10 تومدىققا جامبىل جابايەۆتىڭ وتكەن عاسىردىڭ باسىنان باستاپ دۇنيە سالعانعا دەيىنگى بارشا ولەڭدەرى مەن ايتىس-جىرلارى جانە كورنەكتى اقىن-جازۋشىلاردىڭ ەستەلىكتەرى دە توپتاستىرىلعان.
جامبىل جابايەۆتىڭ 175 جىلدىق مەرەيتويىنىڭ اياسىندا شىققان 10 تومدىق جيناقتىڭ تۇساۋكەسەرى ءوتتى، دەپ حابارلايدى Almaty-akshamy.kz
شاراعا ق ر مەملەكەتتىك حاتشىسى قىرىمبەك كوشەربايەۆ، ق ر مادەنيەت جانە سپورت ءمينيسترى اقتوتى رايىمقۇلوۆا، ق ر پارلامەنتىنىڭ سەنات جانە ءماجىلىس دەپۋتاتتارى، قوعام قايراتكەرلەرى مەن عالىمدار، زيالىق قاۋىم وكىلدەرى قاتىستى.
«ءبىز بۇگىن ۇلى جامبىلدىڭ 175 جىلدىق مەرەيتويى اياسىندا مەملەكەتتىك تاپسىرىس ارقىلى جارىققا شىققان 10 تومدىق جيناقتىڭ تۇساۋكەسەر راسىمىنە جينالىپ وتىرمىز. ۇلى جىراۋدىڭ سوڭىندا قالعان سوقتالى شىعارمالارىن ۇلتتىڭ يگىلىگىنە جاراتىپ، كەلەر ۇرپاققا جەتكىزۋ ءبىز ءۇشىن ۇلاعاتتى پارىز، اسىل امانات. مەرەيتوي جىلىندا اقىن شىعارمالارىن ناسيحاتتاپ، حالىققا جەتكىزۋدە رەسپۋبليكا كولەمىندە كوپتەگەن مادەني ءىس-شارالار جۇرگىزىلۋدە. سولاردىڭ ءبىرى - مەملەكەتتىك كوميسسيا قابىلداعان شەشىمنىڭ اياسىندا جارىق كورگەن وسى كوپتومدىقتار دەر ەدىم، - دەدى قىرىمبەك كوشەربايەۆ.