الماتى قالاسىنىڭ وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا الماتى جاستارىن قولداۋعا باعىتتالعان اۋقىمدى جوبالار تۋرالى اقپارات ايتىلدى.
قالادا جالپى 14 پەن 35 جاس ارالىعىنداعى 695،6 مىڭنان اساتىن جاستار تۇرادى. ىسكە اسىرىلىپ جاتقان جوبالار تۋرالى تولىعىراق جاستار ساياساتى باسقارماسىنىڭ باسشىسى ازيز كاجدەنبەك توقتالدى، دەپ حابارلايدى aqshamnews.kz.
سپيكەردىڭ ايتۋىنشا، قالا اكىمدىگى ءتورت نەگىزگى باعىتتا بەلسەندى جۇمىس ىستەۋدە، ونىڭ ىشىندە ءبىلىم بەرۋ جانە جۇمىسپەن قامتۋ، جاستارعا ارنالعان ينفراقۇرىلىمدى دامىتۋ، مادەني جانە سپورتتىق ءىس-شارالارعا تارتۋ، سونداي-اق جاڭا جاتاقحانالارمەن قامتاماسىز ەتۋ.
2025 جىلى نەگىزگى باسىمدىق تابىستى جوبالاردى كەڭەيتۋ جانە جاڭا باستامالاردى ىسكە قوسۋعا بەرىلەدى. جاستار ساياساتى باسقارماسى ءقازىردىڭ وزىندە «ALMA CUP» سپورتتىق ءتۋرنيرى، «Jas Gala – 2025» شىعارماشىلىق فەستيۆالى جانە «IQ-ALA jastary» ينتەللەكتۋالدىق جوباسى سياقتى ماڭىزدى باعدارلامالاردى جۇزەگە اسىرۋدا. سونىمەن قاتار «انتيكوررۋپسيالىق ۆولونتەرلىك» جانە «سانالى اتا-انا مەكتەبى» سياقتى جاستاردىڭ الەۋمەتتىك مۇمكىندىكتەرىن كەڭەيتۋگە باعىتتالعان جاڭا جوبالار قولعا الىنباق.
«بيىل جۇزەگە اسىرىلاتىن جوبالار سانى 56-عا دەيىن ۇلعايادى، بۇل وتكەن جىلمەن سالىستىرعاندا 10 جوباعا ارتىق. ماڭىزدى باعىتتاردىڭ ءبىرى – جۇمىسشى ماماندىقتاردى جانە وتاندىق ونەردى ناسيحاتتاۋ، ونىڭ ىشىندە قىسقامەتراجدى فيلمدەر ءتۇسىرۋ جانە «اشىق اسپان استىنداعى كينو» جوباسىن ىسكە اسىرۋ»، – دەپ اتاپ ءوتتى ا. كاجدەنبەك.
سونىمەن قاتار، 2025 جىلى 5 جاڭا كوميۋنيتي-ورتالىق اشۋ جوسپارلانىپ وتىر، ولار ءبىلىم بەرۋ جانە مادەني باستامالار الاڭىنا اينالادى. ال 6 مىڭ ورىندىق جاڭا ستۋدەنتتىك جاتاقحانالار ستۋدەنتتەردىڭ باسپانا تاپشىلىعىن ايتارلىقتاي ازايتۋعا مۇمكىندىك بەرەدى.
الماتىدا 2025 جىلى جاستار باستامالارىن دامىتۋ جانە سالاۋاتتى ءومىر سالتىن ناسيحاتتاۋ ماقساتىندا 1 مىڭنان استام مادەني جانە سپورتتىق ءىس-شارالار وتكىزۋ جوسپارلانۋدا. سونداي-اق قالا جاساندى ينتەللەكت سالاسىن دامىتۋعا ەرەكشە نازار اۋدارىپ، كوميۋنيتي-ورتالىقتار بازاسىندا ءبىلىم بەرۋ باعدارلامالارىن ىسكە قوسۋدى كوزدەيدى.
«ناركوستوپ» ۆولونتەرلىك جوباسى مەن «اركىم ماڭىزدى» ينكليۋزيۆتى دامۋ باعدارلاماسى دا ءوز جالعاسىن تابادى. بۇل جوبا ينكليۋزيۆتى جانە الەۋمەتتىك باعدارلانعان قوعامدى قۇرۋعا باعىتتالعان، وندا ءاربىر ادام ءوزىنىڭ مۇمكىندىكتەرىنە قاراماستان ءوز الەۋەتىن ىسكە اسىرىپ، ورتاق يگىلىككە ۇلەس قوسا الادى. نەگىزگى مىندەتتەر – ءومىر ءسۇرۋ جاعدايىن جاقسارتۋ، جاستاردى الەۋمەتتىك-مادەني باستامالارعا تارتۋ، مامانداردى ينكليۋزيۆتى ادىستەرمەن جۇمىس ىستەۋگە ۇيرەتۋ.
«مەملەكەت باسشىسى قازاقستان حالقىنا جولداۋىندا كاسىپتىك ءبىلىم رەفورماسىنىڭ ماڭىزدىلىعىن اتاپ ءوتىپ، 2025 جىلدى – جۇمىسشى ماماندىقتار جىلى دەپ جاريالادى. وسىعان وراي، ءبىز جاستاردى تەحنيكالىق جانە ينجەنەرلىك ماماندىقتارعا تارتۋعا باعىتتالعان الەۋمەتتىك قىسقامەتراجدى فيلمدەر ازىرلەدىك، ولار ۇلتتىق كاسىپتىك باعدارلاۋ باعدارلاماسىنىڭ ءبىر بولىگىنە اينالادى»، – دەدى ا. كاجدەنبەك.
ءسوز سوڭىندا سپيكەر اۋقىمدى باستامالار جاستارعا ءوز الەۋەتىن جۇزەگە اسىرۋعا جانە ەل مەن قالانىڭ دامۋىنا ۇلەس قوسۋعا مۇمكىندىك بەرەتىنىن اتاپ ءوتتى.