جاعالاي سۋ اپاتى: الماتى وبلىسىندا ۆوروشيلوۆ سۋ قويماسىنىڭ بوگەتى بۇزىلدى

«30 ناۋرىز ساعات 15:50–دە ىلە اۋدانى بايكەنت اۋىلىندا ۆوروشيلوۆ سۋ قويماسىنىڭ بوگەتى بۇزىلدى. جارىلعان بوگەتتىڭ ەنى — شامامەن 4-5 مەتر. سۋ جارمۇحامەت وزەنىنىڭ نەگىزگى ارناسىمەن اعىپ، ارى قاراي امانگەلدى 1 جانە امانگەلدى 2 توعاندارىنا قۇيادى، وندا بارلىق شليۋزدەر اشىق. سۋ ترانزيتتىك رەجيممەن وتە وتىرىپ، ارى قاراي قاسكەلەڭ وزەنىنە، ودان سوڭ قاپشاعاي سۋ قويماسىنا قۇيادى» دەپ حابارلادى الماتى وبلىسى اكىمدىگىنىڭ باسپا ءسوز قىزمەتى.

اكىمدىك سونداي-اق بايكەنت، قاراوي اۋىلدارىندا تۇرعىنداردىڭ ۇيلەرىن سۋ باسپاعانىن حابارلادى.

«بۇكىل تۇرعىندارعا ەۆاكۋاسيالاۋ مۇمكىن ەكەندىگى حابارلاندى. الايدا، سۋ باسۋ نەمەسە زارداپ شەككەندەر بولعان جوق» دەلىنەدى حابارلامادا.

ەسكە سالايىق، كەشە ىلە اۋدانى بايكەنت اۋىلدىق وكرۋگىندەگى ۆوروشيلوۆ سۋ قويماسىنىڭ بوگەتى بۇزىلعان بولاتىن.  

ايتا كەتەيىك، 31 ناۋرىز ساعات 01:30-دان باستاپ اششىلىساي كولىندە سۋ دەڭگەيىنىڭ كوتەرىلۋى جانە قاراوي اۋىلىن سۋ باسۋ قاۋپىنە بايلانىستى «بايسەركە-مەجدۋرەچينسك» تاسجولىنىڭ 23-42 شاقىرىمى (الماتى قالاسىنان چاپايەۆ اۋىلىنا دەيىن) جابىلعان.