قازاق ونەرىنىڭ التىن ورداسى – جامبىل اتىنداعى قازاق مەملەكەتتىك اكادەميالىق فيلارمونياسى بيىل ءوزىنىڭ 90 جىلدىق مەرەيتويىن اتاپ وتۋدە، دەپ حابارلايدى aqshamnews.kz
1935 جىلى 14 قاڭتاردا قازاق كسر حالىق كوميسسارلار كەڭەسىنىڭ قاۋلىسىمەن قۇرىلعان بۇل ونەر ورداسى 1938 جىلى جىر الىبى جامبىلدىڭ ەسىمىن يەلەندى. 2023 جىلى قازاقستان رەسپۋبليكاسىنىڭ ۇكىمەتىنىڭ قاۋلىسىمەن «اكادەميالىق» مارتەبە بەرىلىپ، ۇجىمنىڭ شىعارماشىلىق دەڭگەيى جوعارى باعالاندى.
فيلارمونيانىڭ نەگىزىن قالاۋشى – كورنەكتى مۋزىكاتانۋشى، كومپوزيتور، ديريجەر، قازاق كسر-نىڭ حالىق ءارتىسى احمەت جۇبانوۆ. ءار جىلدارى بۇل مەكەمەدە قازاق مۋزىكاسى مەن ونەرىنىڭ ۇلى تۇلعالارى قىزمەت ەتتى. ولاردىڭ قاتارىندا دينا نۇرپەيىسوۆا، امىرە قاشاۋبايەۆ، قالي جانتىلەۋوۆ، كۇلاش بايسەيىتوۆا، روزا باعلانوۆا، جۇسىپبەك ەلەبەكوۆ، بيبىگۇل تولەگەنوۆا سىندى اڭىز ادامدار بار.
فيلارمونيانىڭ شىعارماشىلىق ۇجىمدارى – ت.ابدىراشيەۆ اتىنداعى ق ر مەملەكەتتىك اكادەميالىق سيمفونيالىق وركەسترى، ن.تىلەندييەۆ اتىنداعى اكادەميالىق فولكلورلى-ەتنوگرافيالىق «وتىرار سازى» وركەسترى، مەملەكەتتىك ۇرمەلى اسپاپتار وركەسترى، مەملەكەتتىك حور كاپەللاسى، ىشەكتى اسپاپتار كۆارتەتى، كلاسسيكالىق گيتاريستەر كۆينتەتى جانە باسقا دا ونەر ۇجىمدارى – قازاق جانە الەمدىك كلاسسيكالىق مۋزىكاعا ۇلكەن ۇلەس قوسىپ كەلەدى.
رەپەرتۋارىندا 20 000-نان استام تۋىندىسى بار فيلارمونيا ۇجىمى 90 جىل بويى قازاق ونەرىنىڭ رۋحىن اسقاقتاتىپ كەلەدى. قاسيەتتى ونەردىڭ قارا شاڭىراعى مەرەيتوي قارساڭىندا جىل كولەمىندە ءبىرقاتار ءىس-شارالار وتكىزۋدى جانە قاراشا ايىندا گالا-كونسەرت ۇيىمداستىرۋدى جوسپارلاپ وتىر.
الماتى قالاسىنىڭ تالعامپاز كورەرمەندەرىن ونەر كەشتەرىنە شاقىرامىز.