ەلىمىزدە مەكتەپ وقۋشىلارى اراسىنداعى جاراتىلىستانۋ-ماتەماتيكالىق باعىتتاعى پاندەر بويىنشا رەسپۋبليكالىق وليمپيادا ءوز مارەسىنە جەتتى.
وعان ەلىمىزدىڭ وڭىرلەرىنەن 939 وقۋشى قاتىستى، دەپ حابارلايدى Almaty-akshamy.kz ق ر وقۋ-اعارتۋ مينيسترلىگىنىڭ باسپا ءسوز قىزمەتىنە سىلتەمە جاساپ.
بيىلعى جىلى وقۋشىلارعا ارنالعان رەسپۋبليكالىق وليمپيادا 6 وڭىردە ءبىر مەزگىلدە ءوتتى. جاس ماتەماتيكتەر مەن فيزيكتەر، حيميكتەر استانا، الماتى جانە پاۆلودار قالالارىندا ب ا ق سىناستى. بارلىق كەزەڭ قورىتىندىسى بويىنشا 431 وقۋشى جۇلدەگەر اتاندى، ولار 211 قولا، 131 كۇمىس جانە 89 التىن جۇلدەنى ءوزارا ءبولىستى.
«ەڭ جاس قاتىسۋشى» ديپلومىمەن اقمولا وبلىسىنان 8-سىنىپ وقۋشىسى ءنۇرالى شايمەردەن ماراپاتتالدى.
«مەن وسى وليمپياداعا قاتىسقانىما وتە قۋانىشتىمىن. رەسپۋبليكالىق وليمپيادا – مەنىڭ ينتەللەكتۋالدى دامۋىم ءۇشىن ۇلكەن مۇمكىندىك. مەن مۇندا ءبىلىمىمدى تولىقتىرىپ قانا قويماي، جاڭا دوستار تاپتىم»، - دەيدى ءوز اسەرىمەن بولىسكەن ءنۇرالى شايمەردەن.
ال «ەڭ ۇزدىك اۋىل وقۋشىسى» نوميناسياسى بويىنشا پاۆلودار وبلىسىنان ماكسيم كوماروۆ پەن جەتىسۋ وبلىسىنان ۆلاديسلاۆ يۆانوۆ ديپلومدارعا يە بولدى.
«ۇزدىك وليمپيادالىق كوماندا» نوميناسياسى كەلەسىدەي بولىنىسكە ءتۇستى: III ورىن - شىعىس قازاقستان، قىزىلوردا جانە جامبىل وبلىستارى؛ II ورىن - استانا جانە الماتى قالالارى؛ I ورىن – پاۆلودار وبلىسى جانە رفمم قۇراما كومانداسى. باس جۇلدەنى نازاربايەۆ زياتكەرلىك مەكتەبىنىڭ كومانداسى جەڭىپ الدى.
سونىمەن قاتار 46 جەڭىمپازعا KBTU، ق.ساتبايەۆ اتىنداعى قازاق ۇلتتىق زەرتتەۋ تەحنيكالىق ۋنيۆەرسيتەتى، Astana IT University، ق.جۇبانوۆ اتىنداعى اقتوبە وڭىرلىك ۋنيۆەرسيتەتى، ح.دوسمۇحامەدوۆ اتىنداعى اتىراۋ ۋنيۆەرسيتەتى سەكىلدى جوو-نا رەكتورلىق گرانت تاعايىندالدى.
«وليمپ شىڭىنا جەتەلەۋشى» نوميناسياسى بويىنشا پەداگوگ-تالىمگەرلەر مەن وليمپيادالىق كوماندالاردىڭ جاتتىقتىرۋشىلارى ماراپاتتالدى.