جاڭا اتا زاڭنىڭ جوباسىندا قازاقستاننىڭ مەملەكەتتىك ۇيىمداستىرىلۋىن ايقىندايتىن، ەگەمەندىگى مەن دەربەستىگىن نىعايتاتىن ىرگەلى ەرەجەلەر قاراستىرىلدى. بۇل تۋرالى كونستيتۋسيالىق سوت ءتوراعاسىنىڭ ورىنباسارى باقىت نۇرمۇحانوۆ كونستيتۋسيالىق كوميسسيانىڭ كەزەكتى وتىرىسىندا مالىمدەدى، - دەپ حابارلايدى Aqshamnews.kz.
ول كونستيتۋسيانىڭ جوباسىن تانىستىردى جانە اتالعان ەرەجەلەر «كونستيتۋسيالىق قۇرىلىستىڭ نەگىزدەرى» اتتى ءبىرىنشى بولىمگە ەنگىزىلگەنىن اتاپ ءوتتى.
«قۇجاتقا سايكەس، قازاقستان رەسپۋبليكاسى – ۋنيتارلى مەملەكەت. باسقارۋ نىسانى – پرەزيدەنتتىك رەسپۋبليكا دەپ تۇجىرىمدالدى. وسىلايشا بۇرىن ءبىرقاتار عالىمدار مەن مامانداردىڭ باسقارۋ نىسانىن ناقتىلاۋ قاجەتتىگى تۋرالى ۇسىنىسى جۇزەگە استى»، – دەدى باقىت نۇرمۇحانوۆ.
بۇل رەتتە كوميسسيا مۇشەسىنىڭ ايتۋىنشا، ەلىمىزدىڭ اكىمشىلىك-اۋماقتىق قۇرىلىسىن قاتارداعى زاڭمەن ەمەس، كونستيتۋسيالىق زاڭمەن ايقىنداۋ ۇسىنىلعان.
«ەگەمەندىك پەن تاۋەلسىزدىك، ۋنيتارلىق، اۋماقتىق تۇتاستىق، رەسپۋبليكانىڭ باسقارۋ نىسانى ەشقاشان وزگەرمەيتىن قۇندىلىقتار قاتارىنا جاتقىزىلدى. بۇل مىزعىماس تالاپ كونستيتۋسيانىڭ العاشقى نورمالارىندا بەكىتىلدى»، – دەدى كونستيتۋسيالىق سوت ءتوراعاسىنىڭ ورىنباسارى.
سونىمەن بىرگە، سپيكەر كوميسسيانىڭ كەشەگى وتىرىسىندا ەگەمەندىكتىڭ يەسى – حالىق ەكەنىن كونستيتۋسيالىق دەڭگەيدە بەكىتۋ تۋرالى ۇسىنىس جاسالعانىن ەسكە سالدى.
«بۇل يدەيا كونستيتۋسيا ماتىنىندە كورىنىس تاپتى. 4-باپتا مەملەكەتتىك بيلىكتىڭ بىردەن-بىر باستاۋى جانە ەگەمەندىك يەسى – قازاقستان حالقى، دەپ شەگەلەنىپ جازىلدى»، – دەدى باقىت نۇرمۇحانوۆ.
ونىڭ ايتۋىنشا، كونستيتۋسيا ماتىنىندە «رەسپۋبليكالىق رەفەرەندۋم» ۇعىمى «جالپىحالىقتىق رەفەرەندۋم» دەپ وزگەرتىلدى. بۇدان بولەك، حالىق بيلىكتى جالپىحالىقتىق رەفەرەندۋم جانە ەركىن سايلاۋ ارقىلى تىكەلەي جۇرگىزەدى جانە ءوز بيلىگىن جۇزەگە اسىرۋدى مەملەكەتتىك ورگاندارعا بەرەدى، دەگەن نورما تۇجىرىمدالدى.