سەنات ءتوراعاسى قازاقستاندىقتاردى امال مەرەكەسىمەن قۇتتىقتادى
ق ر پارلامەنتى سەناتىنىڭ ءتوراعاسى ماۋلەن اشىمبايەۆ Facebook پاراقشاسىندا قازاقستاندىقتاردى امال مەرەكەسىمەن قۇتتىقتادى، دەپ حابارلايدى اlmaty-akshamy.kz
«قۇرمەتتى دوستار!
بارشاڭىزدى امال مەرەكەسىمەن شىن جۇرەكتەن قۇتتىقتايمىن!
امال – جاڭا جىلدىڭ جارشىسى، ءاز-ناۋرىزدىڭ باسى. بۇگىندە بۇل كۇن ەلدىڭ بەرەكە-بىرلىگىن ارتتىراتىن، ىزگىلىك پەن مەيىرىمدىلىك سياقتى يگى قۇندىلىقتاردى دارىپتەيتىن جالپىۇلتتىق مەيرامعا اينالدى. سوڭعى جىلداردا ۇلىستىڭ ۇلى كۇنىن ءدال وسى مەرەكەدەن باستاپ اتاپ ءوتۋىمىز سونىڭ جارقىن كورىنىسى.
قازىرگى تاڭدا ناۋرىز مەيرامىنىڭ مازمۇنىن ودان ءارى بايىتا تۇسۋگە باسا ءمان بەرىلىپ جاتقانى بەلگىلى. بۇل ءۇردىستىڭ «جاڭا قازاقستان» قۇرۋ جولىندا دا ماڭىزى زور. سەبەبى، ەلدىك مۇرات پەن ۇلتتىق مۇددە قاشاندا بارىنەن بيىك تۇرادى. سوندىقتان تاريحي سانانى جاڭعىرتۋعا سەپتىگىن تيگىزەتىن وسىنداي ءسالت-داستۇرىمىز ءاردايىم ايرىقشا مانگە يە.
شىن مانىندە، بۇل – قىستان امان شىققان اعايىننىڭ ارقا-جارقا بولىپ، كورىسىپ، كۇلىمدەسەتىن كۇنى. جانعا شۋاق سىيلايتىن وسىناۋ مەرەكەمەن قۇتتىقتاي وتىرىپ، ءار شاڭىراققا شاتتىق، اماندىق جانە باق-بەرەكە تىلەيمىن. امال قۇتتى بولسىن، اعايىن!»، - دەپ جازدى ماۋلەن اشىمبايەۆ.