جاياۋ جۇرگىنشىلەردىڭ جول قوزعالىسى ەرەجەلەرىن بۇزىپ، بەلگىلەنبەگەن ورىنداردا تاكسي نەمەسە كولىك توقتاتۋعا تىرىسۋى – ۇزاق ۋاقىتتان بەرى جالعاسىپ كەلە جاتقان ماسەلە. مۇنداي زاڭ بۇزۋشىلىقتار ولاردىڭ قاۋىپسىزدىگىنە عانا ەمەس، سونداي-اق جۇرگىزۋشىلەر ءۇشىن دە وزىندىك كەرى اسەرىن تيگىزەتىنىن جاسىرمايمىز. كولىك جۇرگىزۋشىلەرى جاياۋ جۇرگىنشىلەردى باسىپ كەتپەۋ ءۇشىن مانيەۆر جاساۋعا ءماجبۇر بولادى. ارينە، بۇل جولدا كەلە جاتقان وزگە كولىك جۇرگىزۋشىلەرى ءۇشىن قاتەر توندىرەتىنى انىق، دەپ حابارلايدى aqshamnews.kz.
جاياۋ جۇرگىنشىلەردىڭ ەرەجەنى بۇزۋى
الماتى قالالىق پوليسيا دەپارتامەنتىنىڭ مالىمەتىنشە، جاياۋ جۇرگىنشىلەر ارنايى جابدىقتالعان ورىنداردا نەمەسە تروتۋارلاردا كولىك كۇتۋى كەرەك. جولعا شىعىپ، تاكسي توقتاتۋ - تىكەلەي جول قوزعالىسى ەرەجەلەرىن بۇزۋ. بۇل ءۇشىن اكىمشىلىك قۇقىق بۇزۋشىلىقتار تۋرالى كودەكستىڭ 615-بابى بويىنشا جازا قولدانىلادى. جاياۋ جۇرگىنشىلەرگە 2 ايلىق ەسەپتىك كورسەتكىش (اەك) كولەمىندە ايىپپۇل سالىنادى، ال قايتالانعان جاعدايدا ايىپپۇل كولەمى 10 اەك-كە دەيىن وسەدى.
جۇرگىزۋشىلەردىڭ جاۋاپكەرشىلىگى
تاكسي توقتاتىپ تۇرعان جۇرگىنشىلەرمەن ساۋدالاساتىن جۇرگىزۋشىلەر دە جاۋاپكەرشىلىكتەن قۇتىلا المايدى. كولىك قۇرالدارىن توقتاتۋ جانە تۇراق ەرەجەلەرىن بۇزۋ بويىنشا اقبتك 597-بابىنا سايكەس، جولعا كەدەرگى كەلتىرگەن جۇرگىزۋشىلەرگە 10 اەك كولەمىندە ايىپپۇل سالىنادى.
جۇرگىزۋشىلەردىڭ جاياۋ جۇرگىنشىنى قاعىپ كەتۋ جاعدايى
ەگەر جۇرگىزۋشى ەرەجە بۇزعان جاياۋ جۇرگىنشىنى قاعىپ كەتسە دە، زاڭ كوبىنەسە جاياۋ جۇرگىنشى جاعىندا بولادى. جۇرگىزۋشى جىلدامدىقتى ساقتاپ، بارلىق ەرەجەلەردى ورىنداسا دا، اپاتتى بولدىرماۋعا مىندەتتى. ەگەر جاياۋ جۇرگىنشى زارداپ شەكسە نەمەسە قايتىس بولسا، جۇرگىزۋشى قىلمىستىق كودەكستىڭ 345 نەمەسە 346-باپتارى بويىنشا قىلمىستىق جاۋاپكەرشىلىككە تارتىلۋى مۇمكىن.
سوندىقتان وزگەگە كەسىرىڭىز تيمەسىن دەسەڭىز جول ەرەجەسىن ساقتاعانىڭىز ابزال.