جاڭا ەتج قالانىڭ 2040 جىلعا دەيىنگى باس جوسپارىنا سايكەس ازىرلەندى.
باس جوسپاردا مەگاپوليستى دامىتۋدىڭ مونوورتالىق مودەلىنەن پوليورتالىققا كوشۋ ءپرينسيپى جاتىر، دەپ حابارلايدى Almaty-akshamy.kz.
وسىلايشا، 2030 جىلعا دەيىن قالا اكىمدىگىنىڭ جوبالىق ءوفيسى اياسىندا 5 پوليورتالىق قۇرىلادى، ولار: «شىعىس قاقپالارى»، «تاريحي ورتالىق»، «سولتۇستىك»، «وڭتۇستىك-باتىس»، «باتىس».
پوليورتالىقتار - الماتى تۇرعىندارى مەن قوناقتارى، بيزنەس وكىلدەرى ۇمتىلاتىن قوعامدىق جانە ىسكەرلىك بەلسەندىلىك ورتالىقتارى. مەگاپوليس 2025 جىلعا قاراي بەس ارنايى ايماققا بولىنەدى.
ءبىرىنشىسى - «شىعىس قاقپاسى». اتالعان پوليورتالىق تالعار جانە قۇلجا تراكتتارى اۋدانىندا ورنالاسادى. بۇل ورتالىق الماتىنىڭ لوگيستيكالىق حابىنا اينالادى، مۇندا LRT ستانسياسى (جەر ءۇستى مەتروسى)، BRT جەلىسى (جۇردەك اۆتوبۋس كولىگى) سالىنادى جانە بۇل پوليورتالىق كورمە-ويىن-ساۋىق ورنىنا اينالادى.
«تاريحي ورتالىق» مەدەۋ اۋدانىندا، «التىن الاڭ» بايتۇرسىنوۆ كوشەسى – اباي – زەنكوۆ – جىبەك جولى داڭعىلى شەكارالارىندا ورنالاساتىن بولادى. وسى جەردەن بارلىق ونەركاسىپتىك كاسىپورىندار مەن ارنايى مەكەمەلەر قالانىڭ باسقا اۋداندارىنا كوشىرىلىپ، تاريحي-مادەني ماڭىزى بار عيماراتتار قالپىنا كەلتىرىلەدى. جالپى، وسى پوليورتالىقتا اباتتاندىرۋ جالعاسادى، ۆەلوجولاقتار مەن ۆەلوجولدار، كوپتەگەن تۇراق ورىندارى پايدا بولادى.
«سولتۇستىك» پوليورتالىعى «الماتى-1» تەمىرجول ستانسياسىنا ىرگەلەس اۋماقتا ورنالاسادى. مۇندا قىزمەت كورسەتۋ سالاسى بەلسەندى داميتىن بولادى، قۇرىلىستاردا ءبىرىنشى قاباتتار شاعىن بيزنەسكە جالعا بەرىلەدى، كوشەلەر تىعىزق بولادى، سكۆەرلەر سالىنادى، ۇاك بويىندا، بۇرىنعى «زەلەنستروي»، باۋم توعايىنىڭ اۋماعىندا دەمالىس ورىندارى جابدىقتالادى.
«وڭتۇستىك-باتىس» پوليورتالىعىندا (رايىمبەك داڭعىلى جانە الاتاۋ كوشەسى) شاعىن ونەركاسىپتىك پاركتەر، ساۋدا جانە لوگيستيكا وبەكتىلەرى، اكىمشىلىك-ىسكەرلىك ورتالىقتار، ال «باتىس» پوليسيا ورتالىعىندا («الماتى-3» جاڭا تەمىرجول ۆوكزالى جانە بورالداي كەنتىندەگى كولىك حابى اۋدانى) بارلىق قاجەتتى ينفراقۇرىلىم جۇرگىزىلەدى، ونىڭ ىشىندە «ساق قورعاندارى» ەتنوگرافيالىق پاركىنىڭ اينالاسىندا.
بۇل ورتالىقتا 90 گا جەلىلىك رەكرەاسيالىق ساياباق، جاڭا كوپسالالى اۋرۋحانا كەشەنى، ۇستەل تەننيسى ورتالىعى جانە ت.ب. سالۋ جوسپارلانۋدا.
ەسكە سالساق، جاڭا ەتج-نىڭ نەگىزگى ماقساتى – ينفراقۇرىلىمنىڭ ستراتەگيالىق دامۋىن ەسكەرە وتىرىپ، حاوتيكالىق قۇرىلىستى بولدىرماۋ جانە جەر ۋچاسكەلەرىن ءتيىمدى ءبولۋ.
ەتج-دا الماتىنىڭ ۇزدىك الەمدىك تاجىريبەلەرى، گەوگرافيالىق جانە كليماتتىق ەرەكشەلىكتەرى ەسكەرىلدى. ولار تۇراقتى جانە فۋنكسيونالدى قالالىق كەڭىستىكتى قۇرۋعا باعىتتالعان، قالا قۇرىلىسىن ايماقتارعا ءبولۋدىڭ، قىزىل سىزىقتاردىڭ، حالىققا الەۋمەتتىك، مادەني جانە كوممۋنالدىق قىزمەت كورسەتۋ وبەكتىلەرىن ورنالاستىرۋ ءۇشىن اۋماقتاردى رەزەرۆتەۋدىڭ، كوشە-جول جەلىسىن ۇيىمداستىرۋدىڭ، ينجەنەرلىك كوممۋنيكاسيالاردى تراسسالاۋدىڭ، اۋماقتاردى اباتتاندىرۋ مەن كوگالداندىرۋدىڭ نەگىزگى باعىتتارىن بەلگىلەيدى.