2024 جىلعى ءبىرىنشى جارتىجىلدىقتىڭ قورىتىندىسى بويىنشا 1 ملن استام قازاقستاندىق مەملەكەتتىك الەۋمەتتىك ساقتاندىرۋ قورىنان بەس الەۋمەتتىك تاۋەكەل بويىنشا 453 ملرد تەڭگە سوماسىنا الەۋمەتتىك تولەمدەر الدى، دەپ حابارلايدى aqshamnews.kz
ەڭبەككە قابىلەتتىلىكتەن ايىرىلعان جاعدايدا تولەنەتىن الەۋمەتتىك تولەم بيۋدجەت قاراجاتى ەسەبىنەن مۇگەدەكتىگى بويىنشا مەملەكەتتىك الەۋمەتتىك جاردەماقىعا قوسىمشا تاعايىندالادى. ماسق-تەن تولەم مەديسينالىق-الەۋمەتتىك ساراپتامادا بەلگىلەنگەن 30%-دان 100%-عا دەيىنگى دارەجەدە جانە ەڭبەك قىزمەتىن جالعاستىرۋىنا قاراماستان جالپى ەڭبەككە قابىلەتتىلىگىن جوعالتۋ كەزەڭىندە جۇزەگە اسىرىلادى.
2024 جىلعى 1 شىلدەدەگى جاعداي بويىنشا بۇل تولەمدى 23،1 ملرد تەڭگە سوماسىنا 94،8 مىڭنان استام ادام الدى، بۇل 2023 جىلدىڭ سايكەس كەزەڭىمەن سالىستىرعاندا 31% - عا ارتىق. بەلگىلەنگەن تولەمنىڭ اي سايىنعى ورتاشا مولشەرى 57 220 تەڭگەنى قۇرادى.
اسىراۋشىسىنان ايىرىلعان جاعدايدا تولەنەتىن الەۋمەتتىك تولەم مىندەتتى الەۋمەتتىك ساقتاندىرۋ جۇيەسىنە قاتىسۋشىنىڭ اسىراۋىندا بولعان ادامدارعا بيۋدجەت قاراجاتى ەسەبىنەن تولەنەتىن اسىراۋشىسىنان ايىرىلۋى بويىنشا مەملەكەتتىك الەۋمەتتىك جاردەماقىسىنا قوسىمشا تاعايىندالادى. ماسق-تەن تولەم اسىراۋىنداعى ادامدار 18 جاسقا تولعانعا دەيىن، ال كۇندىزگى وقۋ نىسانىندا وقىعان جاعدايدا 23 جاسقا دەيىن تولەنەدى.
بيىلعى 6 ايدا اتالعان تولەمدى اسىراۋشىسىنان ايىرىلعان 63،4 مىڭ وتباسى 17،1 ملرد تەڭگە سوماسىنا الدى، بۇل 2023 جىلدىڭ سايكەس كەزەڭىمەن سالىستىرعاندا 37 %-عا كوپ. بەلگىلەنگەن تولەمنىڭ اي سايىنعى ورتاشا مولشەرى 59 968 تەڭگەنى قۇرادى.
ماسق-تەن جۇمىسىنان ايىرىلۋ جاعدايى بويىنشا الەۋمەتتىك تولەم الەۋمەتتىك ساقتاندىرۋ جۇيەسىنە قاتىسۋشىعا ونىڭ جۇمىستان شىعارىلۋ سەبەبىنە قاراماستان تاعايىندالادى. نەگىزگى شارت – جۇمىسسىز رەتىندە تىركەلۋ. تولەم مولشەرى جۇمىسسىز رەتىندە تىركەلگەنگە دەيىنگى سوڭعى 2 جىل ىشىندە ماسق-كە الەۋمەتتىك اۋدارىمدار جۇرگىزىلگەن ورتاشا ايلىق تابىسقا، جۇيەگە قاتىسۋ وتىلىنە جانە تابىستى اۋىستىرۋ كوەففيسيەنتىنە (45%) بايلانىستى.
2024 جىلدىڭ ءبىرىنشى جارتىجىلدىعىندا اتالعان تولەم 39 ملرد تەڭگە سوماسىنا جۇزەگە اسىرىلدى، ونى 180،2 مىڭ ادام الدى، بۇل 2023 جىلدىڭ 6 ايىندا الۋشىلار سانىنان 1،6 ەسە ارتىق. بەلگىلەنگەن تولەمنىڭ اي سايىنعى ورتاشا مولشەرى – 73 081 تەڭگە.
جۇكتىلىككە جانە بوسانۋعا، جاڭا تۋعان بالانى (بالالاردى) اسىراپ الۋعا بايلانىستى تابىسىنان ايىرىلۋ جاعدايىنا بايلانىستى الەۋمەتتىك تولەم جۇكتىلىك جانە بوسانۋ بويىنشا دەمالىستىڭ بارلىق كۇندەرىنە تاعايىندالادى. تولەم مولشەرى جۇكتىلىككە جانە بوسانۋعا بايلانىستى دەمالىس كۇنىنە دەيىنگى سوڭعى 12 ايدا ماسق-كە الەۋمەتتىك اۋدارىمدار جۇرگىزىلگەن ورتاشا ايلىق تابىسقا جانە ەڭبەككە جارامسىزدىق كۇندەرىنىڭ سانىنا بايلانىستى بولادى.
2024 جىلعى 1 شىلدەدەگى جاعداي بويىنشا بۇل ءبىرجولعى تولەمدى 129،5 مىڭ ادام جالپى سوماسى 180،8 ملرد تەڭگەگە الدى، بۇل وتكەن جىلدىڭ سايكەس كەزەڭىمەن سالىستىرعاندا 11%-عا ارتىق. تاعايىندالعان تولەمنىڭ ورتاشا مولشەرى 1 528 846 تەڭگەنى قۇرادى.
ءبىر جارىم جاسقا دەيىنگى بالا كۇتىمىنە بايلانىستى تابىسىنان ايىرىلۋ جاعدايى بويىنشا اي سايىنعى الەۋمەتتىك تولەم بالانىڭ تۋعان كۇنىنەن باستاپ الەۋمەتتىك ساقتاندىرۋ جۇيەسىنە قاتىسۋشىعا تاعايىندالادى. تولەم مولشەرى سوڭعى 2 جىلدا ماسق-كە الەۋمەتتىك اۋدارىمدار جۇرگىزىلگەن ورتاشا ايلىق تابىستىڭ 40%-ىن قۇرايدى. ەكى جانە ودان دا كوپ بالا تۋعان كەزدە تولەم ءاربىر بالاعا جەكە تاعايىندالادى.
وسى جىلدىڭ 6 ايىندا بۇل تولەم 137،7 مىڭ ادامعا تاعايىندالدى، ونىڭ اي سايىنعى ورتاشا مولشەرى 81 823 تەڭگەنى قۇرادى. تولەم 193 ملرد تەڭگە سوماسىنا جۇرگىزىلدى، بۇل 2023 جىلدىڭ وسى كەزەڭىمەن سالىستىرعاندا 1،6 ەسە كوپ.
وسىلايشا، مىندەتتى الەۋمەتتىك ساقتاندىرۋ جۇيەسىنە قاتىساتىن جۇمىس ىستەيتىن ازاماتتاردى الەۋمەتتىك قورعاۋ جۇمىس ىستەمەيتىندەرگە قاراعاندا الدەقايدا جوعارى.