23 ماۋسىمدا الماتى قالاسىنىڭ باس سانيتارلىق دارىگەرى جانداربەك بەكشين وڭىرلىك كوممۋنيكاسيالار قىزمەتىندە وتكەن ونلاين-بريفينگتە قالا تۇرعىندارىنىڭ كارانتين تالاپتارىن ساقتامايتىنىن حابارلادى. ەرەسەكتەر مەن بالالار جاياۋ جۇرگىنشىلەر جولى مەن سكۆەرلەردە بەيقام جۇرۋدە. بۇل كوروناۆيرۋس ينفەكسياسىنىڭ جاڭا تولقىنىن تۋدىرۋى مۇمكىن.
جۋرناليستەردىڭ سۇراقتارىنا جاۋاپ بەرگەن جانداربەك بەكشين قارقىندى ەپيدەميولوگيالىق جاعدايعا قاراماستان، جاڭا شتامداردىڭ اينالىمىنا بايلانىستى لوكداۋندى ەنگىزۋ جوسپارلانباعانىن مالىمدەدى.
"بارلىعى ءبىزدىڭ تارتىپكە، ەپيدەمياعا قارسى شارالاردى ساقتاۋعا بايلانىستى. ارينە، جاڭا شتامداردىڭ انىقتالعانى تۋرالى اقپارات العانمەن، ءبىزدىڭ مەديسينالىق جەلى سىرقاتتانۋشىلىق كۇرت وسكەن جاعدايدا عانا دايىندىق جۇرگىزەدى"، – دەدى ج. بەكشين.
ول بۇعان دەيىن الماتىدا ءۇشىنشى تولقىن كەزىندە كوۆيدتىك ەمحانالاردا 6 060 توسەك-ورىن بارىن ايتتى. اۋرۋدىڭ ازايۋىنا بايلانىستى ولاردىڭ سانى 1700-گە دەيىن تومەندەدى. اۋرۋ جۇقتىرۋ ارتقان جاعدايدا ەمدەۋ مەكەمەلەرى قايتا باقىلاۋ جۇرگىزەدى.
"بۇگىندە لوكداۋنعا قاتىستى ماسەلە تۇرعان جوق. "دەلتا" شتامىن جۇقتىرعان ءبىر جاعداي انىقتالدى. لوكداۋنعا جول بەرمەۋىمىز كەرەك. ول ءۇشىن ەپيدەميولوگتار ءسىزدىڭ الدىڭىزعا قويعان بارلىق شەكتەۋ شارالارىن ساقتاۋ قاجەت"، – دەدى ج. بەكشين.
الماتىنىڭ باس سانيتارلىق دارىگەرى قالا تۇرعىندارىن ەكپە الۋعا، سونداي-اق بەتپەردە رەجيمى مەن قوعامدىق ورىنداردا الەۋمەتتىك قاشىقتىقتى ساقتاۋعا شاقىردى.