بۇل ءسىز ءۇشىن نە - بوس ىرىم، حالىق ماتەلى نەمەسە ۇران؟
تاريحشىلاردىڭ پايىمداۋىنشا، «جاڭا جىلدى قالاي قارسى الساڭ، جىلدى سولاي وتكىزەسىڭ» دەگەن ماتەل كونە ريم تۇسىندا بەلگىلى بولعان، سوندىقتان بۇل وتە ەرتەدەن كەلە جاتقان ءسوز.
جاڭا جىل – كونە زاماننان كەلە جاتقان مەيرامنىڭ ءبىرى. ادامدار ۋاقىت پەن ءومىردىڭ سيكلدىك وزگەرىسىن تۇسىنگەننەن بەرى ونى تويلاي باستاعان. ياعني، جاڭا ۋاقىتتىڭ باستاۋى، ەسكىدەن تازارىپ، جاڭانىڭ كەلۋى، بولاشاققا دەگەن جاڭا جوسپارلار مەن ءۇمىت - مۇنىڭ بارلىعى مىڭداعان جىلدار بويى ادامدار ومىرىندەگى ماڭىزدى پسيحولوگيالىق ءسات بولدى.
ۋاقىتتىڭ سيكلدىك وزگەرىسىن جانە جاڭا جىلدىڭ باستالۋىن بىلگەن ەرتە زامانعى ادامدار بولاشاق بۇگىنگى كۇننىڭ جالعاسى دەپ سانادى. بولاشاقتان ءۇمىت كۇتكەن ولار قالاعان نارسەلەرىن جۇزەگە اسىرۋعا تىرىستى. وسىدان كەلىپ ءتۇرلى ىرىمدار مەن راسىمدەر پايدا بولدى.
ويتكەنى بارلىعىمىز جاڭا جىلدى جاقسى كورەتىن ادامداردىڭ ورتاسىندا قارسى الۋعا تىرىسامىز. مول داستارحان جايىپ، كوتەرىڭكى كوڭىل-كۇيدە بولۋ، مۇنىڭ بارلىعى پسيحولوگيالىق تۇرعىدان قاراعاندا الداعى 365 كۇنگە جەتەتىندەي قۋات الۋ بولىپ ەسەپتەلەدى. ارينە، ءبىز وسى ارەكەتتەرمەن بەيسانالىق تۇردە الەمگە قۋانىش، سۇيىسپەنشىلىك، مولشىلىق جانە جاقسىلىق تۋرالى حابار جىبەرەمىز جانە ول بىزگە ءجۇز ەسەلەپ قايتادى دەپ ويلايمىز.