جاڭادان قۇرىلعان وبلىستاردا ونەركاسىپ ءوندىرىسىنىڭ كولەمى ارتادى

بۇل تۋرالى ۇلتتىق ەكونوميكا ءمينيسترى الىبەك قۋانتىروۆ ءمالىم ەتتى، دەپ حابارلايدى Almaty-akshamy.kz Egemen.kz-كە سىلتەمە جاساپ.

«وڭىرلەردەگى الەۋمەتتىك-ەكونوميكالىق كورسەتكىش ءوسىمىنىڭ قارقىنىنا توقتالعىم كەلەدى. 2022 جىلدىڭ قورىتىندىسى بويىنشا اباي وبلىسىنداعى وڭىرلىك جالپى ءونىم كولەمى - 2 ترلن تەڭگەگە دەيىن، جەتىسۋ وبلىسىندا 1،1 ترلن تەڭگەگە دەيىن ارتادى، ال ۇلىتاۋ وبلىسىندا وڭىرلىك جالپى ءونىم - 1،2 ترلن تەڭگە»، - دەدى الىبەك قۋانتىروۆ ورتالىق كوممۋنيكاسيالار قىزمەتىندە.

ونىڭ ايتۋىنشا، 2022 جىلى اباي وبلىسىنىڭ جەكە تابىسى 70 ملرد تەڭگەنى، جەتىسۋ وبلىسىندا 58 ملرد تەڭگەنى، ۇلىتاۋ وبلىسىندا 48 ملرد تەڭگەنى قامتيدى.

«الدىن الا جاسالعان ەسەپتەۋلەرگە قاراعاندا، جاڭادان قۇرىلعان الماتى وبلىسى الداعى ۋاقىتتا رەسپۋبليكالىق بيۋدجەتتىڭ دونورى بولۋعا قاۋقارلى. سونىمەن قاتار جاڭادان قۇرىلعان وڭىرلەر بويىنشا ونەركاسىپ ءوندىرىسىنىڭ كولەمى ارتادى. ونىڭ ىشىندە اباي وبلىسىندا 1 ترلن تەڭگەگە دەيىن، جەتىسۋ وبلىسىندا 275 ملرد تەڭگەگە، ۇلىتاۋ وبلىسىندا 855 ملرد تەڭگەگە ارتادى»، - دەدى مينيستر.