قازاقستان جازۋشىلار كىتاپحاناسىندا جازۋشى-پۋبليسيست، «Mecenat.kz» ادەبي سىيلىعىنىڭ تۇڭعىش لاۋرەاتى شارحان قازىعۇلدىڭ «كۇلپەت» اتتى كىتابىنىڭ تۇساۋكەسەر ءراسىمى ءوتتى. اتالمىش كىتاپ «ARNA-B» باسپاسىنىڭ قولداۋىمەن جارىق كورگەن.
ءىس-شارادا جازۋشى-جۋرناليست، ق ر پرەزيدەنتى سىيلىعىنىڭ جانە قازاقستان جۋرناليستەر وداعى سىيلىعىنىڭ لاۋرەاتى قالي سارسەنباي، «Alatay Aqparat» مەدياحولدينگىنىڭ باس ديرەكتورى ەرجان قالىمباي ۇلى، قازاقستان جازۋشىلار وداعىنىڭ مۇشەسى داۋلەتبەك بايتۇرسىن ۇلى رومان جايلى ءوز پىكىرلەرىمەن ءبولىسىپ، كىتاپتىڭ تۇساۋكەسەر ءراسىمىن جاسادى.
«كۇلپەت» رومانى قازاقستاننىڭ سوسياليزم داۋىرىندەگى كەزەڭىنەن باستاپ قازىرگى كۇنگە دەيىنگى تاريحىن باستى كەيىپكەر ءابۋجان رايىسوۆتىڭ ءومىرى مەن تاعدىرى ارقىلى سۋرەتتەيدى. رومان تۋعان جەرگە دەگەن ماحاببات پەن شىنايى پاتريوتيزم، قازاق ايەلىنىڭ ادالدىعى، ۇلتتىق ءداستۇردى ساقتاۋ سياقتى قۇندىلىقتار ارقىلى بۇكىلالەمدىك سۇراقتارعا جاۋاپ ىزدەيدى.
«روماندا جاڭاشا ستيلگە، قازىرگى زامانعى تاقىرىپتى مەڭگەرۋگە، ءتىل ريەۆوليۋسياسى مەن ەۆوليۋسياسىنا ەرەكشە ءمان بەردىم. ءوزىم سونشالىقتى ءبىر پاسسەيست بولماسام دا قازاقتىڭ كونەرىپ بارا جاتقان ءسوز تىركەستەرىن كەڭىنەن پايدالانۋعا كوپ كوڭىل ءبولدىم. ءبىراق بۇل جاعىنان دا وتە ساق بولعانىمدى جاسىرمايمىن.
روماندى جازىپ جاتقاندا ونىڭ اتاۋىن تابۋعا اسىعا قويمادىم، جۇمىستىڭ ورتا تۇسىندا 5 تومدىق قازاق ءتىلىنىڭ تۇسىندىرمە سوزدىگىن ءبىر تومىن اشىپ قاراسام، «كۇلپەت» دەگەن ءسوز بار ەكەن. بۇل – ارحايزم. جان ازابى دەگەن ماعىنانى بىلدىرەدى. مەنىڭ شىعارماما تاپتىرمايتىن اتاۋ ەكەنىن ۇقتىم»،– دەدى جازۋشى شارحان قازىعۇل.
شىعارماشىلىق كەزدەسۋدە «الاتاۋ» ءداستۇرلى ونەر تەاترىنىڭ ارتىستەرى حالىق اندەرىن شىرقادى. ءال-فارابي اتىنداعى قازۇۋ كوللەدجى، د.ا.قونايەۆ اتىنداعى زاڭ كوللەدجىنىڭ cتۋدەنتتەرى، وقىرماندار مەن كىتاپحانا قىزمەتكەرلەرى ويتالقىعا قاتىستى.
«شارحاننىڭ «وڭاشاداعى «ونلاين» ويلار» شىعارماسى «الماتى اقشامى» گازەتىندە جاريالانىپ وتىردى. سوندا وقىرماندارىمىز ءتۇرلى وي پىكىرلەرىن ايتىپ قىزعۋشىلىق تانىتقان ەدى.
روماندا ءسالت-داستۇر تارتىمدى باياندالادى. مەسەناتتار جاريالاعان روماندار بايگەسىندە قارا ءۇزىپ شىققان تۋىندى. توپتان سۋىرىلىپ وزدى دا، ءارى قاراي قۇلاگەردەي دارا شاپتى. شارحان «كۇلپەت» رومانىندا «جان ماڭگىلىگىنە» يلاندىرا العان. كوركەم شىعارمانىڭ نەگىزگى ماقساتى دا وسىنداي تاربيە بولسا، اۆتور دىتتەگەنىنە جەتكەن. قازاق ادەبيەتىنە قوسىلعان سۇبەلى ۇلەس. وزىندىك ستيلمەن، جاڭاشا جازىلعان دۇنيە»، – دەدى قالي سارسەنباي.
رومان ىشىندە بۇگىنگى جاھاندانۋ داۋىرىندە قازاق ۇلتىنىڭ يدەنتيفيكاسياسىن، الەمدە ءوزىنىڭ لايىقتى ورنىن ساقتاپ قالۋدى ماقسات ەتكەن. سونداي-اق، اقىلدى، ءبىلىمدى ازاماتتاردىڭ تۋعان جەردەن جىراققا كەتپەي، ەڭبەك ەتۋىنە جاعداي جاساۋ، جاستاردىڭ پاتريوتتىق سەزىمىن وياتۋ تۋرالى ويلارى ايتىلعان. اتالمىش رومان كوپ ادامنىڭ قولقا سالۋىمەن دۇنيەگە كەلگەن.