بۇگىن الماتىدا «جارقىن كۇز» قالالىق ناۋقانى اياسىندا باۋم توعايىندا تازالاۋ جانە كوگالداندىرۋ ءىس-شارالارى ءوتتى، دەپ حابارلايدى aqshamnews.kz
اكسياعا قالانىڭ ەكولوگيا جانە قورشاعان ورتانى قورعاۋ باسقارماسىنىڭ وكىلدەرى، «مەدەۋ» مەملەكەتتىك وڭىرلىك تابيعي پاركى، ەكو-بەلسەندىلەر جانە تۇرعىندار قاتىستى.
«مۇنداي اكسيالار وتە قاجەت، تازالاۋ جۇمىستارىنان بولەك، ءبىز كوگالداندىرامىز. قالامىزدىڭ ساياباقتارى مەن سكۆەرلەرى – نەگىزگى وتتەگى كوزدەرى، سوندىقتان ولاردى قورعاۋىمىز كەرەك»، – دەدى بوستاندىق اۋدانىنىڭ قورشاعان ورتانى قورعاۋ ءبولىمى باسشىسى ارسەن ايدىنبەكوۆ.
اكسيا قازاقستانداعى ورمان شارۋاشىلىعى قىزمەتكەرلەرى كۇنىمەن تۇسپا-تۇس كەلدى. بۇل مەرەكە جىل سايىن قازان ايىنىڭ ءۇشىنشى جەكسەنبىسىندە اتاپ وتىلەدى. قىزمەتىندە ەرەكشەلەنگەن ۆەدومستۆو قىزمەتكەرلەرى كاسىبي مەرەكەسى قارساڭىندا العىس حاتتارمەن ماراپاتتالدى.
«تابيعاتقا، قورشاعان ورتاعا قامقورلىق جاساۋ – ءبىزدىڭ مىندەتىمىز. تابيعاتتى بولاشاق ۇرپاق ءۇشىن ساقتاپ قالۋ ءۇشىن بار كۇشىمىزدى سالامىز»، – دەدى ورمانشى قۋاندىق داۋلەتياروۆ.
«جاس ەكو پاترۋل» جانە «جاسىل ەل» جاستار ەكولوگيالىق جاساقتارىنىڭ جەتەكشىسى ءادىل نۇرپەيىسوۆ الماتىلىقتاردى مەگاپوليستىڭ ەڭ ءىرى جاسىل جەلەگىنىڭ ءبىرىن ساقتاپ قالۋعا بەلسەندى قاتىسۋعا شاقىردى. «جىل باسىنان بەرى ءبىز قالا بيلىگىمەن بىرلەسە وتىرىپ، 30-عا جۋىق ەكواكسيا وتكىزدىك. وسىنداي اۋقىمدى اكسيادا ءاربىر ازاماتتىڭ ۇلەسى ماڭىزدى»، – دەدى ەكوبەلسەندى.
باۋم توعايىنىڭ جانىندا تۇراتىن الماتىلىق يرينا پاۆلوۆا اكسيا تۋرالى «مەدەۋ» ساياباعىنىڭ قىزمەتكەرلەرىنەن ەستىگەن. «باۋم توعايىندا 2000 جىلداردان بەرى ۇنەمى سەرۋەندەيمىن، بۇرىن بۇل اۋماق قاراۋسىز قالعان ەدى، مۇندا ءجۇرۋدىڭ ءوزى قورقىنىشتى بولاتىن. ءبىراق سوڭعى جىلدارى ايتارلىقتاي جاقساردى، سوندىقتان مەن تۋعان قالامىز الماتىنىڭ اۋماعىن تازالاۋ اكسياسىن قولدايمىن»، – دەدى يرينا پاۆلوۆا.
ەسكە سالا كەتەيىك، الماتىدا «تازا قازاقستان» رەسپۋبليكالىق باعدارلاماسى مەن «الماتى – ءبىزدىڭ ورتاق ءۇيىمىز» قالالىق ناۋقانى اياسىندا 18-24 قازان ارالىعىندا حالىق اراسىندا ەكولوگيالىق مادەنيەتتى قالىپتاستىرۋعا، قالانى كورىكتەندىرۋ مەن كوگالداندىرۋعا باعىتتالعان «جارقىن كۇز» اكسياسى ءوتىپ جاتىر.