وڭىرلىك كوممۋنيكاسيالار قىزمەتى الاڭىندا قازاقستان رەسپۋبليكاسىنىڭ جاڭا كونستيتۋسياسى جوباسىنا ارنالعان ساراپتامالىق تالقىلاۋ ءوتتى. وندا قۇجاتتاعى نەگىزگى وزگەرىس پەن ولاردىڭ مەملەكەتتىڭ دامۋى مەن ازاماتتاردىڭ قۇقىقتارىن قورعاۋداعى ماڭىزى ءسوز بولدى. فيلوسوفيا، ساياساتتانۋ جانە ءدىنتانۋ ينستيتۋتىنىڭ ديرەكتورى، جاڭا كونستيتۋسيا جوباسىن ازىرلەۋ جونىندەگى جۇمىس توبىنىڭ مۇشەسى ايگۇل ءسادۋاقاسوۆا وسى جوباعا بايلانىستى ءوز ويىن ايتتى. ونىڭ ايتۋىنشا، بۇل وزگەرىس جۇيەلى سيپاتقا يە جانە قازىرگى زاماندا مەملەكەت، قوعام مەن جەكە تۇلعانىڭ ءوزارا قالاي ارەكەت ەتەتىنىن ناقتى ايقىندايدى.
«جاريالانعان كونستيتۋسيا جوباسى، ەڭ الدىمەن، ءبىزدىڭ قۇندىلىقتار جۇيەمىزدى ايقىندايدى. پرەامبۋلادا قازاقستان حالقىنىڭ ءبىرتۇتاس تۇسىنىگى مەن ءوزىمىزدى مىڭجىلدىق ۇلى دالانىڭ ۇرپاقتارى رەتىندە تانۋىمىز ناقتى كورسەتىلگەن. كونستيتۋسيا تەك نەگىزگى زاڭ عانا ەمەس، سونىمەن قاتار بولاشاق دامۋدىڭ باعدارشامى دا»، – دەپ اتاپ ءوتتى ايگۇل ءسادۋاقاسوۆا.
ءقازىر سيفرلىق ورتانىڭ اۋقىمى ۇلعايىپ كەلە جاتقاندىقتان، قۇجاتتا سيفرلىق كەڭىستىكتەگى ادامنىڭ قادىر-قاسيەتى مەن ازاماتتاردىڭ قۇقىعىن قورعاۋعا ەرەكشە كوڭىل بولىنگەنىن ايتتى ساراپشى.
«ءقازىر ءبىز مىنا ومىردەن بولەك الەمدە، سيفرلىق ورتادا دا ءومىر ءسۇرىپ وتىرمىز. ول جەردە دە سول قۇندىلىقتار ساقتالىپ، ادامنىڭ جەكە كەڭىستىگى مەن دەرەكتەرىن قورعاۋ قۇقىعى قۇرمەتتەلۋى كەرەك. بۇل ۇستانىمدار كونستيتۋسيا جوباسىندا ناقتى كورسەتىلگەن»، – دەپ ءتۇسىندىردى.
ساراپشىنىڭ ايتۋىنشا، ادام كاپيتالىن ەلدىڭ باستى رەسۋرسى رەتىندە دامىتۋ - نەگىزگى باسىمدىقتىڭ ءبىرى بولىپ قالىپتى. كونستيتۋسيا جوباسىندا ءبىلىم بەرۋ، عىلىم، مادەنيەت پەن يننوۆاسيالار مەملەكەتتىڭ ۇزاق مەرزىمدى دامۋ ستراتەگياسىنىڭ نەگىزى رەتىندە بەكىتىلمەك.
«ادام كاپيتالى دامۋدىڭ باستى كوزى بولىپ قالعان. بۇل ءبىلىم بەرۋ، عىلىم، دەنساۋلىق ساقتاۋ مەن مادەنيەت جۇيەلەرى ەلدىڭ تۇراقتى بولاشاعىن قالىپتاستىرۋعا جۇمىس ىستەيدى دەگەن ءسوز. جاڭا جوبا جاڭا داۋىرگە ءبىلىم، عىلىم مەن يننوۆاسيالار ارقىلى قادام باساتىنىمىزدى كورسەتەدى»، – دەدى.
سونىمەن قاتار ساراپشى جاڭا كونستيتۋسيا جوباسىندا زياتكەرلىك مەنشىك قۇقىعىن قورعاۋ كەپىلدىكتەرى كەڭەيتىلىپ، سيفرلىق ورتانى رەتتەۋدىڭ جاڭا تەتىكتەرى، سونىڭ ىشىندە دەربەس دەرەكتەردى قورعاۋ مەن سيفرلىق قۇقىقبۇزۋشىلىقتارعا قارسى ءىس-قيمىل نورمالارى ەنگىزىلەتىنىن اتاپ ءوتتى.
«بۇل الاياقتىق پەن جەكە اقپاراتتى زاڭسىز پايدالانۋ جاعدايلارى ءجيى كەزدەسەتىن سيفرلىق كەڭىستىكتە ازاماتتاردىڭ قۇقىقتارىن قورعاۋ جولىنداعى ماڭىزدى قادام. كونستيتۋسيالىق نورمالار جاڭا ەرەجەلەر مەن ءتارتىپتى قالىپتاستىرۋعا مۇمكىندىك بەرەدى»، – دەپ اتاپ كورسەتتى ول.
بۇدان بولەك، جوبا بيلىك تارماقتارى اراسىنداعى تەپە-تەڭدىك پەن ۇكىمەتتىڭ قوعام الدىنداعى ەسەپتىلىگىن كۇشەيتەدى. اتاپ ايتقاندا، زاڭ جوباسىن قاراۋدىڭ جاڭا ءراسىمى ەنگىزىلىپ، كونسۋلتاتيۆتىك جانە زاڭنامالىق قاتىسۋ تەتىكتەرى كەڭەيمەكشى.
«كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» مودەلى ودان ءارى دامىتىلادى. باقىلاۋ مەن جاۋاپكەرشىلىك تەتىگى كۇشەيىپ، بۇل باسقارۋدىڭ اشىق ءارى تەڭگەرىمدى بولۋىنا ىقپال ەتەدى»، – دەپ تۇيىندەدى ءوز ويىن ساراپشى.
تالقىلاۋ قورىتىندىسى بويىنشا ساراپشىلار جاڭا كونستيتۋسيا جوباسى تاريحي جانە مادەني قۇندىلىقتاردى قۇرمەتتەۋدى قازىرگى جانە بولاشاق سىن-قاتەرلەرگە جاۋاپ بەرۋگە دايىندىقپەن ۇشتاستىراتىن ەل دامۋىنىڭ تۇتاس فيلوسوفياسىن قالىپتاستىراتىنىن اتاپ ءوتتى.