ىشكى ىستەر مينيسترلىگى جاياۋ جۇرگىنشىلەرگە ارنالعان جاڭا ەرەجەگە قاتىستى تۇسىنىكتەمە بەردى
ىشكى ىستەر مينيسترلىگى جاياۋ جۇرگىنشىلەردىڭ كوشەدەن ءوتۋىن شەكتەيتىن جول قوزعالىسى ەرەجەلەرىنە وزگەرىستەر ەنگىزىلۋىنە قاتىستى تۇسىنىكتەمە بەردى، - دەپ حابارلايدى اlmaty-akshamy.kz.
2023 جىلدىڭ قاراشا ايىنىڭ سوڭىندا «اشىق نقا» سايتىندا جول قوزعالىسى ەرەجەلەرىنە وزگەرتۋلەر ەنگىزۋ جوباسى پايدا بولدى. سونىڭ ءبىرى جاياۋ جۇرگىنشىلەردىڭ رۇقسات بەرەتىن سيگنال بويىنشا جولدى كەسىپ ءوتۋ ەرەجەلەرىنە قاتىستى ەدى. مامانداردىڭ ايتۋىنشا، ەگەر ەرەجە وسى كۇيى قابىلداناتىن بولسا، جاياۋ جۇرگىنشىلەردىڭ قيىلىستاردا جولدى كەسىپ ءوتۋى الدەقايدا قيىندايدى. ويتكەنى، ولار بۇرىلۋ مانيەۆرىن ورىنداي الماعان كولىككە جول بەرۋگە ءماجبۇر بولادى. ماماندار بۇل تەك كەپتەلىستەر سانىن عانا ەمەس، جازاتايىم وقيعالاردى دا ارتتىرۋى مۇمكىن ەكەنىن العا تارتىپ وتىر.
«جول ءجۇرىسى قاعيدالارىن بەكىتۋ تۋرالى» قازاقستان رەسپۋبليكاسى ىشكى ىستەر ءمينيسترىنىڭ 2023 جىلعى 30 ماۋسىمداعى №534 بۇيرىعىنا وزگەرىستەر مەن تولىقتىرۋلار ەنگىزۋ تۋرالى» مينيسترلىك بۇيرىعىن ازاماتتاردىڭ تالقىلاۋى ءۇشىن سايتقا سالعانىن ىشكى ىستەر مينيسترلىگى راستاپ وتىر. 3-تاراۋدىڭ 16-تارماعىنا: «جول قوزعالىسى رەتتەلەتىن جەرلەردە جاياۋ جۇرگىنشىلەر جول ديسپەچەرىنىڭ نەمەسە جاياۋ جۇرگىنشى باعدارشامىنىڭ سيگنالدارىمەن، ال ولار بولماعان جاعدايدا كولىكتىك باعدارشاممەن جۇرەدى؛ باعدارشامنىڭ رۇقسات بەرەتىن سيگنالى قوسىلعان كەزدە جاياۋ جۇرگىنشى كولىك قوزعالىسىن اياقتاعانعا دەيىن كۇتۋى ءتيىس»، دەپ وزگەرىس ەنگىزىلگەن.
«بۇل ستاندارت، ەڭ الدىمەن جاياۋ جۇرگىنشىلەردىڭ قاۋىپسىزدىگىن قامتاماسىز ەتۋگە ارنالعان. ويتكەنى، قازىرگى ۋاقىتتا جاياۋ جۇرگىنشىلەر كوبىنەسە وزدەرىنىڭ قاۋىپسىزدىگىنە ءمان بەرە بەرمەيدى. باعدارشامنىڭ جاسىل ءتۇسى جانا سالىسىمەن كولىك قۇرالدارى بۇرىن باستاعان مانيەۆردى اياقتادى ما نەمەسە ونىڭ جاياۋ جۇرگىنشىلەر جولىنىڭ الدىندا توقتاۋعا مۇمكىندىگى بار ما دەگەن ماسەلەگە باس اۋىرتپاي جولعا شىعا بەرەدى»، - دەدى مينيسترلىك.
ىشكى ىستەر مينيسترلىگى تۇزەتۋلەردىڭ ءالى قابىلدانباعانىن، ەگەردە قابىلداۋ بولعان جاعدايدا قوعامدىق تالقىلاۋ ناتيجەلەرى ەسكەرىلەتىنىن باسا ايتتى.