بۇدان بۇرىن قازاقستاندا اجىراسۋ ءۇشىن تولەنەتىن باج 80 مىڭ تەڭگەگە دەيىن ۇلعاياتىنىن حابارلاعانبىز.
ءماجىلىس دەپۋتاتى ارداق نازاروۆ اجىراساتىندارعا جارنا ەنگىزۋدى ۇسىندى، دەپ حابارلايدى aqshamnews.kz
دەپۋتات ەلدەگى اجىراسۋ دەڭگەيىنىڭ الاڭداتارلىق كورسەتكىشكە جەتكەنىن ايتىپ، بۇل ماسەلەگە جۇيەلى تۇردە نازار اۋدارۋعا شاقىردى. ول ۇكىمەتكە اجىراسۋدىڭ الدىن الۋعا قاتىستى ۇسىنىستارىن جولدادى.
ول وتباسىنىڭ السىرەۋىن ۇلتتىق قاۋىپسىزدىك پەن مەملەكەتتىڭ تۇراقتىلىعىنا تىكەلەي ءقاۋىپ دەپ باعالايدى. ونىڭ ايتۋىنشا، بۇل جاعدايدىڭ الدىن الۋ ءۇشىن تۇبەگەيلى وزگەرىس قاجەت.
- شاڭىراعىنىڭ وتىن-سۋىن تاسىپ جۇرگەن ەرلەرىمىز قايدا؟ وتباسىنىڭ ۇيىتقىسى بولا بىلگەن تەكتى قىزدارىمىز قايدا؟، – دەپ دەپۋتات قوعامعا اشىق سۇراق تاستايدى.
ۇسىنىستار
1. اجىراسۋعا مەملەكەتتىك باجدى ارتتىرۋ جانە جارنا ەنگىزۋ
دەپۋتات اجىراسۋعا ءوتىنىش بەرەر كەزدە ءبىرجاقتى ارىزدى قابىلداماس بۇرىن مىندەتتى تۇردە جوعارى كولەمدەگى مەملەكەتتىك باج ەنگىزۋدى ۇسىنادى. سونىمەن قاتار، اجىراسقاندارعا قاتىستى تابىس سالىعىنىڭ مولشەرلەمەسىن كەزەڭ-كەزەڭىمەن ارتتىرۋ مۇمكىندىگىن قاراستىرۋدى ۇسىندى.
2. اقساقالدار ينستيتۋتىن قايتا جانداندىرۋ
دەپۋتات بۇرىنعى داستۇرگە سۇيەنە وتىرىپ، جەرگىلىكتى كەڭەستەر، ارداگەرلەر القاسى، يمامدار مەن ايەلدەر كەڭەستەرى سياقتى كونسۋلتاتيۆتىك قۇرىلىمداردى اجىراسۋ الدىنداعى ەرلى-زايىپتىلارمەن تاتۋلاستىرۋ جۇمىسىنا تارتۋدى ۇسىنادى.
3. «جاس وتباسى» ۇلتتىق باعدارلاماسىن ازىرلەۋ
نازاروۆ جاس وتباسىلارعا ارنالعان كەشەندى قولداۋ تەتىكتەرىن قامتيتىن ۇلتتىق باعدارلاما جاساۋدى ۇسىندى. ول مىناداي باعىتتاردى قامتۋى ءتيىس:
تۇرعىن ءۇي الۋعا كومەكتەسۋ؛
بالالى بولعاندا جاردەماقى تولەۋ؛
بالاباقشاعا تەگىن جولداما بەرۋ؛
تۇراقتى جۇمىسقا ورنالاسۋعا قولداۋ كورسەتۋ؛
يپوتەكالىق جەڭىلدىكتەر مەن سالىقتىق دەمالىستار قاراستىرۋ.
4. توي ءۇشىن نەسيەگە جول بەرمەۋ
دەپۋتات ۇيلەنۋ تويلارىنا نەسيە الۋ تاجىريبەسىن توقتاتۋ ماقساتىندا كەڭ كولەمدى اقپاراتتىق-يدەولوگيالىق ناۋقان جۇرگىزۋدى ۇسىندى. ول «قاراپايىم توي – بەرەكەلى وتباسى» دەگەن ۇرانمەن ۇلتتىق دەڭگەيدەگى ۇندەۋ جاريالاپ، وعان قوعام قايراتكەرلەرىن، ءدىن وكىلدەرىن، بلوگەرلەر مەن باق-تى تارتۋدى ءجون كورەدى.
نازاروۆتىڭ پىكىرىنشە، اجىراسۋدى تەك ەكى ادامنىڭ جەكە ماسەلەسى رەتىندە قاراۋعا بولمايدى. بۇل – ۇلت بولاشاعىنا تونگەن ءقاۋىپ. ول ۇكىمەت پەن پارلامەنتتى بۇل پروبلەمانى ستراتەگيالىق دەڭگەيدە قاراپ، ناقتى ءارى ناتيجەلى ارەكەتكە كوشۋگە شاقىردى.
- بۇگىن وتباسىلارىمىز شايقالىپ تۇرسا، ەرتەڭ ەلدىڭ ىرگەسى سوگىلەدى. ۇلتتىق يدەولوگيا، تاربيە مەن الەۋمەتتىك قولداۋ – ۇلتتى ساقتاپ قالاتىن باستى تەتىك، – دەيدى دەپۋتات.