الماتى اكىمى ەربولات دوسايەۆ قحر-نا جۇمىس ساپارى اياسىندا بەيجىڭ مەرى ين يۋنمەن كەزدەستى. كەلىسسوز بارىسىندا تاراپتار قالالار اراسىنداعى ەكىجاقتى سەرىكتەستىكتى نىعايتۋ مۇمكىندىگىن تالقىلادى. اسىرەسە، كولىك ينفراقۇرىلىمىن دامىتۋ، ەكولوگيالىق احۋالدى جاقسارتۋ جانە جايلى قالالىق ورتا قالىپتاستىرۋ ماسەلەسىنە باسا نازار اۋدارىلدى، دەپ حابارلايدى aqshamnews.kz
كەلىسسوزدەگى باستى تۇيتكىلدىڭ ءبىرى قالالاردىڭ ەكولوگيالىق جاعدايى ەدى. ين يۋننىڭ ايتۋىنشا، سوڭعى 20 جىلدا بەيجىڭ اتموسفەراعا زياندى شىعارىندىلار دەڭگەيىن ايتارلىقتاي تومەندەتۋگە قول جەتكىزگەن. بۇل جۇيەلى ەكولوگيالىق ساياساتتىڭ، عىلىمي ءتاسىلدىڭ جانە تەحنولوگيالىق يننوۆاسيانىڭ جەمىسى. لاستانۋ دەڭگەيىن تومەندەتۋ 2016 جىلى قابىلدانعان بەيجىڭنىڭ باس جوسپارى نەگىزىندە قولعا الىنعان. بۇل جوسپار اياسىندا مەترو جۇيەسىن كەڭەيتۋ، ەكولوگيالىق تازا كولىك تۇرلەرىنە باعىتتالعان ىڭعايلى كولىك جۇيەسىن دامىتۋ جانە تومەن شىعارىندىلار ايماقتارىن (LEZ) قۇرۋ كوزدەلگەن، بۇل ەكولوگيالىق تالاپتارعا ساي كەلمەيتىن كولىك قۇرالدارىنىڭ قوزعالىسىن شەكتەيدى.
بەيجىڭ مەرىمەن اڭگىمە بارىسىندا ەربولات دوسايەۆ قازىرگى ۋاقىتتا الماتىدا دا اتموسفەرالىق اۋانى قورعاۋ، نۇكتەلى قۇرىلىسقا جول بەرمەۋ، قالانىڭ كولىك قاڭقاسىن قالىپتاستىرۋ جانە جىلدام رەلستى ءارى قوعامدىق كولىكتى دامىتۋ بويىنشا شارالار قابىلدانىپ جاتقانىن جەتكىزدى. الماتى اكىمى 2023 جىلدىڭ مامىر ايىندا الماتىنىڭ جاڭا باس جوسپارى قابىلدانعانىن، ونىڭ سوڭعى 20 جىلدان استام ۋاقىت بويى قايتا قارالماعانىن حابارلادى. بۇل جوسپاردىڭ نەگىزىندە تاريحي ورتالىققا جۇكتەمەنى ازايتۋعا باعىتتالعان پوليورتالىقتى دامۋ قاعيداتى جاتىر. مۇنداي شارالار قالالىق ورتانى تەڭگەرىمدى دامىتۋعا مۇمكىندىك بەرەدى.
كەزدەسۋ قورىتىندىسى بويىنشا تاراپتار ەكىجاقتى قارىم-قاتىناستى نىعايتۋعا ۋاعدالاسىپ، الماتى مەن بەيجىڭ اراسىنداعى سەرىكتەستىكتىڭ دامۋى قازاقستان مەن قىتايدىڭ ەكى قالاسىنىڭ ەكونوميكالىق ءوسۋى مەن تۇراقتى دامۋىنا ىقپال ەتەتىنىنە سەنىم ءبىلدىردى.