پرەزيدەنت قاسىم-جومارت توقايەۆ «جاڭا قازاقستاندى» - جارقىن بولاشاق باستاۋىن بىرگە قۇرۋعا ۇندەدى. قازاق ەلى بەيبىتشىلىك مەكەنى ەكەنى انىق. مۇنى حالقىمىزدىڭ دارحان كوڭىلىمەن بايلانىستىرامىز. بۇگىنگى تاڭدا قاستەرلى وتانىمىزدى دامىتۋدىڭ باعىت-باعدارى ايقىندالۋدا. وسىعان وراي، ساياساتتانۋ، فيلوسوفيا جانە ءدىنتانۋ ينستيتۋتى ديرەكتورىنىڭ ورىنباسارى، ەكونوميكا عىلىمىنىڭ كانديداتى ۇلەس ماديارۇلىن اڭگىمەگە تارتقان ەدىك.
– مەملەكەت باسشىسى جولداۋىندا جاڭادان وڭىرلەر قۇرىلاتىنىن ايتتى، جالپى يگى باستامالار كوتەردى. وي-پىكىرىڭىزدى قوسساڭىز؟
– ارينە، ءتيىمدى باستاما! ۇلىتاۋ، جەتىسۋ، اباي وبلىستارىن اشۋ – تاريحقا قۇرمەت ىسپەتتى دۇنيە. كوپشىلىك تە قۋانىپ جاتىر. بۇرىن ول ولكەلەردىڭ وبلىستىق ستاتۋسى دا بولعان. مەن ءبىر عانا مىسال كەلتىرەيىن. ماسەلەن، الماتى ماڭىنداعى قاسكەلەڭ، تالعار سىندى اۋداندار ماڭىنداعى تۇرعىندار تالدىقورعانعا سابىلاتىن. ەندى ولاي ەتۋدىڭ قاجەتى جوق. قاپشاعايعا قونايەۆ اتاۋى بەرىلەدى. بۇل دا كورنەكتى مەملەكەت جانە قوعام قايراتكەرى ديماش احمەت ۇلىنىڭ رۋحىنا، اڭىز تۇلعاعا كورسەتكەن قۇرمەت دەپ بىلەمىز. جالپى، ءاربىر ساياسي شەشىم شىعارىلماس بۇرىن ابدەن قارالادى، سۇزگىدەن وتەدى. ول – زاڭدىلىق. كۇندەلىكتى تىرلىكتە دە سولاي عوي. سوندىقتان ەلىمىزدەگى وزگەرىستەر جاقسىلىققا باستايتىنىنا سەنەمىز. ءاربىرىمىز ءوز سالامىزدا تابىستى ەڭبەك ەتسەك وزامىز، دامۋدىڭ داڭعىل جولىنا تۇسەمىز.
– ەكونوميكالىق تۇرعىدا قانداي ىستەر اتقارۋىمىز كەرەك دەپ ويلايسىز؟
– جۋىردا پرەزيدەنتىمىز قاسىم-جومارت كەمەل ۇلى ەلدەگى اسا اۋقاتتى ادامدارمەن كەزدەستى. الەۋمەتتىك-ەكونوميكالىق دامۋ باعىت ايقىندادى. بۇل دا بولسا، «حالىق ۇنىنە قۇلاق اساتىن مەملەكەت» قاعيداتىنا جاقىن ءۇردىس. قازاقستان ەكونوميكالىق تۇرعىدان دامىپ، وركەندەپ كەلە جاتىر. بۇكىل الەمدى پاندەميا تىعىرىققا تىرەدى. ساۋدا-ساتتىق باسەڭدەدى. ەلدەر اراسىنداعى تاۋار اينالىمى ازايدى. ونىڭ ۇستىنە گەوساياسي جاعدايدى قوسىڭىز. وسىنىڭ ءبارى ءوز اسەرىن بەرەدى. بىزدە وسىنداي تۇراقسىزدىقتارعا قارسى ءىس-قيمىلدار، جوسپارلار بار. مۇنداي كەزەڭدەردە جاڭادان قارجى تابۋ كوزدەرى اشىلادى. بارلىق ماسەلە شەشىلەدى. بارلىق قاراما-قايشىلىقتار كەلىسسوزدەر ارقىلى ورنايدى. سول سەبەپتى، بارلىق جاعدايعا دايىن بولعان ابزال. قارجى كوزدەرىن، ينۆەستيسيا تارتۋ ماڭىزدى. ءقازىر بلوكاداعا تۇسكەن ۇلكەن بيزنەس وكىلدەرى جاڭا جۇمىس نىساندارىن قاراستىرىپ جاتىر. سولاردى وزىمىزگە تارتقان ءجون. قالتالى كاسىپكەرلەر بىزگە ءوز قارجىلارىن سالسا، نۇر ۇستىنە نۇر بولماق. وسىنداي ىستەردى جۇزەگە اسىرساق، جاڭادان زاۋىتتار مەن فابريكالار سالىنادى. ولار ءبىزدىڭ ەكونوميكامىزعا زور سەرپىن ورناتار ەدى. يمپورتتى ازايتىپ، ەكسپورتقا باسىمدىق بەرەر ەدىك. اتالعان ويلارىمىز جۇزەگە اسىرىلىپ تا جاتىر. ەكونوميكا قۋاتتى بولسا، ەل باقۋاتتى دەگەن ءسوز.
