الماتىداعى اباتتاندىرۋ جۇمىستارىنا «جاڭارۋ كۇنى» ەرەكشە قارقىن قوستى. وسى كۇنگە وراي الاتاۋ اۋدانىنىڭ دارحان ىقشاماۋدانىندا 150 اعاش وتىرعىزىلدى. يگى ىسكە اۋدان اكىمدىگى، ەرىكتىلەر مەن بەلسەندى تۇرعىندار اتسالىستى.
اۋداندىق كورىكتەندىرۋ ءبولىمىنىڭ باس مامانى ماديار ابۋيەۆتىڭ ايتۋىنشا، بۇل – كەشەندى كوگالداندىرۋدىڭ العاشقى قادامى.
– ناۋرىز مەرەكەسىنە وراي وسى جەرگە جوكە مەن شاعان اعاشتارى ەگىلدى. الداعى ەكى ايدا تاعى 500 ءتۇپ كوشەت وتىرعىزۋ جوسپارلانىپ وتىر. بۇرىن بۇل اۋماق قاراۋسىز قالىپ، بەي-بەرەكەت قوقىس الاڭىنا اينالعان ەدى. ءبىز مۇندا تۇراقتى تۇردە سەنبىلىكتەر ۇيىمداستىرىپ، تازالىق جۇمىستارىن جۇرگىزىپ كەلەمىز. كوگالداندىرۋ – ەكولوگيانى جاقسارتۋدىڭ ەڭ ءتيىمدى جولدارىنىڭ ءبىرى، – دەدى ول.
دارحان ىقشاماۋدانىنىڭ تۇرعىنى دينا سارمانتايەۆانىڭ ايتۋىنشا، اۋماق حالىق قاتىساتىن بيۋدجەت جوباسى اياسىندا ءتىپتى دە كورىكتى بولا تۇسپەك.
– بۇرىن بۇل جەر قاراۋسىز، قوقىستار ۇيىلگەن اۋماق ەدى. ەندى ول بالالار ءۇشىن تازا ءارى جايلى ويىن الاڭىنا اينالعالى وتىر. جاقىندا مۇندا بالالار الاڭى سالىنادى، بۇل تۇرعىنداردى قۋانتىپ جاتىر – دەيدى يگى ءىس بارىسىندا.
الاتاۋ اۋدانىندا بيىل 3000-عا جۋىق اعاش وتىرعىزۋ جوسپارلانعان. بۇل جۇمىسقا اۋدان اكىمدىگى مەن مەردىگەر ۇيىمداردان بولەك، جاستار دا بەلسەندى قاتىسۋدا. كورىكتەندىرۋ ءبولىمىنىڭ باس مامانى ۇدەرىستىڭ قالاي ءجۇرىپ جاتقانىن ءتۇسىندىردى:
– وتكەن جىلى اۋدان بويىنشا 65 مىڭ اعاش وتىرعىزىلسا، ونىڭ 5000-ى قىلقان جاپىراقتى جانە جاپىراقتى اعاشتار بولاتىن. بيىل بۇل كورسەتكىش ارتا تۇسەدى دەپ كۇتىلۋدە ، – دەدى م.ابۋيەۆ.
جاقىن ارادا كوشەتتەر رايىمبەك داڭعىلى، مومىش ۇلى كوشەسى جانە رىسقۇلوۆ داڭعىلى بويىنداعى بوس جەرلەرگە دە وتىرعىزىلماق. قالانى كوگالداندىرۋ اكىمدىك قانا ەمەس، قالا تۇرعىندارىنىڭ دا قولداۋىمەن جۇزەگە اسپاق.
ەكولوگيانى جاقسارتۋ – ءار ازاماتتىڭ جاۋاپكەرشىلىگى. الماتىنى كوركەيتۋگە ۇلەس قوسقىسى كەلەتىن كەز كەلگەن ادام وسىنداي باستامالارعا قاتىسا الادى.