جامبىل وبلىسىنداعى گۆاردەيسك اسكەري قالاشىعىنداعى گوسپيتالدە مەرزىمدى اسكەري قىزمەتكە شاقىرىلعان سارباز قايتىس بولدى، دەپ حابارلايدى Almaty-akshamy.kz قازاقپارات-قا سىلتەمە جاساپ.
«2022 جىلدىڭ 22 ساۋىرىندە گۆاردەيسك اسكەري قالاشىعىنداعى گوسپيتالدە قاتارداعى جاۋىنگەر قالباي الىبەك سالامات ۇلى قايتىس بولدى. تاڭەرتەڭ ساپتا تۇرعان جاۋىنگەر كەنەتتەن ەسىنەن تانىپ قالعان. اسكەري قىزمەتشىگە قاجەتتى مەديسينالىق كومەك كورسەتىلگەنمەن، ول ەسىن جيماعان كۇيى قايتىس بولعان»، - دەلىنگەن قورعانىس مينيسترلىگىنىڭ «قازاقپارات» اگەنتتىگىنە بەرگەن جاۋابىندا. بەلگىلى بولعانداي، جاس جىگىت بيىل كوكتەمدە ماڭعىستاۋ وبلىسىنان مەرزىمدى اسكەري قىزمەتكە شاقىرىلدى.
«ساربازدىڭ ولىمىنە قاتىستى تەكسەرۋ جۇمىستارى باستالدى. قورعانىس مينيسترلىگىنىڭ باسشىلىعى مەن قارۋلى كۇشتەردىڭ جەكە قۇرامى قالباي الىبەك سالامات ۇلىنىڭ تۋعان-تۋىستارى مەن جاقىندارىنا قايعىرىپ كوڭىل ايتادى»، - دەپ اتالىپ وتكەن ۆەدومستۆو حابارلاماسىندا.