سوڭعى تاۋلىكتە جەدەل جاردەم قىزمەتىنىڭ ورتالىعىنا حالىقتان 27 مىڭعا جۋىق قوڭىراۋ ءتۇستى. ونىڭ 17 مىڭنان استامى ءبىرىنشى–ءۇشىنشى دارەجەدەگى شۇعىل شاقىرۋلار ساناتىنا كىردى، ال ءتورتىنشى دارەجەدەگى شاقىرۋلار بويىنشا جەدەل جاردەم بريگادالارى 10 مىڭنان استام رەت شىقتى.
ەڭ كوپ شاقىرۋلار الماتى وبلىسىنان تىركەلدى – 3073. ودان كەيىن الماتى قالاسى – 2800 شاقىرۋ، تۇركىستان وبلىسى – 2358 جانە استانا قالاسى – 1942 شاقىرۋ.
«وتكەن جىلدىڭ 11 ايىندا جەدەل جاردەم بريگادالارى ەلىمىز بويىنشا 7،7 ميلليوننان استام شاقىرۋدى قابىلدادى. ونىڭ ىشىندە 4،9 ميلليون شاقىرۋ ءبىرىنشى–ءۇشىنشى دارەجەگە جاتقىزىلدى، ال 2،8 ميلليون شاقىرۋ ءتورتىنشى دارەجەگە كىرىپ، ەمحانالار جانىنداعى بريگادالار قىزمەت كورسەتتى. جالپى شاقىرۋلار سانىنىڭ ارتۋىنا قاراماستان، رەانيماسيانىڭ ءساتتى كورسەتكىشتەرى جىل ىشىندە 7،1 %-عا ءوسىپ، بارلىق تىركەلگەن جاعدايلاردىڭ 51،7 %-ىن قۇرادى»، – دەپ حابارلادى دەنساۋلىق ساقتاۋ مينيسترلىگى.