مۇنداي حاتتى جۇرەكتى قىز جازادى
جامبىلدىق وقۋشىنىڭ جازعان حاتىنا پرەزيدەنت جاۋاپ بەردى، دەپ حابارلايدى Almaty-akshamy.kz وڭىرلىك كوممۋنيكاسيالار قىزمەتىنە سىلتەمە جاساپ.
جامبىل وبلىسى جامبىل اۋدانىنا قاراستى جاسوركەن اۋىلىنداعى «ءمولدىر» بالاباقشا – مەكتەپ گيمنازياسىنىڭ 2-سىنىپ وقۋشىسى جىبەك يسابەك جۋىردا ەل پرەزيدەنتى قاسىم-جومارت كەمەل ۇلى توقايەۆتىڭ اتىنا جۇرەكجاردى تىلەگىن جازعان بولاتىن.
ساباق ۇلگەرىمى جاقسى، وزات وقۋشىلاردىڭ ءبىرى – جىبەكتىڭ جۇرەگى دە مەيىرىمگە تولى. ونىڭ حاتى مەملەكەت باسشىنىڭ قولىنا تيگەن.
ەل پرەزيدەنتى جىبەككە جازعان حاتىندا جامبىلدىق وقۋشىنىڭ حاتىن اسا ريزاشىلىقپەن وقىعانىن ايتقان.
«ماعان جولداعان ىستىق لەبىزىڭ ءۇشىن راحمەت. سەنىڭ ەرتەڭگى كۇنى ۇلكەن ازامات بولىپ ءوسىپ، ەلىمىزدىڭ پاراساتتى پەرزەنتى اتاناتىنىڭا كامىل سەنەمىن. ءبىزدىڭ بۇگىن قولعا الىپ جاتقان جۇمىسىمىزدىڭ بارلىعى دا جارقىن بولاشاعىمىزدىڭ يەسى – وزدەرىڭە ارنالادى. سوندىقتان ساباعىڭدى ۇزدىك وقىپ، ۇستازدارىڭ مەن اناڭنىڭ بەرگەن تالىم-تاربيەسىن بويىڭا ءسىڭىرىپ، ماقساتقا ۇمتىلۋدان جالىقپا. وتباسىڭنىڭ قاشان دا ماقتانىشى بولىپ، جەتىستىكتەرگە جەتە بەر، اينالايىن! اناڭ مەن باۋىرىڭا مەنەن سالەم»، – دەپ جازدى مەملەكەت باسشىسى.
سونداي-اق قاسىم-جومارت كەمەل ۇلى جامبىل اۋدانىنىڭ وقۋشىسىنا نوۋتبۋك تارتۋ ەتكەن.
ءوز كەزەگىندە حاتتىڭ يەسىن بۇگىن وبلىس اكىمى بەردىبەك ساپاربايەۆ ارنايى قابىلداپ، ىزگى نيەتىن كورسەتكەن بەردىبەك ماشبەك ۇلى جىبەككە سمارتفون مەن كىتاپ سىيعا تارتتى.
«مۇنداي حاتتى جۇرەكتى قىز جازادى»، – دەپ تاڭداندى وبلىس اكىمى بەردىبەك ماشبەك ۇلى.