ەلىمىز بويىنشا كۇردەلى جوندەۋ جۇمىستارى ءجۇرىپ جاتقان 250 مەكتەپتىڭ 35ء-ى ءوز مەرزىمىنەن كەشىگىپ جاتىر.
ونىڭ ىشىندە جامبىل وبلىسى دا بار. جاڭا وقۋ جىلىندا ايماقتا مەكتەپتەردىڭ جەتىسپەۋى ماسەلە تۋدىرۋى مۇمكىن. ويتكەنى وڭىردەگى كۇردەلى جوندەۋ كورۋى ءتيىس 17 مەكتەپتىڭ التاۋىنىڭ قۇرىلىسى تىم كەش باستالعان، دەپ حابارلايدى Almaty-akshamy.kz Qazaqstan.tv-عا سىلتەمە جاساپ.
جوندەۋ جۇمىسىنا قۇرىلىسشى ماماندار ماۋسىم ايىنىڭ سوڭى مەن شىلدەدە عانا كىرىسكەن كورىنەدى. بۇعان مەملەكەتتىك ساتىپ الۋ جۇمىسىنىڭ باياۋ جۇرگىزىلۋى دە سەبەپ. ءبىلىم باسقارماسىنىڭ ماماندارى مەردىگەرلەردى اسىقتىرىپ جاتقانىن ايتادى. ال قۇرىلىسى كەش باستالعان تارازداعى №28 مەكتەپتە 600 بالا وقيدى. 50 جىل بۇرىن سالىنعان ەسكى ءبىلىم وشاعىن جاڭالاۋ جۇمىستارى ۋاقىتىلى اياقتالمايتىن ءتۇرى بار. سوندىقتان ءبىلىم ۇياسىنىڭ باسشىلىعى وقۋشىلاردى ونلاين وقىتۋدىڭ قامىنا كىرىسىپ كەتكەن.
«1-سىنىپقا باراتىندار مەن 9-11-سىنىپ وقۋشىلارى كورشى مەكتەپتە وقيدى. ويتكەنى ءبىتىرۋشى سىنىپتار ءداستۇرلى تۇردە وقۋى كەرەك. باسقا سىنىپتاردى ونلاين تۇردە وقىتامىز دەپ وتىرمىز. ءبىز بۇل ۇسىنىسىمىزدى تاراز قالالىق ءبىلىم بولىمىنە جولدادىق. ولار قولداپ وتىر»، - دەيدى №28 مەكتەپ ديرەكتورى سۆەتلانا گۋرسكايا.
ايماقتاعى 17 مەكتەپتىڭ كۇردەلى جوندەۋىنە 4،4 ملرد تەڭگە بولىنگەن.
ال قۇرىلىستىڭ كەشىگۋىنە تەندەر تالاپتارىنان بولەك مەردىگەرگە بەرىلەتىن رۇقسات قاعازدىڭ كەش بەرىلۋى دە سەبەپ. سونداي-اق جۇمىسشىلاردىڭ تاپشىلىعى دا اسەر ەتكەن. ايتا كەتەيىك، ايماق بويىنشا 1 اپاتتى جانە ءۇش اۋىسىمدى 4 مەكتەپ بار.
«قازىرگى تاڭدا قۇرىلىس ەسەبىنەن بارىنە قارجى قاراستىرىلىپ، جىلدارى 3 اۋىسىمدى مەكتەپتەردىڭ ماسەلەسىن شەشەمىز دەپ جوسپارلاپ وتىرمىز. ال ءبىر اپاتتى مەكتەپ ماسەلەسى كەلەسى جىلى شەشەمىز دەپ وتىرمىز. ويتكەنى مەملەكەتتىك ساراپتاماعا جوبالىق سمەتالىق قۇجاتتاماسى وتكىزىلدى»، - دەيدى وبلىستىق ءبىلىم باسقارماسىنىڭ ءبولىم باسشىسى دينارا جاڭابايەۆا.
.