«جانۇياعا» جان جىلۋىن سىيلادى

ۇقك الماتى قالاسى بويىنشا دەپارتامەنتى «جانۇيا» بالالار ۇيىنە قامقورلىق كورسەتتى

ۇلتتىق قاۋىپسىزدىك كوميتەتىنىڭ (ۇقكد) الماتى قالاسى بويىنشا دەپارتامەنتىنىڭ قىزمەتكەرلەرى «جانۇيا» بالالار ۇيىنە تۇراقتى تۇردە قولداۋ كورسەتىپ وتىرادى، - دەپ حابارلايدى almaty-akshamy.kz

وسىلايشا، جاقىن كۇندەرى انيماسيالىق فيلم كورۋ ءۇشىن بالالار ءۇيىنىڭ 30 تاربيەلەنۋشىسىنە كينوتەاترعا ارنايى ساياحات ۇيىمداستىرىلدى. ودان كەيىن بالالارعا تۇسكى اس پەن تاتتىلەر بەرىلىپ، ويىنشىقتار مەن قاجەتتى ماۋسىمدىق كيىمدەر تابىس ەتىلدى.

«ءبىز بارلىق قىزمەتكەرلەرگە، ەرىكتىلەرگە جانە ۇلتتىق قاۋىپسىزدىك كوميتەتىنىڭ باسشىلىعىنا العىس ايتامىز. مۇنداي قولداۋ مەن تۇسىنىستىك ءاربىر تاربيەلەنۋشىمىز ءۇشىن وتە قاجەت. بالالارىمىز ءۇشىن جاسالعان مەرەكە ءۇشىن وتە قۋانىشتىمىز، ءارى ريزاشىلىعىمىزدى بىلدىرەمىز»، - دەدى بالالار ءۇيىنىڭ باسشىلىعى. 

«جانۇيا» كەشەنىنىڭ نەگىزى 1999 جىلى 350 تاربيەلەنۋشىگە ارنالىپ قالانعان. بۇل جەتىم بالالار مەن مۇمكىندىگى شەكتەۋلى بالالارعا ارنالعان بالاباقشا مەن تۇزەتۋ مەكتەبىن قامتيتىن ارنايى بالالار ءۇيى. مۇندا وقىتۋ مەن تاربيەلەۋ جۇيەسى ارنايى تۇزەتۋ باعدارلامالارى بويىنشا جۇرگىزىلەدى. بالالاردى تاربيەلەۋدە تاجىريبەلى پەداگوگتار مەن پسيحولوگتار كومەكتەسەدى.