يگى ويلار كوڭىلدى جادىراتادى
«ءار ادام كۇنىنە تىم بولماعاندا، بەس مينۋت اقىماق بولادى. اقىلدى ادام اتانۋدىڭ جولى – سول ءليميتتى ازايتۋ» دەپتى دانىشپان دەيل كارنەگي. راسىندا سولاي. ءقازىر اينالاعا كوز جىبەرسەڭىز، نەبىر اقىلدى، ءبىلىمى مەن بىلىگى كەلىسكەن جاستارعا كوزىڭىز تۇسەدى. شەتىنەن مىقتى. ىلعي «سەن تۇر، مەن اتايىن» دەيتىن قاراكوزدەرىمىزدىڭ قاتارى ارتقان. بۇل وتە قۋانارلىق جاعداي. عىلىم مەن تەحنيكانى يگەرگەن، ساۋاتتى، شەت تىلدەرىندە سايرايتىنداردى كورىپ تاڭداناسىز. ءبىر جاعىنان ءسۇيسىنىپ، قازاقتىڭ ۇل-قىزدارىنىڭ قۇلشىنىسىنا سونداي رازى بولاسىز. بالكىم، مۇنى مىنا نارىقتىق زاماننىڭ، باسەكەلەستىك كەزەڭنىڭ ارتىپ بارا جاتقانىمەن بايلانىستىرساق، ارتىق ەمەس شىعار. ويتكەنى، ءاربىرىمىز كۇن كورۋىمىز كەرەك. ەگەر وزىڭىزگە بۇيىرىپ تۇرعان زاتقا قول سوزساڭىز، وندا ول جاقىنداي تۇسەدى. ءبىراق وسى اتالعاننىڭ بارىنە تەك قانا جەتە ءبىلۋ قاجەت. ول ءۇشىن تالپىنىس تۇگەسىلمەگەن ابزال.
ءبىزدى كوپتەن بەرى تولعاندىرىپ جۇرگەن ءبىر ويلار بار. بۇل جونىندە ۇنەمى ايتىپ، كەي-كەيدە، وقتا-تەكتە قالام تەربەپ تە ءجۇرمىز. دالىرەك ايتقاندا، بۇعان دەيىن تاپتىشتەپ جازباساق تا، ىرىكتەپ قاعاز بەتىنە تۇسىردىك. ونىڭ ءبىرشاماسىن جاريالادىق تا. سونىڭ ساباعىن تارقاتاتىن ۋاقىت كەلدى.
اتا-بابامىز جاقسىنى كورمەك ءۇشىن دەيدى. ءدال تاۋىپ ايتىلعان ناقىل ءسوز. سول سەبەپتى دە يگى ىستەر جاساۋ ءۇشىن، ەڭ باستىسى، بىزدەر ءوزىمىزدى قايراۋىمىز كەرەك سياقتى. فيلوسوفتاردىڭ مەڭزەيتىنى دە وسى.
كۇلىپ جۇرۋگە تىرىسىڭىز...
ادامنىڭ جانىنىڭ جادىرايتىن كەزى ول كۇلە بىلگەن شاعىندا. ساتيريك ۋاليبەك ءابدىرايىموۆ «ءوز كوڭىلىڭىزدى ءوزىڭىز كوتەرىڭىز، سىزگە باسقا بىرەۋ سىرتتان كەلىپ كوتەرىپ بەرمەيدى» دەيدى. ءسوزىنىڭ جانى بار. شىنىمەن دە، اينالاداعى ساتتەردەن ءبىر اۋىق ويدى ءبولىڭىز. ءتۇرلى كومەديالىق فيلمدەر، قىسقاشا روليكتەر قاراي ءجۇرىڭىز. مۇمكىن بولسا، قوجاناسىر مەن الدار كوسە جايىنداعى قىسقاشا ازىلدەردى جاتتاپ الىڭىز. توي-جيىن، وتىرىستارعا بارعاندا قاجەت بولماق. قازاق «اۋزىندا ءازىلى جوقتىڭ، قوينىندا قولشوقپارى جۇرەدى» دەيدى. ءدوپ تابىلعان ءسوز. ەگەر ءوزىڭىزدى كۇنىگە 30-40 مينۋت ءازىل كورۋگە، ونى ءھام قىزىقتى ەتىپ ايتۋعا تىرىسىڭىز. سوندا سەرگەك بولاسىز. ءىسىڭىز العا باسادى.
قىم-قۋىت تىرلىكتى جەڭىل قابىلداڭىز...
امەريكالىق عالىمداردىڭ ايتۋىنشا، ادام ءومىرىنىڭ 25 جىلى ۇيقىمەن وتەتىن كورىنەدى. ال جۇڭگو فيلوسوفى كونفۋسيي «ۇيقى دەگەن - كىشى ءولىم» دەپتى. مەيىلىنشە، ۇيقى مەن تاماقتى دۇرىس جوسپارلاعان دۇرىس. بارلىعىن ءبىر قالىپتى رەجيمدە ۇستاڭىز. سوندا سىزدە السىزدىك پەن شارشاۋ بولمايدى. مۇمكىن، قاتتى شارشاعان ۋاقىتتا كوبىرەك تىنىققان دا ءجون شىعار. مۇنى اركىمنىڭ ءوز ەركىنە قالدىردىق. ميدى قاجەتسىز اقپاراتپەن تولتىرماڭىز. ءسوزدىڭ توق ەتەرى، ماسەلەنى جەڭىل قابىلداپ ۇيرەنگەن ادام بارىنەن وزباق.
ءتۇيىن
بىلاي قاراپ تۇرساڭىز، تۇك قيىن نارسەلەر ەمەس. بارلىعىن جاساۋعا ءارى جۇزەگە اسىرۋعا بولادى. تەك نيەت پەن ىنتا كەرەك. وسى اتالعانداردى بىرتىندەپ ىسكە اسىرۋعا داعدىلانىڭىز. ءبارى ءوزىڭىزدىڭ قولىڭىزدا! ويعا العان ىستەردىڭ ورىندالارىنا سەنىڭىز!