ەل ءىشى، ونىڭ ىشىندە الماتى دا قالىپتى تىرشىلىگىنە ورالۋدا. دەگەنمەن، «ساقتانساڭ، ساقتايمىن» دەمەكشى، ءالى دە ارقانى كەڭگە سالاتىن ۋاقىت ەمەس. قۇقىق قورعاۋ ورگاندارى مىندەتتەرىن بۇرىنعىدان دا كۇشەيتىپ، ساپتا كىرپىك قاقپاي ەل تىنىشتىعىن كۇزەتىپ ساق تۇر.
كەشەگى ەل باسىنا قارا بۇلت تونگەن ساتتە قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعىنا قاراستى اسكەري بولىمدەردىڭ وفيسەرلەرى مەن ساربازدارى دا الدىڭعى شەپتە ءجۇردى. وكىنىشكە قاراي، جاراقاتتانعاندار دا بار. ولاردىڭ اراسىندا الماتىداعى 7552 اسكەري ءبولىمىنىڭ ساربازى قوستانايلىق جادىگەر ءابدىراحمانوۆ تا بار. ءقازىر ول اسكەري بولىمدەگى لازارەتتە ەم قابىلداپ جاتىر.
– ءبىزدى 4 قاڭتارعا قاراعان ءتۇنى ساعات 1-لەر شاماسىندا شۇعىل دابىلمەن الماتى كوشەلەرىندە ورىن العان جاپپاي تارتىپسىزدىكتى رەتكە كەلتىرۋ ماقساتىنداعى جاۋىنگەرلىك قىزمەتتى ورىنداۋعا جينادى. جۇكتەلگەن اسكەري مىندەتىمىزدى ورىنداپ، كەرى قايتىپ كەلە جاتقانىمىزدا، ءبىز وتىرعان «كاماز» كولىگىنە شابۋىل جاسالدى. كولىككە سىرتتان تاس، بوتەلكەلەر جاۋدىرا باستادى. ءبىر كەزدە كۋزوۆقا تۇتىندەتكىش گراناتا لاقتىردى. ءبارىمىز كولىكتەن جەدەل تۇسۋگە ىڭعايلانا باستاعانىمىزدا، ءبىر توپ ادام لاپ قويدى دا، باس-كوز دەمەي توپەلەپ ۇرا باستادى. باسىمنان قاتتى سوققى العان مەن ەسىمدى جوعالتىپپىن. ەسىمدى جيسام، الدەبىر قوناقۇيدە جاتىر ەكەنمىن. مەنى سول ماڭدا ورنالاسقان قوناقۇيگە بەيبىت تۇرعىنداردىڭ كىرگىزىپ الىپ، العاشقى مەديسينالىق كومەك كورسەتكەندەرىن ءبىلدىم.
مەن ۇلتتىق ۇلاننىڭ ساپىندا جۇرگەنىمدى، ەل باسىنا وسىنداي قيىندىق تۇسكەن ساتتە كومانديرلەرىمنىڭ تاپسىرماسىنا جانە حالقىما ادال بولعانىمدى ماقتان ەتەمىن. شىنى كەرەك، بەيبىت ءومىردىڭ ءقادىرىن وسىنداي سىن ساعاتتا سەزىنەدى ەكەنسىڭ. جانە دە جۇرەگىڭنىڭ مىقتىلىعى دا، پاتريوتتىق سەزىمىڭ دە وسىنداي كەزدە تارازىعا تۇسەدى. ءبىزدىڭ جىگىتتەردىڭ ءبارى مىقتىلىعىن كورسەتتى. دەگەنمەن، ەندى مۇنداي جاعداي قايتالانباسىن دەپ تىلەيمىز، – دەيدى قاتارداعى جاۋىنگەر جادىگەر ءابدىراحمانوۆ.
ەسكە سالا كەتەيىك، ءقازىر مەگاپوليستەگى جاعداي تۇراقتى. قالادا ساعات تۇنگى 23.00-دەن تاڭعى 07.00-گە دەيىن كومەندانتتىق رەجيم ەنگىزىلگەن.