ق ر پارلامەنت ماجىلىسىندە «جانۋارلارعا جاۋاپكەرشىلىكپەن قاراۋ» تۋرالى زاڭ جوباسى قارالىپ جاتىر. وسى زاڭ جوباسىنىڭ 5-بابىنىڭ 1-تارماعىنىڭ 5-تارماقشاسىنا رەداكسيا جاسالدى، دەپ حابارلايدى almaty-akshamy.kz baq.kz سىلتەمە جاساپ.
زاڭ جوباسىنىڭ 5-بابى جانۋارلاردى قاتىگەزدىكپەن قاراۋدان قورعاۋ تۋرالى بولاتىن. بۇعان دەيىنگى ماتىنىندە: «1. جانۋارلاردى قاراعان كەزدە: 5) جانۋارلاردىڭ جاراقاتتانۋىنا، مەرتىگۋىنە نەمەسە ءولىپ قالۋىنا اكەلەتىن ويىن-ساۋىق ءىس-شارالارىن ۇيىمداستىرۋعا جانە وتكىزۋگە تىيىم سالىنادى»، - دەپ كورسەتىلگەن.
ەگەر بۇل تارماقشا وسى بويى قابىلداناتىن بولسا، ەلىمىزدىڭ ۇلتتىق سپورت سالاسىنا تىيىم سالۋعا تۋرا كەلۋى مۇمكىن ەدى. سەبەبى ۇلتتىق سپورتىمىزدىڭ 80 پايىزعا جۋىعى ات ۇستىندە، سايات قۇستارىمەن، تازى يتتەرمەن تىكەلەي قاتىستى. ال «ءومىر بار جەردە ءولىم بار»، ءتۇرلى وقىس جاعداي تۋىنداۋى ابدەن مۇمكىن.
وسىنى ەسكەرە وتىرىپ، پارلامەنت ءماجىلىسىنىڭ دەپۋتاتتارى داريعا نازاربايەۆا مەن بەكبولات تىلەۋحان زاڭ جوباسىنا تۇزەتۋلەر ۇسىنعان بولاتىن.
بۇگىن زاڭ جوباسىن تالقىلاۋعا قاتىستى وتىرىستا اتالعان 5-تارماقشاعا تۇزەتۋلەر ەنگىزىلدى. وندا 5-تارماقشا ۇلتتىق سپورت تۇرلەرىنە قاتىسسىز ەكەنى كورسەتىلدى.
5-باپ. جانۋارلاردى قاتىگەزدىكپەن قاراۋدان قورعاۋ. 1. جانۋارلاردى قاراعان كەزدە: 5) قازاقستان رەسپۋبليكاسىنىڭ «دەنە شىنىقتىرۋ جانە سپورت تۋرالى» زاڭىنا سايكەس، جانۋارلار قولدانىلاتىن ۇلتتىق سپورت تۇرلەرىنىڭ سپورتتىق شارالارىن قوسپاعاندا، جانۋارلاردىڭ جاراقاتتانۋىنا، مەرتىگۋىنە نەمەسە ءولىپ قالۋىنا اكەلەتىن ويىن-ساۋىق ءىس-شارالارىن ۇيىمداستىرۋعا جانە وتكىزۋگە تىيىم سالىنادى، – دەلىنگەن جاڭا رەداكسيادا.