قازاقستاندا ءبىلىمدى دە جىگەرلى جاستاردىڭ كەزەكتى لەگى "ەلباسى مەدالىن" الدى
ماراپات ەلىمىزدىڭ ءار ايماعىندا 4 مىڭعا جۋىق بەلسەندى جاسقا تابىستالدى، دەپ حابارلايدى Almaty-akshamy.kz
بۇل جوبا تۇڭعىش پرەزيدەنت – ەلباسى نۇرسۇلتان نازاربايەۆتىڭ «El Úmiti» باستاماسى اياسىندا ازىرلەندى. ۇلتتىق دەڭگەيدەگى بىرەگەي باعدارلاما دارىندى جاستاردى كەشەندى دامىتۋعا باعىتتالعان.
وعان 14 پەن 29 جاس ارالىعىنداعى قازاقستاندىقتار قاتىسادى. ۇمىتكەر قولا، كۇمىس نەمەسە التىن دەڭگەيدىڭ ءبىرىن تاڭداپ، 6-دان 18 ايعا دەيىن قۇرىلعان باعدارلامانىڭ تالاپتارىن ورىندايدى.
بىلىكتىلىكتى دامىتۋ 7 باعىتتى قامتيدى. اتاپ ايتساق سپورت، دارىن مەن داعدى، كىتاپ وقۋ، ۇلتتىق مۇرا، ۆولونتەرلىك، ساياحاتتار مەن جورىقتار، ەڭبەك تاجىريبەسى جەتىلدىرىلىپ، سىنالادى.
2 جىلدىڭ ىشىندە بۇل جوباعا ەلىمىزدىڭ ءار وڭىرىنەن 20 مىڭنان استام جاس ورەن جۇمىلدىرىلعان.
«اعىمداعى جىلى مەدالدىڭ يەگەرلەرى ءبىلىم گرانتتارىن الۋدا ارتىقشىلىقتارعا يە بولدى. قازاقستان رەسپۋبليكاسى بويىنشا 605 تۇلەككە وسىنداي ءبىلىم گرانتتارى بەرىلدى. ونىڭ ىشىندە 30% استامى - اۋىل مەكتەپتەرىن بىتىرگەن تۇلەكتەر»، - دەدى «ەلباسى اكادەمياسى» كورپوراتيۆتىك قورى ديرەكتورىنىڭ كەڭەسشىسى مارجان يمانعالييەۆا.
ەلباسىنىڭ قولا مەدالىنىڭ يەگەرى اسپەت كەنجەقارا پىكىر ءبىلدىردى.
«ءوتىنىشتى "ەلباسى مەدالى" سەرتيفيكاتى ارقىلى بەردىم. ودان كەيىن جاۋاپتى كۇتتىم. كەيىن ەۋرازيا ۇلتتىق ۋنيۆەرسيتەتىنە گرانتقا تۇسكەنىم جايلى حابار كەلەدى. شىنى كەرەك، قاتتى قۋاندىم. سەبەبى اتا-انامنىڭ ءۇمىتىن اقتاۋ مەنىڭ ەرەكشە ارماندارىمنىڭ ءبىرى بولدى. "ەلباسى مەدالى" جوباسى ارقىلى ءوزىمدى ءار سالادان جاقسى دامىتا الدىم دەسەم، ارتىق ەتپەيدى»، - دەدى ول.