جاڭا وقۋ جىلىنان باستاپ وقۋشىلار دۇيسەنبى سايىن ءانۇراندى شىرقايدى

جاقسى ءداستۇر.

قازاقستاننىڭ ءبىلىم جانە عىلىم ءمينيسترى اسحات ايماعامبەتوۆ مەكتەپتەرگە ادىستەمەلىك نۇسقاۋ حاتتا ارنايى تاپسىرما بەرەتىنىن جەتكىزدى، دەپ حابارلايدى Almaty-akshamy.kz Baq.kz سىلتەمە جاساپ.

«مەكتەپتەگى جاقسى ءداستۇردىڭ ءبىرى – ءار اپتا سايىن لينەيكا وتكىزىپ، ەلىمىزدىڭ مەملەكەتتىك ءانۇرانىن ايتۋ. بۇل دا بۇرىننان قالىپتاسىپ كەلە جاتقان يگى ءداستۇر. ءبىراق ونى بارلىق مەكتەپتە بىردەي ىسكە اسىرىلىپ جاتىر دەپ تە ايتۋعا بولمايدى. سوندىقتان بۇل ماسەلەنى بيىلعى ادىستەمەلىك نۇسقاۋ حاتتا جەكە بەلگىلەپ، وسى تاپسىرمانى بەرىپ جاتىرمىز»، - دەپ ايتتى ايماعامبەتوۆ.

ءبىلىم جانە عىلىم ءمينيسترى بۇل ماسەلەنىڭ ماڭىزدى ەكەنىن ايتتى.

«كەشە عانا مەملەكەتتىك رامىزدەرىمىزدىڭ 30 جىلدىق مەرەيتويىن اتاپ وتتىك. بالالارىمىزدىڭ مەملەكەتتىك رامىزدەرگە قۇرمەتپەن قاراۋعا تاربيەلەۋ، جالپى ولاردى ءبىلۋ اسا ماڭىزدى. بالاعا ءانۇراندى ايتۋعا بالاباقشادان، مەكتەپ تابالدىرىعىن اتتاعان كەزدەن باستاپ تاربيەلەۋ كەرەك. سوندىقتان ءار اپتا سايىن دۇيسەنبىدە وقۋشىلار ساپقا تۇرىپ، ءانۇراندى شىرقاۋ ءداستۇرى بولعانى دۇرىس. بۇل جۇمىستى دا باسقا دا مەكتەپتەردە جالعاستىرۋ قاجەت»، - دەپ ءتۇسىندىردى باس ۇستاز جينالىستا.