فۋكۋسيما اپاتىنا 12 جىل بولدى.
جاپونيا جۇرتشىلىعى تاعى دا شەرۋگە شىقتى، دەپ حابارلايدى اlmaty-akshamy.kz
بۇل شەرۋ 12 جىل بۇرىن بولعان فۋكۋسيما اپاتىمەن تىعىز بايلانىستى. بەلسەندىلەر توبى فۋكۋسيما-1 اتوم ەلەكتر ستانسياسىنان راديواكتيۆتى سۋدى مۇحيتقا توگۋگە قارسى.
12 جىل بۇرىن 2011 جىلى «فۋكۋسيما-1» اەس-دە الاپات اپات بولعان ەدى. بۇل چەرنوبىلدەن كەيىن سوڭعى 25 جىلداعى ەڭ ءىرى اپات بولىپ سانالادى. 9 بالدىق جەر ءسىلكىنىسىنەن پايدا بولعان 15 مەترلىك تەڭىز تولقىنى ستانسانىڭ ەنەرگوبلوكتارىن باسىپ قالىپ، گاز قۇيىلعان رەزەرۆۋار جارىلىپ، ولاردى قۋات كوزىنەن ءۇزىپ تاستاعان ەدى. ناتيجەسىندە رەاكتورلاردى سۋىتۋ جۇيەسى ىستەن شىقتى. اپاتتا 20 مىڭنان اسا ادام قازا تاپتى. رادياسيانىڭ كەسىرىنەن جارتى ميلليون تۇرعىن ءقاۋىپتى ايماقتان كوشىرىلىپ، مىڭداعان ءۇي تۇرۋعا جارامسىز بولىپ قالعان ەدى.
سودان بەرى جاپونيادا جىلدا ازا تۇتۋ ءراسىمى وتەدى. سونىمەن قاتار، ءار جۇما سايىن بەلسەندىلەر توبى نارازىلىق شەرۋىن وتكىزىپ كەلەدى. ولار فۋكۋسيما-1 اتوم ەلەكتر ستانسياسىنان راديواكتيۆتى سۋدى مۇحيتقا توگۋگە قارسى. بيلىكتىڭ بۇل شەشىمى ەكولوگيالىق اپاتقا اكەلەدى دەگەن پىكىردە. ءبىراق ەل ۇكىمەتى سۋ مۇحيتقا توگىلەر الدىندا ءسۇزىلىپ، راديواكتيۆتى ەلەمەنتتەردەن تازارتىلادى دەگەن جاۋاپ ايتۋدا.
ءقازىر ستانسيا قويماسىنداعى سۋ مولشەرى 1،3 ملن تونناعا جەتىپ، لىق تولىپ تۇر. بۇل سۋ رەاكتورلاردى سالقىنداتۋ ءۇشىن قولدانىلادى. شەرۋگە شىققان نارازى جۇرت "ۇكىمەت شەشىمىن وزگەرتپەسە، اپتا سايىن نارازىلىق شاراسىن وتكىزەمىز. راديواكتيۆتى سۋدى مۇحيتقا توگۋگە قارسىمىز. بۇل تەك جاپونياعا ەمەس، كورشىلەس جۇڭگو مەن كورەياعا، ءتىپتى بۇكىل الەمگە اسەرىن تيگىزەدى"، - دەپ مالىمدەدى.