جاپوندىقتار ابەنىڭ جەرلەۋ راسىمىنە قارسىلىق ءبىلدىردى

ابە مىرزا 8 شىلدە كۇنى ولتىرىلگەن بولاتىن.

توكيودا جۇزدەگەن ادام جاپونيانىڭ بۇرىنعى پرەمەر-مينيسترى سيندزو ابەنىڭ مەملەكەتتىك جەرلەۋ ءراسىمىن وتكىزۋگە قارسىلىق ءبىلدىرىپ، كوشەگە شىقتى، دەپ حابارلايدى Almaty-akshamy.kz ريا نوۆوستيگە سىلتەمە جاساپ.

اكسياعا قاتىسۋشىلاردىڭ كوبى «مەملەكەتتىك جەرلەۋگە قارسى!»، «جەرلەۋ راسىمىنەن باس تارتىڭىز!» دەپ جازىلعان پلاكاتتارمەن شىقتى، دەپ حابارلايدى ريا نوۆوستي. ازىرگە قاماۋعا الىنعاندار تۋرالى حابار جوق.

حالىق كوشەگە مارقۇم بولعان ەكس-پرەمەردى ەسكە الۋ ءۇشىن دە شىققان. مەملەكەت ازاماتتارى گۇل شوقتارىن كۋدانزاكا ساياباعىندا ورناتىلعان قۇرباندىق شالاتىن جەرلەرگە اكەلدى. ول جەرلەۋ ءراسىمى وتەتىن بۋدوكان (جەكپە-جەك ونەرى ءۇيى) ارەناسىنا جاقىن جەردە ورنالاسقان، دەپ حابارلايدى Kyodo. سالتاناتتى شارادا قاۋىپسىزدىكتى 20 مىڭعا جۋىق پوليسەي قامتاماسىز ەتەدى.

ابە مىرزا ۇستىمىزدەگى جىلدىڭ 8 شىلدەسىندە ميتينگىدە سويلەپ تۇرعان كەزدە ولتىرىلگەن بولاتىن. وعان وق اتقان 41 جاستاعى تەسۋيا ياماگامي قاماۋعا الىنعاننان كەيىن ساياساتكەردى نە سەبەپتەن ولتىرگەنىن ايتقان. ونىڭ ايتۋىنشا، سيندزو ابەدەن «بىرلىك شىركەۋى» ءدىني ۇيىمىمەن بايلانىسى بولعان، سول سەبەپتەن ساياساتكەر ونىڭ وتباسىن قۇرتقانى ءۇشىن كەك العىسى كەلگەن.  

قازاقستان اتىنان جەرلەۋ راسىمىنە مەملەكەت باسشىسىنىڭ تاپسىرۋىمەن پرەمەر-مينيستردىڭ ورىنباسارى - ق ر سىرتقى ىستەر ءمينيسترى مۇحتار تىلەۋبەردى قاتىسادى.