنان كورە الاسىزدار. ەڭ قىزىقتى جۇمىستاردى «جاس قانات–2023» بايقاۋى وتەتىن الماتىداعى رەسپۋبليكا سارايىنىڭ فويەسىندەگى كورمەگە قوياتىن بولامىز، –دەيدى ۇيىمداستىرۋشىلار.
بايقاۋ بارىسىندا فويەدە اتى اڭىزعا اينالعان حالىقارالىق «ازيا داۋىسى» فەستيۆالى فوتومۇراعاتىنىڭ كورمەسى، بالالار سۋرەت كورمەسى جانە «ازيا داۋىسى–2023» ساحنالىق ەسكيزدەرىنىڭ كورمەسى وتەدى. ساحنالىق ەسكيزدەر جۇرگەنوۆ اتىنداعى قازاق ۇلتتىق ونەر اكادەمياسىنىڭ ستۋدەنتتەرىنە تاپسىرىلىپ وتىر. ۇزدىك ەسكيز اۆتورى 100 000 تەڭگە جۇلدە الادى. شوۋ تەك ساحنادا عانا ەمەس، رەسپۋبليكا سارايىنىڭ فويەسىندە تيك-توكەرلەرگە ارنالعان كيىز ءۇي ورناتىلماقشى.