جانداربەك بەكشين ەلدە بار تۇماۋعا قارسى ۆاكسينا تۇرلەرىنە توقتالدى

الماتى قالاسىندا تۇماۋ ماۋسىمىنداعى ۆاكسينا ماسەلەسى قاراستىرىلدى.

الماتى قالاسىندا جاڭا تۇماۋ ماۋسىمىنىڭ الدىندا قوسىمشا 50 مىڭ ەكپە دوزاسىن ساتىپ الۋ ماسەلەسى قاراستىرىلىپ جاتىر. بۇل تۋرالى سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى، قالانىڭ باس مەملەكەتتىك سانيتار دارىگەرى جانداربەك بەكشين مالىمدەدى، دەپ حابارلايدى Almaty-akshamy.kz Informburo.kz-كە سىلتەمە جاساپ.

«تۇماۋدىڭ جاڭا ماۋسىمى الدىندا قوعامدىق دەنساۋلىق ساقتاۋ باسقارماسى 130 مىڭ دوزاعا سۇرانىس جىبەردى. سونداي-اق، قوسىمشا 50 مىڭ دوزاعا سۇرانىس جىبەرۋ ماسەلەسى قاراستىرىلىپ جاتىر»، – دەدى ۆەدومستۆو باسشىسى.

جانداربەك بەكشين ەلدە بار تۇماۋعا قارسى ۆاكسينا تۇرلەرىنە توقتالدى. ول قانداي دا ءبىر ەكپەنى جارنامالاعىسى كەلمەيتىنىن ايتىپ ءوتتى.

«ءدال ءقازىر قانداي ەكپە جەتكىزىلەتىنىن ايتا المايمىز. ويتكەنى، كونكۋرستىق پروسەدۋرالاردى دەنساۋلىق ساقتاۋ مينيسترلىگى وتكىزەدى. گوللانديانىڭ «ينفليۋۆاك» ۆاكسيناسى تۋرالى بىلەمىز. بىزدە رەسەيدىڭ «گريپپول» جانە تاعى فرانسيا ەكپەسى بار. ولاردىڭ تيىمدىلىگى دالەلدەنگەن. سول سەبەپتى جەكە ءبىر ۆاكسينانى الىپ جارنامالاعىم كەلمەيدى»، – دەدى جانداربەك بەكشين.

مۇنىمەن قاتار، ۆەدومستۆو وكىلى اتالعان ەكپەلەردى اقىلى نەگىزدە الۋ ماسەلەسىنە توقتالدى.