– ءبىلىمدى، جىگەرلى جاستاردى تاربيەلەۋ، كوتەرۋ ءۇشىن قانداي ىستەر اتقارۋىمىز كەرەك؟
– بىزدە بىلگىر جاستار جەتەرلىك. قازاقتىڭ قاراكوزدەرى الەمدى تاڭداندىرۋدا. مادەنيەت، ونەر، ءبىلىم مەن عىلىمدى وركەندەتىپ، تابىستى قىزمەت ەتىپ كەلە جاتقان جاسورەندەرگە قايران قالۋدامىز. ماسەلە مىنادا. اۋىلدان كەلگەندەرىنە مۇمكىندىك بەرىلۋ قاجەت. ەلدى مەكەندەردە جۇمىس كوزى تاپشى. بۇل جاعى جاسىرىن ەمەس. سوندىقتان جۇرت قالاعا اعىلادى. ونىڭ ىشىندە الىپ ءۇش مەگاپوليسىمىزگە كەلۋدە. ءسويتىپ، قالادا ءارتۇرلى ىستەر اتقارۋدا. دەگەنمەن، بارشاسى بىردەي ۇشپاققا شىعا بەرمەيدى. ەگەر اۋىلدىق جەردە جاستارعا جۇمىس ورىندارى بولسا، قالاعا ويىسپاس ەدى. بۇگىندە عىلىمعا جاس عالىمدار ارالاسۋدا. ولاردىڭ تاجىريبەسى از. سوندىقتان بەيىمدەپ، ۇيرەتىپ، كەلەشەككە ساپالى كادر دايىنداۋىمىز قاجەت. ارامىزدا ۇلكەن عىلىم كانديداتى، دوكتور، پروفەسسورلار بار. سولاردىڭ جولىن جالعاستىرۋ ءۇشىن عىلىمعا جاستاردى تارتساق، ۇتامىز. جان-جاعىنان باعامداپ قاراعاندا كوپ پايدا بولار ەدى.
– ءداستۇرلى ساۋال: بولاشاق كىمنىڭ قولىندا؟
– جاڭا ءبىراز ويدى قوزعادىم. جاس كۇنىمدە سىنىپتاستارىم مەكتەپ ءبىتىرىپ، تومسك ۋنيۆەرسيتەتىنە وقۋعا كەتە باستادى. ويتكەنى، سول جاقتان كەلىپ، ۇگىت-ناسيحات جۇرگىزگەن بولاتىن. كىم جاقسى وقۋ وقىپ، ىڭعايلى جاتاقحانادا تۇرىپ، مىقتى جۇمىسقا ورنالاسۋدى قالاماسىن؟ البەتتە، وندايدى بارشاسى قالايدى. مەن سول ۋاقىتتا اكەممەن اقىلداستىم. و كىسى وسىندا قالۋدى، ءوز تۋعان جەرىمدە قىزمەت ىستەۋدى ۇسىندى. الگىلەردىڭ بىرەۋى دە ەلگە ورالمادى. تومسكىدە، سانكت-پەتەربۋرگتە قالدى. ۇيلەندى، سول ەلگە ءسىڭدى. مەن اكەمنىڭ اقىلىن تىڭداپ، وسىندا جۇرگەنىمە رازىمىن. بىلىمدىلەر شەتەلگە كەتە بەرسە، نە بولماق؟! ايتارىم، ەلىمىزدىڭ بولاشاعى العىر، وتانشىل، اقىلدى، تاربيەلى ازاماتتاردىڭ قولىندا دەپ بىلەمىز. بولاشاعىمىز جارقىن بولسىن!
- سۇحباتىڭىزعا راحمەت!
ولجاس جولدىباي